MINGGU PASKAH I 17 APRIL 2022 Evangelium Lukas 24 : 1-12

 

Nungnga Hehe Jesus

I.          Sibonsiri

Nunga hehe Jesus!!!! On do nagabe ojahan di Pesta Paskahta ditingkion. Pandohan “Nunga hehe Jesus” ndada be parhataan na imbaru digurithon i, ala sian 2000 taon na salpu pe, pandohan on nunga dibaritahon angka huria bona uju i. Asa molo disungkun hita, boasa hita porsea tu Jesus naung hehe i? Alusna, tontu sahali ala naung sahat tu hita barita i. Jala dohot hita manghaporseai barita haheheon i, nangpe so dohot hita gabe saksi mata. Alai molo ta uji muse mambahen sukkun-sukkun ; boasa sahat tu saonnari holan hita namarugamo Kristen na sian ragam ni ugamo na di portibion na porsea tu Jesus naung hehe i? Sotung, na holan turiturian sambing do barita i di nasida umbahen na so olo nasida dohot manghaporseai. Ido ra umbahen sahat tu saonnari on, sai adong dope angka arkheolog manang peneliti na sai marusaha laho mambuktihon “ndang tutu hehe Jesus”. Tarida do i sian pengalaman ni sahalak Jurnalis na margoar “Frank Morison” na marusaho mambahen penelitian laho mambuktihon na so tutu hehe Jesus. Dilului ibana do Jesus naung hehe i tu tanoman ni Jesus, dibahen ibana sude hapandeanna laho mambuktihon na so tutu hehe Jesus. Nian dang halak Kristen ibana, jala barita taringot tu Jesus i dietong do songon turiturian, mitos, legenda sambaing. Disangkapi ibana ma laho mambahen data sedetail mungkin, marhite fakta-fakta sejarah arkheolog, paboa memang dang tutu hehe Jesus. Dimulai ibanama manggurithon lembar demi lembar hasil ni penelitianna. Dipaboa ibana di tulisanna i angka fakta-fakta naung diteliti. Alai, ahama na masa? Disonma na so tuk hita umboto bagas ni dalan ni Debata. Di ujung ni penelitianna muba do panimbangion, pangarajumion penelitian ni si Morison taringot tu Jesus. Songon halak na so porsea hian di Jesus, jala na mangetong holan turiturian sambaing barita i, muba gabe sahalak peneliti, jurnalis, na manghaporseai Tuhan Jesus. Na so manghaporseai barita ni Jesus hian, muba gabe si ihuthon Kristus. Di kesimpulan ni penelitianna, di salah satu kutipan tulisan i didok ibana “Nunga hehe Jesus”. Panindangion ni si Morison on do nang, na binaritahon ni si Lukas di turpuk ta sadarion paboa tutu situtu do naung hehe Jesus.

 

 

II.        Hatorangan

1.         Boasa luluan muna namangolu di inganan ni angka na mate?

Dungkon mate tarpajal Tuhan Jesus, muba do haporseaon ni angka sisean i maradophon Jesus. Ai manigor martabuni do nasida jala mansohot sian hasomalanna. Ndang adongbe nanggo otik pangkirimon nasida taringot tu Jesus na ingkon hehe muse, songon naung tinonahonNa. Tung mandate situtu do nasida. Ndang margurasabe di roha nasida angka naung nihataan ni Jesus i. Sandok nunga marujung luhutna. Alai di horong ni angka parompuan na saimangihuthon Jesus, adong do pe semangat di nasida. Marhite i dungkon marujung Jesus, sai di paihut-ihut nasida do tudia bangke ni Jesus di tanom. Dunghon di boto nasida na di hinambor ni si Jusuf na sian Arimatea tanoman ni Jesus, marsangkapma nasida laho mamongoti tanoman i. Jala di ari jumahat dungkon mate Jesus, nunga dipature nasida angka nahushus ro di miak mir laho boanon nasidatu tanoman i (Luk. 23 : 56). Di ayat parjolo di turpuk jamita on, dipatorang do ; Alai di ari parjolo dung ari Sabbat, ro ma nasida mansai sogot tu tanoman i, mantat na hushus na pinature nasida (ay.1). Haroro ni angka parompuan laho paulihon bangke ni Jesus gabe bukti, paboa nang angka parompuan namangihuthon Jesus i pe, ndang be porsea na laho hehe Jesus. Sandok nunga marujung, jala tinggal kenangan nama i sude. Asa haroro nasida i, ndang sangkap laho manguduti angka naung tinonahon ni Jesus. Ndang sangkap dalan marsiadu laho manaksihon haheheon ni Jesus. Alai holan sebatas dalan laho paulihon bangke ni Jesus do, asa tung tama bangke i di tanoman i. Boi dohonon, songon dalan penghormatan parpudi nama i di roha nasida. Molo pola so adongbe na manghaporseai na ingkon hehe Jesus, songondiama udut ni haluaon naung pinatupaNa i ??? Di ayat 2-3 di dok ; Alai nunga digulang batu i sian tanoman i, jala ndang di si be bangke ni Tuhan Jesus. Molo di evangelium na asing, dipaboa do, ia na manggulang batu i, ima angka surusuruan na tuat sian banuaginjang (Mat 28:2). Nagabe sungkun-sungkun, boasa di gulang batu i? Asa boi do nuaeng Jesus haruar sian tanoman i? Di Evangelium Markus di baritahon, gabe sada diskusi na serius do di nasida taringot tu manang ise na boi sian nasida laho manggulang batu ni tanoman i (Markus. 16 : 3). Sian on boi antusanta, batu na ginulang (binukka) ni surusuruan i, ima songon dalan ni Tuhan Jesus dalan mangurupi angka parompuan I, asa tung boi nasida mamongoti tanoman i, jala marnida angka na masa i. Tung sari situtu ma Tuhanta i di angka parompuan i, ai ndang di pasombu Tuhan Jesus angka parompuan i, gabe sundat laho marnida namasa i. Dipatulus do sangkap nasida asa sangkap i paobaon jala paulion ni Debata hombar tu sangkapNa.

Dungkon di ida nasida namasa i, dinaso dapot nasida be bangke ni Tuhan Jesus, tung jut situtu do roha ni angka parompuan i (ay.4). Jala dung di ida nasida surusuruan i, gabe huhut nasida mabiar (5). Roha biar on, tubu secara alamiah sian hajolmaon. Taboto do, jotjot do di gombarhon haroro manang hataridaan ni angka surusuruan i, marhitehon rupa na saksak, na marlinang-linang, mardongan hamuliaon, Asa situasi si songon on, pasti do jolma na marnidasa gabe tarhalomong huhut mardongan biar. Barita ni surusuruan I mandok ; Ndang dison Ibana : Nunga dipahehe Ibana. Ingot hamuma na hinatahonNa (Ay. 6-7). Mangalului Jesus di inganan ni angka na mate, ima ulaon na so marguna, ulaon na so marimpola, ulaon na soada. Lapatanna, angka ulaon na siasia sambaing do i. Boasa dilului nasida Jesus di inganan ni namate? Ala memang, ndang porsea nasida di heheheon ni Jesus. Asa boi dohonon, tung marisuang do jala tudos na so marguna, na so marimpola, na so marniula, molo so porsea hita di Tuhan Jesus. Laos dohonontama, molo so porsea hita di Tuhan Jesus, tung ahape na taula, na dirohanta angka I boi mambahen hita sonang, tung na so marguna jala marniula do i. Garida pangkorhon ni angka na taula i, boi gabe pajut rohanta, mambahen hita mabiar, tahutan, marsak, ala so tuk gogonta, jala ndang hombar tu na di rohanta. Antong ahama do sipatupaon ni angka parompuan i asa gabe marguna jala marimpola haroro nasida i?

 

2.  Nunga Hehe Jesus, haporseaima hataNa jala baritahonma haheheonNa.

Di ayat na mangihut didok : Diingot nasidama hataNa I, jala mulak nasida sian tanoman i laho mamaritahon tu angka donganna paboa “Nunga hehe Jesus”. Ngolu na marimpola jala na marguna, ima molo mulak parompuan i tu dalan na pinatuduhon ni Jesus. Mulak sian tanoman, mulak sian ulaon na soada, mulak sian sangkap-sangkap ni roha, mulak sian naholom. Jala borhat tu ulaon na imbaru, borhat tu dalan na tiur, borhat tu dalan na denggan. Borhat laho mangeahi sangkap ni Tuhan Jesus. Aha do na pahothon roha ni angka parompuan i asa borhat manadingkon jutniroha, borhat manalpuhon lungun dohot arsak ni roha, borhat laho muba sian ngolu na digohi arsak tu ngolu nagok las ni roha dohot olop-olop? Ima marhite na manontong manghaporseai hata ni Tuhan Jesus. Bukti nyata di naung kosong tanoman i, huhut di barita na pinaboa ni suru-suruan i, gabe dalan laho papos roha nasida laho manghaporseai hata ni Jesus, paboa tutu  situtudo naung hehe Jesus. Barita haheheon i gabe margurasa di roha nasida. Laos i do na mangonjar roha nasida laho mamaritahon barita i tu angka sisean i. Ndang laos ditabunihon boti barita haheheon i. Alai tung di gogo do laho borhat manopot angka donganna. Asa donganna na tongon di songgopi naholom i, dohot umboto barita i asa nang nasidape ihut gabe muba manghaporseai Jesus naung hehe i. Alai aha do alus ni angka sisean na asing dungkon di paboa angka parompuan i luhut angka namasa i. Hira turiturian do angka hata i di roha nasida jala ndang dihaporseai (11). 2000 taon na salpu pe hape, nunga parjolo di pungka angka sisean i di mulana i, ndang manghaporseai paboa naung hehe Tuhan Jesus. Tudos songon angka ugamo na asing na adong di sandok portibion, na sahat tu saonnari nang porsea dope paboa naung hehe Tuhan Jesus. Songon angka peneliti, arkheolog na sai manguji jala patuduhon angka bukti paboa na holan turiturian sambing do haheheon i di roha nasida. Alai adong do tong sisean i ima siPetrus songon barita na diginjang taringot tu sahalak jurnalis na margoar “Frank Morison”, nang pe so manigor porsea si Petrus, manigor lao do ibana tu tanoman i, laho marnida bukti, fakta paboa na tutu hehe Tuhan Jesus (12). Nang si Petruspe dohot do marnida angka panindangion ni parompuan i, ia hinambor i nunga kosong, ndang disibe bangke ni Jesus, nunga hehe Ibana. Evangelium Lukas mandok : Longan do si Petrus marnida namasa i. Nian holan di mulana i do angka sisean i so manghaporseai naung hehe Tuhan Jesus. Dibarita namangihut muse, gabe dohot do angka sisean i manghaporseai barita “Nunga hehe Jesus”. Alai marhite sian barita ni si Lukas on, gabe boima idaonta gombaran/model ni angka na umbege barita haheheon i. Naparjolo : Rumang ni hadirion ni angka parompuan i. Dung di boto nasida namasa i, gabe mubama nasida porsea di hata ni Jesus, jala huhut borhat laho mamaritahon barita haheheon i. Paduahon: Rumang ni hadirion ni angka sisean na deba. Dung di bege nasida barita i, ndang manigor porsea nasida. Ala so dohot nasida marnida jala umbege barita ni surusuruan i. Ala so porsea nasida, ndang dohot nasida laho mamaritahonsa. Ala die tong do barita i, holan turirutian sambaing. Patoluhon : Rumang hadirion ni si Petrus. Ndang manigor di haporseai ibana barita ni angka parompuan i. Alai naeng di rohana, jolo idaonna, jolo pamanatonna, jolo ujionna, atik tutu do manang ndang barita i. Sian na tolu horong on, dohononta ma : Martua ma angka na porsea, atik pe so di ida (Joh. 20:29b).

 

III.       Hahonaan

Aha do patupaonta di naung parsidohot hita umbege barita haheheon ni Tuha Jesus di pesta paskah sadarion? Songon parrohaon ni angka parompuan i do hita? Manang songon parrohaon ni deba sian sisean i? Manang songon hadirion ni si Petrus? Tontu sahala, ragam do alus dohot reaksi ni jolma dina umbege barita “nunga hehe Jesus”. Buktina, sahat tu saonnari, holan hita parugamo Kristen dope naporsea paboa Tuhan Jesus nunga hehe sian hamatean, jala nunga hundul di siamun ni Debata. Sahat tu tikkion, sai marusaha do angka torop jolma, laho manulak barita haheheon i. marragam usaha dipatupa marhite penelitian, bukti dohot lan angka na asing, boama asa unang porsea jolma i di haheheon ni Tuhan Jesus. Asa unang porsea jolma i, paboa holan Jesus do sipalua. Alai ndang adong na tuk mangambat huaso barita haheheon ni Jesus i. Antong naengma tongtong porsea hita dibarita haheheon i, jala huhut parsidohot hita songon nabinahen ni angka parompuan i. Songon na tarsurat di Rom 10 : 9 “Ai malua ma ho molo diparhatopot pamanganmi Tuhan Jesus i huhut dihaporseai roham naung dipahehe Debata Ibana sian angka na mate”. Nunga bongot hita di pesta paskah sadarion, borhatma hita marbarita. Tabaritahonma haheheonNa i marhite angka ragam ni cara, metode. Boi do I marhite FB, WA, Video Youtobe, ulaon diakonia dohot lan angka na asing. Taingotma, sian sude angka ugamo na adong di hasiangan on, holan tanoman ni Jesus i do naung rumar (kosong). Ondo fakta secara ilmiah naporlu diboto saluhut jolma. Jala ondo fakta na mambahen ugamo Kristen marasing sian angka ugamo na asing. Ai hinambor ni Muhammad tong do di ingani bangke i tanomanna, Hinambor ni si Konfusiuspe tongdo di tanoman i bangkena. Jala tanoman ni Buddhape, tongdo di inganan i bangkena. Alai tanoman ni Jesus nunga rumar (kosong). Muhammad, Konfusius, Buddha, luhutna marujung di poti hamateanna do. Alai Tuhan Jesus nunga hehe jala mangolu di surgo, jala nasa huaso nunga dipasahat Ama i tu Ibana (Filipi 2 : 10-11). Nunga hehe Jesus i, beta ma borhat laho marbarita. Selamat Hari Paskah.