MINGGU MISERICORDIAS DOMINI 1 MEI 2022 Evangelium: Psalmen: 105:1-6

I.                   Patujolo

Psalmen on, manjou halak Israel laho tu panombaon, mamuji, mangoloi, jala mangalului lomo ni roha ni Debata (Psalmen 105:1-4). Marhite-hite halongangon diparmudu-mudu Jahowa do bangso Israel asa gabe bangso na badia na mangoloi sude uhumNa na tigor jala bonar. Par Psalmen on, manghagiothon asa sude bangso Israel pasahathon hamuliateonna di bagasan roha na ias ala diparmudu Debata do ngolu nasida, di lehon do tu nasida sihalashonon marhite-hite tano parpadanan. Suang songon i, songon sada bangso napinillit ni Debata hita, sipata boi do hita manili tu pudi marningot burju dohot hasatiaon ni Debata dipardalanan ngolu ni Israel nang hita di tingki on.

II.        Hatorangan Ni Turpuk

Halak na tau dohot mamboto saluhut na niula ni Debata di bagasan ngoluna, gabe jolma na tau situtu do lao mandok tu Debata. Songon sada dakdanak na derngas, na lupa jala bais tu panghophopion ni natortas na.  Somalna, sada natua-tua dang pola mangodo saluhut nabinahenna tua angka ianakhon na, alai boi do buni di ate-ate na angka lungun ni roha taringot tu habaison ni angka ianakhonna. Suang songon i ma, hita molo bais jala lupa mandok mauliate tu Tuhan ta, holan na marungutungut, mangalo, derngas gabe patubuhon lungun ni roha di Debata. Di lehon Debata do tu ngolunta, nasa na taharingkothon lobi sian na nilehon ni natoras ta,  di pasu-pasu sude angka ulaonta, dohot angka hahorason. Lobi sian i tahe, di lehon do di hita dohot ngolu na saleleng ni leleng na, marhite panghophop ni Jesus di hau pinarsilang.  Tarlumobi dung dapot hita angka sinadongan manang angka sitaonon marganti soring, tung tama situtu hita mandok mauliate songon si Job. Unang gabe songon halak Israel hita naung diurupi Debata marlobi-lobi, alai tong marungut-ungut huhut gabe mangalo Debata, gabe manghorhon jea tu nasida. Unang marungut-ungut alai ikkon gabe marroha mauliate ma nian dipangkataion manang parulaon. Asa tarpasu-pasu sude ngolunta.

Di ayat sada di dok asa mandok mauliate di tongatonga ni saluhut bangso. Na sa jolma na adong haporseaon  situtu di rohana, jala na manghaholongi Debata, boi dohonon gabe jolma na tarpasu-pasu. Di dok: “Puji hamu ma Jahowa, baritahon hamu ma goarna i, pabotohon hamu di tongatonga ni angka bangso angka pambahenanna i!” Boasa?

1. Di natabaritahon goarni Debata dohot sude parulaonNa dibagsan ngolunta marhite-hite taha mauliate, gabe taruli jamita na denggan ma angka dongan ta, jala gabe pasu-pasu tu angka na mambege manang na manjaha hata i. marhite si  songon i, saut ma lomo ni roha ni Debata asa gabe sira dohot panondang hita di humaliang ta.
2. Gabe marmulia ma goar ni Tuhan. Halak na manangihon panindangion i gabe mangantusi holong ni Debata huhut gabe porsea tu haburjuon ni Debata. Marhite i, dapaotan pasu-pasu jala haluaon ma ibana. On ma na pasonang roha ni Debata, ai holong do roha ni Debata tu ganup jolma asa dapotan haluaon tu hangoluan na salelng ni leleng na. 
3. Lam godang do pasu-pasu jaloonta sian Debata marhite-hite panindangionta taringot holong ni Debata tu angka dongan ta. Di diok di Mat 13:12 “Ai tu ganup paradongan lehonon do jala pasuksuhon. Alai buaton ma sian na so paradongan na adong di ibana hian”. Dang tau mandok mauliate jala manindangi holong ni Debata, nasa na adong di ibana gabe marhaurangan (olo sian angka parsinadongan manang hasehatonna) ala ni i naeng ma nian manindangi asi ni roha ni Debata hita dibagasan roha na marsitutu, ai i do di halomohon Debata. Tabaritahon ma marhitehite hata manang guratan, tung dia pe tampahanna. Ta paherbang ma hata ni Debata di angka tingki ni ngolunta. Asa godang jolma na tarpasu-pasu, jala marmulia hata ni Debata

Godang do ragam ni panindangion ni Jolma taringot tu asi dohot holong ni Debata. Boi do marhite angka namasa di ngoluna sian ulaon nametmet manang nabalga. Boi sian angka na masa siganup ari, manang dipartingkian na tompu. Alai saluhutna i gabe mansingkopi ma i tu saluhut panindangionta.

Di ayat dua di dok asa di endeheon Ibana. Godang do cara ni jolma laho mandok mauliate tu Debata. Boi sian na manjamitahon hata ni Debat, panindangion sian hata manang guratan taringot tu denggan basa ni Jahowa, jala boi do muse sian angka ende. Ende ima hata na ni loguhon. Ende tu Debata boi do marragam rupa. Adong ende haporseaon, ende hamuliateon, ende harop ni roha, ende pangidoan, ende halalas ni roha, ende pajojorhon holong ni debata, ende Pujipujian, dohot angka na asing. Di pangido hata ni Debata hita halho mengendehon sangapna marhite-hite ayat on. Asa ganup na mambege endei i, gabe boi tarjou masuk tu hasangapon ni Debata.

Di ayat tolu di dok asa di pasangap ma Debata. Halak na olo pasangaphon Debata, patuduhon naung mananda holong ni Debata, dohot roha na marhamuliateon, mahaporusan situtu tu Debata. Tarlobi molo dung diattusi jala dihaposi ibana holan sada do parsigantungan na. Marhite i,  boi ma parsangaponna Debata di bagasan ngoluna. Dao do sian ibana angka roha na mandele. Dang gumalaput ibana mangalului pangurupion sian angka naso tinanda na. Di si di bereng si Davit si Goliath, di pasangap ibana do Debata, gabe boi dipatalu ibana si Goliath. Ai diparmudu-mudu Tondi i ido ibana, marhusori rohana laho marsaor dohot Debata. Marhite i do gabe raja na sangap di Davit. Suang songon i do si Simson, rade do rohana pasangap Debata. Ido umbahen margogo ibana laho mangalo angka musuna.

            Di ayat opat di dok : “Sisiri hamu ma Jahowa dohot hagogoonna i, tongtong ma lulu i hamu bohina”. On ma na gabe sada Kunci hamonangan ni si David sian angka musuna. Di sude panggulmitan ni ngoluna sai disisiri ibana do tahi ni Jahowa di bagasan ngoluna. Sai dapotan alus do ibana di angka sihol ni rohana, gabe taruli hamonangan ibana sian angka musuna. Dibagasan panghobasion ni si Musa, godang jumpangta hata na mandok: “dungoi, di dok Debata ma tu si Musa…”. 2 Musa 6: 1, 6, 12; 12:7;  7:1; 8:1; 9:1; 10:1 dohot angka nasing. Manisiri Jahowa lapatanna , mangalului lomo ni roha ni Debata di bagasan parngoluanta. Aha sipatupaonta asa pasonang roha ni Debata. Gabe alusan na do hita merhite-hite hatana naung adong hian di bukku ni Debata nabadia i. Asa mangolu hita di bagasan hataNa, di ramoti Tondi parbadia hita lao mangantusi lomo ni rohaNa. Asa tahasomalhon laho mangarimangi lomo ni roha ni Debata mamang ditingki na gogot manang di tingki na sonang. Asa tong satia hita laho mangihuthon lomo ni rohaNa. Marhite i ma boi hita mangulahon nasa ulaon na balga na marguna tu harajaon ni Debata dohot tu hajolmaon.

Di ayat onom di taringoti tu si Abraham dohot si Jakkob. Si Abraham ima naposo ni Debata. Satia jala nabonar do ngoluna. Dipasisi ibana na do hagiotna nasidiri asa laho patujolo hagiot ni Debata. Hasatiaonna tarida sian rade ni rohana halo manghauolhon anakhon na tu Debata. Di paingot do hita songon pomparan ni si Abraham. Asa taihuthon hasatiaonna, laho mangaleoan dirinta tu Debata. Di soadahon do dirina laho pajonjonghon hasangapon ni Debata di bagasan ngoluna. Si Jakkob, i ma jolma na pinillit ni Debata. Sian partubuna, si Esau do na gabe anak siahaan sian anggina  si Jakkob. Alai ala dang diargahon  ibana  hasiahaan na i, gabe dipillit Debata ma Sijakkob gabe siahaan sian hahana si Esau. Si Abraham dohot si Jakkob gabe sada tiruan na nilehon ni Debata tu saluhut jolma asa gabe jolma na satia jala mangargahon hadirionna  di jolo ni Debata.

III.       Hahonaan.

            Aha do sihamulatehononta tu Jawoba Debata?

Bibel mandok, ”Hamatean manggomgomi, binahen ni na sada ala ni pangalaosionna i.” Ala pinompar ni si Adam do hita, mardosa jala mate ma hita. (Rom 5:12, 14, 17) Alai, molo tahaporseai pelean tobusan ni Jesus, tadapot ma laba sian asi ni roha ni Jahowa. Bibel paboahon, ”Alai ganda pe dosa i, lam sumurung ma asi ni roha i. Asa songon na manggomgomi jolo dosa i mantat hamatean, songon i do nang asi ni roha i manggomgomi marhitehite hatigoran mangkorhon hangoluan na salelenglelengna marhite sian Jesus Kristus Tuhanta i.”​Rom 5:20, 21.

Disesa Jahowa do dosanta. Mandok mauliate ma hita tu Jahowa ala disesa dosanta. Ingkon marhamubaon ma hita jala marsitutu asa unang mangulahon dosa. (Jaha 1 Johannes 1:8, 9.) Dipatorang si Paulus do tu halak Kristen na miniahan taringot cara ni Jahowa manesa dosa. Ibana mandok, ”Nunga diroro hita sian gomgoman haholomon i, jala dipaunsat hita tubagasan harajaon ni Anak, haholongan ni rohana. Di bagasan Ibana do adong di hita haluaon i, i ma hasesaan ni angka dosa.” (Kol. 1:13, 14) Las do rohanta mandok mauliate jala mamuji Jahowa alani asi ni rohaNa. Ala disesa Jahowa dosanta, tajalo ma godang pasupasu. Boi ma hita mardame jala maraleale tu Debata. Sian mulai tubu, nunga mardosa jala musu ni Debata do hita. Si Paulus mandok, ”Dipadenggan Ibana hita tu Debata hinorhon ni parmate ni Anakna i, uju musuna dope hita.” (Rom 5:10) Alani tobusan, boi ma hita mardame jala maraleale tu Debata. Dipatorang si Paulus do taringot on tu halak  Kristen na miniahan, ”Dung dipintori hita dalan haporseaon, mardame ma hita dohot Debata marhitehite Tuhanta Jesus Kristus. Laos marhitehite Ibana do saut masuk hita tu asi ni roha, hajongjonganta nuaeng dalan haporseaon.” (Rom 5:1, 2) Mandok mauliate do hita ala boi maraleale tu Jahowa!

Tadapot pangurupion di tingki na pas. Dijujui si Paulus do hita martangiang tu Debata ganup tingki, ”asa dapot asi ni roha hita bahen pangurupion, di tingki halehetanna”. (Heb. 4:16b) Tingki marsitaonon, pangido ma pangurupion sian Jahowa. Dialusi do tangiangta ala holong rohaNa tu hita. Jotjot do Ibana mangurupi hita marhite dongan sahaporseaonta. Ala dialusi Jahowa tangiangta, ”pos rohanta mandok: Tuhan i do pangurupi di ahu, ndang mabiar ahu; aha ma bahenon ni jolma tu ahu”?​Heb. 13:6.

Tadapot pangapulion. Dilehon Jahowa do pangapulion tu hita tingki marsitaonon. (Ps. 51:19) Tingki marsitaonon halak Kristen di Tessalonik, si Paulus manurat, ”Apala Tuhanta Jesus Kristus dohot Debata Amanta, na mangkaholongi hita jala mangalehon apulapul, na mian tongtong, dohot pangkirimon na denggan sian asi ni roha i: Ibana ma mangapuli jala pahothon rohamuna di bagasan nasa ulaon.” (2 Tes. 2:16, 17) Las situtu do rohanta, Jahowa parasi roha mangkaholongi jala mamparrohahon hita!

Marpangkirimon tu hangoluan salelengna. Molo ndang alani Jahowa, ndang adong pangkirimonta ala mardosa dope hita. (Jaha Psalmen 49:8, 9.) Dilehon Jahowa do pangkirimon. Aha ma i? Jesus mandok, ”Ai on do dipangido roha ni Damang: Naeng ma dapotan hangoluan salelenglelengna ganup na marnida Anak i jala porsea di Ibana.” (Joh. 6:40) Alani asi ni roha ni Jahowa, marpangkirimon ma hita tu hangoluan salelengna. Si Paulus mandok, ”Ai nunga tarida asi ni roha ni Debata, sibahen haluaon ni saluhut jolma.” Amen