MINGGU I DUNG TRINITATIS 11 JUNI 2023 Mateus 9 : 18 – 26 - Mundosaragi

 Haporseaon I Do Na Paluahon

I.     Sibonsiri

Haporseaon (bahasa Heber: emun, emunah dohot he-emin) di 1 Musa 15:6 didok “Jadi porsea ma si Abram di Jahowa, gabe hatigoranna do i dietong Jahowa”,  (bahas Gorik: Pisteou) di Heber 11:1 didok “Alai anggo Haporseaon i pos ni roha do i di angka sihirimon, jala pamotoan na tontu taringot tu na so niida”. Songon dia do hataridaan ni halak na marhaporseaon? Marhite Haporseaon adong panghirimon na mangolu (Lukas 1:37 “Ai ndang adong na so tarpatupa Debata”), marhite Haporseaon gabe boi malum sian ragam ni parsahiton, marhite Haporseaon gabe boi malua sian hagogoon ni sibolis, marhite Haporseaon gabe boi margogo, manahan jala monang maralohon angka sitaonon manang parungkilon di portibion. Menurut ni si Jakobus, cara na paling ampuh manang efektif laho patuduhon haporseaon ima marhite pangulaon. Jakobus 2:17 didok “Haporseaon i pe songon i do, anggo so adong pangulaonna, naung mate do hadirionna”.

Turpuk jamita on  ima hataridaan ni halak namarhaporseaon tu Tuhan Jesus  Kristus, parjolo panghorhon ni haporseaon ni sada halak na sangap ima si Jairus: Uluan dibagas Joro gabe boi mulak mangolu boruna. Paduahon, panghorhon ni haporseaon sada boru-boru na tamanangon bulanon leleng ni sampulu dua taon gabe boi malum sian parsahitonna. Ido na naeng siuhalonta sian turpuk ni jamita di Minggu I Dung Trinitatis sian Mateus 9:18-26.

II.   Hatorangan Ni Turpuk

            Turpuk ni jamita on adong 3 bagian na sangat penting naeng sipatorangon sian Mateus 9:18-26 ima; Parjolo, ro ma sada halak na sangap ima si Jairus: Uluan dibagas Joro marsomba tu Tuhan Jesus Kristus (ayat 18). Paduahon, Nanggo pala ulosNa hujama, mangolu ma ahu. Haporseaonmi do na pangoluhon ho (ayat 21-22). Patoluhon, Tuhan Jesus Kristus sahat di bagas ni na sangap i laho Paheheon boruna naung mate (ayat 23-25).

1.      Ro sada halak na sangap ima si Jairus: Uluan dibagas Joro marsomba tu Tuhan Jesus Kristus.

Di turpuk ni jamita on disurathon uju manghatai dope Tuhan Jesus Kristus dohot angka siseanNa dohot angka natorop, pintor ro ma sada halak na sangap ima si Jairus: Uluan dibagas Joro marsomba tu Tuhan Jesus Kristus, huhut ma didok: “Ipe mate borungku, alai ro ma ho mangampehon tanganMu tu ibana, asa sumuang mangolu” (ayat 18b). Uluan ni bagas Joro i mangido tu Tuhan Jesus Kristus asa ro tu jabuna. Jala didok ibana muse tu Tuhan Jesus Kristus asa diampehon tanganNa tu boruna i, jala na porsea do si Jairus na mulak mangolu do boruna i. Marhite haporseaon na AKTIF ndang na pasif gabe manghorhon panombaon na sintong tu Tuhan Jesus Kristus, porsea do si Jairus, na marhuaso do Tuhan Jesus Kristus, pangoluhon boruna naung mate i. Porsea situtu do si Jairus tu Tuhan Jesus Kristus, molo diampehon tangan-Na na gok huaso, gogo dohot habalgaon gabe terjadi halongangan boi mulak mangolu boruna naung mate i. Songon na tarsurat di Ulaon ni Apostel 16:31 didok “Haporseai ma Tuhan Jesus asa malua ho dohot isi ni bagasmi”. Na naeng dohonon ni turpuk ni jamita on, holan marhite haporseaon ni si Jairus tu huaso, hagogoon dohot habalgaon ni Tuhan Jesus Kristus gabe boi mulak mangolu boruna naung mate i.

 

2.      Nanggo pala ulos-Na hujama, mangolu ma ahu. Haporseaonmi do na pangoluhon ho.

Dipardalanan ni Jesus rap dohot sisean-Na laho tu jabu ni si Jairus: Uluan dibagas Joro i, dung i tongon ma adong sada boru-boru na tamanangon bulanon leleng ni sampulu dua taon, na ro sian pudi-Na manjama rambu ni ulos-Na. Ai ninna di bagasan roha ni boru-boru na tamanangon bulanon leleng ni sampulu dua taon i mandok, “Nanggo pala ulos-Na hujama, mangolu ma ahu” (ayat 21). Tung porsea situtu do boru-boru i tu huaso, hagogoon dohot habalgaon ni Tuhan Jesus Kristus laho pamalumhon ibana sian parsahitonna. Dung i humusor ma Jesus, dibereng ma boru-boru i, laos ninna ma: “Pos ma roham ale inang, haporseaonmi do na pangoluhon ho” (ayat 22). Dung i hipas ma boru-boru i olat ni na sangombas i. Di Lukas 17:19 didok “Haporseaonmi do paluahon ho”, Aha do lapatan ni hata i? On do: “Huaso, Hagogoon dohot Habalgaon ni Tuhan Jesus Kristus na tahaporseai, i do na Paluahon, na Pamonanghon jala na Pamalumhon. Na porsea situtu do boru-boru i tu Tuhan Jesus Kristus, na marhuaso do Jesus laho pamalumhon ibana sian parsahitonna.3.      Tuhan Jesus Kristus sahat dibagas ni na sangap i laho Paheheon boruna naung mate i.

Asa dung sahat Jesus ro di bagas ni na sangap i, diida ma angka pangondasi dohot natorop oruk manang gaor alani naung mate do boru ni si Jairus: Uluan dibagas Joro i (ayat 23). Boi sajo do natorop i gaor, marsisungkunan mandok laho marhua dope Ibana ro tu jabu i, molo nunga mate do boruna i? Aha do na boi diulahon Ibana? Jadi didok Jesus ma tu nasida: “Laho ma hamu, ai ndada na mate si Betet on; na modom do” (ayat 24). Mambege i natorop i gabe diparengkeli nasida do Tuhan Jesus. Menurut pamingkirion nasida ndang mungkin be boi mulak mangolu naung mate. Ndang porsea nasida di huaso ni Tuhan Jesus na boi patupahon halongangan. Asa dung dipalaho natorop i, bongot ma Jesus, ditangkup ma tanganna, jadi mulak mangolu ma boru-boru i (ayat 25). On ma halongangan bolon, holan Tuhan Jesus do na boi pamasaon mulak mangolu naung mate. Huaso sian dia doi dijalo Tuhan Jesus? Didok di Mateus 28:18 “Nunga sahat tu Ahu nasa huaso na di banua ginjang dohot na di tano on”. On ma naso mungkin di jolma alai mungkin do di Tuhan Jesus. Didok di Lukas 1:37 “Ai ndang adong na so tarpatupa Debata”. Na naeng dohonon ni turpuk ni jamita on, molo porsea hita tu Tuhan Jesus Kristus, ndang adong na so tarpatupa ni Tuhan Jesus, jala ndang hamatean i ujung ni angka na  porsea, alai adong do hangoluan na saleleng-lelengna. Didok di Johannes 5:24 “Manang ise na porsea di Ahu, nunga sahat tu ibana hangoluan na saleleng-lelengna; nunga taripar ibana sian hamatean tu hangoluan”.

 

III.      Hahonaan

1. Haporseai jala hangoluhon ma Huaso, Hagogoon dohot Habalgaon ni Tuhan Jesus Kristus di bagasan ngolum, ai i do na Paluahon, Pamonanghon jala Pamalumhon ho sian nasa sitaonon, parungkilon, parsahiton manang ragam ni panosak ni portibion (Bnd. Lukas 17:19).

2. Sahit di Zaman saonari: Unang marpangusandean ho tu pikiranmu dohot tu gogom sandiri maralohon gulmit ni ngolum di portibion alai marpangunsandean ma hita jala mangasahon Goar ni Tuhan Jesus Kristus asa dipalua jala dipamalum hita (Bnd. Poda 3:5-6).

3. Hita na porsea angka naung manjalo huhut manghangoluhon haluaon dohot hahipason marhite Goar ni Jesus Kristus, asa parsidohot ma hita mamaritahon barita haluaon dohot hahipason i tu sandok portibion, gabe siboan misi ni Tuhan Jesus Kristus ma hita asa sandok jolma di portibion gabe porsea tu Tuhan Jesus Kristus (Bnd. Mateus 28:19-20).

4. Urupi jala paingot angka jolma na sai tongtong tinggal di bagasan haliluon na sai tongtong mangasahon jala mangalului gogo na sian portibion laho pamalumhon manang paluahon ibana sian sitaonon manang parungkilon di portibion. Porsea ma hita di Huaso, Hagogoon dohot Habalgaon ni Tuhan Jesus Kristus na Pamalumhon hita sian parsahiton dohot na Pangoluhon hita sian hamatean (Bnd. Ulaon ni Apostel 16:31). God Bless! Amen!