Ditangihon
Debatado Joujouni Naposona
I.
Patujolo
Molo disungkun di hita ise do Debata di
ngolunta, tontu marragam do angka alus ni jolma taringot tu sungkunsungkun on.
Jala molo nungnga tatanda Debata, marhite aha do patuduhononta partinandaanta
i. Molo holan mananda alai ndang mangulahon manang aha porlu do sungkunon, toho
do partinandaan i? Ala ni i, boi do hita marsiajar sian raja David namanurihon
ise do Debata jala aha do na diula ni Debata dibagasan parngoluanna. Boi do
hita mambuat parsiajaran sian turpuk on, laho patuduhon partinandaanta di Debata.
II.
Hatorangan
Ni Turpuk
Dibagasan
turpuk on dipatorang do taringot tu pengalaman ni raja David, i ma ditingki
porlu ibana pangurupion, diparrohahon Debata do ibana jala dapotna do holong
sian Tuhan i. 2 Samuel 22 manurihon ende pujian ni raja David ala ni sude
panggonggomi ni Debata dibagasan ngoluna. Nunga piga hali raja David dipalua
jala diurupi Debata sian angka alona, lumobi ma raja Saul. Dipuji ibana do
Debata ai Debata do partanobatoanna jala lombulombuna. Turpuk on boi do dibagi,
ima:
1. Naparjolo,
napatorangankon taringot tu ise do Debata dibagasan ngolu ni raja David.
Pengalaman ni raja David di turpuk on gabe mamboan ibana tu panandaion ni raja
David di Debata. Molo di raja David, Debata i ma dolok batu, sipalua,
partanobatoan, lombulombu, tanduk ni partuaon, parondingondingan, haporusan,
sipartumbak (ay. 2-3). Ndang na holan ala manjaha pustaha na badia raja David
umbahen na adong partinandaan ni ibana. Ndang na holan ala ni na dibege ibana
jamita taringot tu huaso ni Debata. Alai dihilala raja David do langsung
diparngoluan ni ngoluna umbahen sahat jala dirajumi ibana holong ni roha ni
Debata, gabe manghorhon partinandaan ni ibana di Debata. Holan dibagasan Debata
do jumping ni raja David angka sisongon on.
2. Napaduahon,
ima taringot tu aha do na diula ni Debata di tongatonga ni ngolu ni raja David
na gabe pembuktian taringot tu panandaon na i. Dipatorang do di ayat 4-7, ima
tagan di gora raja David goar ni Debata dipalua ibana sian musuna. Dihaliangi
ombak hamatean, sunge ni hajahaton, rante ni banua toru, jorgong ni hamatean.
Aha na masa di parngoluan ni raja David, gabe dalan ni Debata laho pautuduhon
huasoNa. Ala ni i ma di dokkon raja David di ayat 7, tagan targogot ibana di
tangihon Debata do joujou na.
3. Boha
do dibahen raja David asa mananda hita di Debata. Molo marhite turpuk on,
didokkon do di ayat 4 dohot ayat 7, ima dijou raja David do Debata. Parungkilon
ndang mambahen raja David gabe laho maninggalhon Debata alai gabe dalan di
ibana laho patang haporseaonna di Debata. Sian on ma tabereng, ndang
marpangusandean raja David di hasangaponni ibana nang pe raja ibana, alai
marhapsan tu Jahowa do ibana.
Aha do huroha na
secara spesifik na dialami ni raja David umbahen pola sai joujou ibana di goar
ni Debata, jala pola gabe di dokkon ibana dihaliangi ombak ni hamatean ibana?
(ay. 5-6). Molo taparrohahon di bindu 21, boi do berengonta ima masa do haleon
potir tolu taon lelengna (21:1), masa do parporangan halak Pilistim dompak
halak Israel (21:15), jala talu do dibahen nasida si Goliat, jala angka halak na
ganjang onom be jarijari ni tangan dohot patna (21:19-10), jala sian tangan ni
si Saul (1 Samuel 24:17-19). Sude na i ala nipangurupuion ni Debata
ditongatonga ni raja David. Ndang dipasombu Debata nasida dipalealea bangso na
asing. Ala gomos do ditiop halak i haporseaon tu Debata, gabe manghorhon
hamonangon ma nasida. Ala ni sude pengalaman na uli i, dipuji jala diendehon
raja David ma pujipujiann tau pasangap goar ni Tuhan i.
III.
Sipahusorhusoron
1. Ise
do Debata di ngolunta
Ingkon adong do
partinandaan di hita taringot ise do Debata di ngolunta. Partinandaanta i unang
ma nian tadapot holan sian mambege jamita manang parsiajaran agama. Alai
dibagasan ngolunta siapari ingkon mardalan jala tapangasahon do Tuhan i laho
mangadopi sude gulmit ni ngolu on. Sian i, idaonta ma ise do Debata di
ngolunta, ta hilala jala molo tajamitahon holong ni Tuhan i, gabe jamita na
mangolu ma i dibagasan pardalanan ni ngolunta. Godang do angka sipaulionta di
tongatonga ni parngoluanta, jala godang do na maol, tarlumobi ma molo mambaritahon
na sintong hita sai adong do namanjungkati hita. Ala ni i ma, marhite
pengalaman ni raja David disosoi do hita asa marpangusandean hita di huaso ni
Debata. Ingkon tarimangi do aha do na boi diulahon Debata marhite ngolunta
nangpe maol sitaonon. Molo dapotan parungkilon hita, tajou ma goar ni Debata,
marpangusandeaon tu Ibana ma hita asa dapotan hangoluan hita.
2. Aha
do ulahononta laho pautuduhon panandaanta di Debata
Ala nunga dirajumi raja David balga ni Debata jala nunga ditanda ibana Debata secara langsung, dipatudu ibana ma partinandaanna i marhite ende pujipujian laho pasangaphon Tuhan i. Nang di hita angka naporsea pe ingkon do patuduhononta partinandaanta i diadopan ni Debata marhite angka ende, musik, panghobasion, tangiang dohot angka lan naasing. Adong do jolma napatuduhon partinandaanna marhite ulaon panghobasion tu angka napogos. Adong na patuduhon partinandaanna marhite parkarejoanna, adong napatuduhon partinandaanna marhite ende dohot musik, adong marhite bangunan, lompalompa, pahean na uli, suansuanan, pamarentaan nang angka lan naasing. Aha ma na tau ulahononta sadarion laho pasangapon goar ni Tuhan i. Sitongka ma nian molo gabe ta tundali aha naung ni ula ni Debata. Ingkon ingot do hita ai nunga godang na diula ni Debata di ngolunta. Molo nunga tapatuduhon partinandaanta i, tatogutogu jala tatogihon ma angka donganta naso mananda Debata jala naso olo dope laho patuduhon haporseaon manang partinandaanna di Debata. Asa rap marlasniroha hita laho mamujimuji holong ni rohaNa. Parsidohot ma hita laho mangurupi jala manghobasi di ladang ni Tuhan i. Amen.
Post a Comment