Mangihuthon Jesus Mamorsan Silang
Patujolo
Adong sada sarito, di sada
partingkian adong sasahalak na manghatai dohot surusuruan ni Debata. Di sungkun
surusuruan ni Debata tu sasahalak on, ninna, satia do ho tu Tuhan Jesus Kristus?
Dialusi sasahalak on “satia do ahu sahat ro di ujung ni ngolungku. Molo satia
do ho tu Ibana, olo do ho husuru? Ninna surusuruan ni Debata mandok ibana. Dialusi
sasahalak on “ aha nanaeng suruonmu ahu? Ninna sasahalak on. Disi adong silang
ganjangna 2 meter, jala lebarna 2 meter. Olo do ho mamorsan silang i,
manaripari batang sunge annon di joloan? Dibereng sasahalak on, ndang borat
silang i, sian hau do silang i, pasti do ringan silang i. Tegas didok sasahalak
on mangalusi sungkunsungkun surusuruan i, didok ibana “ olo do ahu. Jadi
diporsan sasahalak on ma silang i. Satonga jom ibana mamorsan silang on, mansai
borat dihilala sasahalak on silang i. Hirim rohana anggiat ma adong huta asa
mangido aek sitiotio ahu, inna dibagasan rohana. Adong ma sada huta di bereng
ibana, las situtu rohana. Ro ma ibana mandapothon sada bagas, di tuktuhi ibana
ma bagas on. Haruar ma pangisi ni bagas i. Didok sasahalak on “boi do ahu
mangido aek sitiositio, inang?” Nunga mauas panghilalaanku. Dialusi inang i ”
Boi amang, satongkin asa hubuat, masuk ma hamu amang tu bagas”. Mauliate ma
inang dison ma ahu. Di alap inang i ma aek sitiotio, jala dipasahat tu sasahalak.
Mansai las rohana dung diinum ibana aek i. Didok ibana tu
inang i “mauliate ma inang”. Dung i didok ibana “boi do ahu maminjam gargaji
muna inang?” Laho tu aha amang? Didok inang i. Laho manggargaji silang on,
ninna sasahalak on. Satongkin da amang asa hubuat. Dung dipasahat inang gargaji
i, digargaji sasahalak on ma 25 cm silang i, asa ringan pingkiranna. Dung i
dipasahat sasahalak on ma gargaji on, mandok mauliate ma ibana huhut marhehean
nauli ma ibana tu nampuna bagas i. Dipardalanan diporsan sasahalak on, silang i
tong sarupa boratna, atik pe nunga dipotong ibana 25 cm. Dihirim rohana adong
ma sada huta, asa boi ibana mangido aek sitiotio, huhut mangido gargaji. Adong
ma dibereng ibana sada huta, diebati ibana sada bagas, huhut mangido aek sititotio
dohot gargaji. Dung dijalo ibana gargaji sian pangisi ni bagas i, digargaji
ibana 25 cm silang i. Dihirim rohana asa ringan diporsan ibana silang i. Dung
mandok mauliate jala marheheaon nauli ibana tu pangisi ni bagas i, diporsan
ibana silang i. Alai tong sarupa boratna, ndang na hurang. Atik pe nunga 25 cm
di potong ibana silang i. Dihirim rohana adong ma huta asa dipangido ibana aek
sitiotio dohot gargaji. Hampir sajom ma ibana mamorsan silang i. Adong sada
huta dibereng ibana, jala dituktuhi ibana sada bagas, laho mangido aek sitiotio
dohot gargaji. Dung dipasahat pangisi ni bagas i aek sitiositio dohot gargaji,
di gargaji ibana ma 50 cm silang i. pasti lebih ringan inna rohana. Dung mandok
mauliate tu pangisi ni bagas i huhut marhehean nauli ibana, diporsan ibana silang
i. Alai tong sarupa boratna, ndang na moru. Dina mamorsan silang i ibana,
dibereng ibana adong sunge, songon pandohan i surusuruan i. Didapothon
surusuruan i ma ibana, jala didok surusuruan i, mauliate hudok tu ho, nunga
diporsan ho silang i sahat tuson. Saonnari bahen ma silang i gabe titi, asa boi
ho manaripari batang aek on. Lebar ni sunge on 1,5 meter didok surusuruan on,
silang i 2 meter, boi do ho manaripari batang aek i marhite silang i, ninna
surusuruan mandok sasahalak on. Alai diingot ibana, nunga digargaji ibana
silang i. 25 cm na parjolo, 25 cm na paduahon, 50 cm na patoluhon. Total 100 cm
manang sameter nunga di gargaji ibana silang i. Beha na ma on, inna rohana.
Didok ibana tu surusuruan i, ndang boi hubahen silang on gabe titi asa boi ahu
manaripari batang aek on. Boasa? Didok alus ni surusuruan i. Ditonga dalan
nangkin bereng sada huta, jala nunga hugargaji sameter silang i. Boasa gargaji
on mu? Dialusi surusuruan i. Siala mansai borat huporsan silang i. Umbege i ro
ma rimas ni surusuruan i “nangkin dimula na i didok ho do boi ho mamorsan
silang i manaripari batang aek i! Marhapatean tu ho ma saluhutna na di ula mi!”
Ninna surusuruan i mandok ibana. Manetek ma iluna huhut manungkap ma ibana
manolsoli pangalahona. Martangiang ibana tu Tuhan i siala saluhutna, jala
dipasahat asi rohaNa tu Ibana, siala nunga ndang satia ibana laho mamorsan
silang i sahat ro di ujungna. Sian sarito na hupaandar, tangkas asa tongtong
hita satia mamorsan silang i asa tama hita gabe siseanNa. Songon dia do ulaning
asa tama hita gabe siseanNa. Tapaihutihut ma hatorangan ni turpuk on.
II. Hatorangan Ni Turpuk
1. Ayat 32 – 33
Di ayat on dipasahat Tuhan Jesus ima sosososo asa tongtong
ganup jolma manghatindangkon Ibana di jolo ni ganup jolma. Unang jolma i, na
mangokui Ibana di jolo ni Damang dohot di jolo ni jolma. Molo disoadahon jolma
i Ibana, ndang na mandok halna metmet hasalaan na i, alai Jesus mandok adong
hubungan na erat Bapa dohot Jesus. Manang ise jolma na patupahon hasalaan tu
Jesus, tongtong sala di jolo ni Damang.
2. Ayat 34 – 36
Hata “podang” di ayat 34 on dipatudos tu Haroro ni Tuhan
Jesus tu portibion, ima manirang angka parsalisian di ganup jolma diportibion.
Parsalisian i ingkon boi do dituntashon dohot denggan marhite dame dohot holong
na sian Tuhan i. Molo tongtong dope adong “podang” dibagasan pamatangta, aha ma
labatta gabe siihuthonon ni Kristus. Sarupa do hita dohot pangalaho na adong
diportibion. Didok di Heber 4 : 12 “Ai mangolu do hata ni Debata jala mahuaso.
Umtajom do i sian podang sidua baba. Boi do i manusuk jala manirang hosa sian daging,
sumsum sian holiholi. Jala boi patuduhon na adong di roha dohot na adong di pingkiranta”.
Pandohan di ayat 35, digurithon di Mikha 7 : 6 ”Ai anak i paotootohon amana, boru
i hehe dompak inana, parumaen dompak simatuana boru, musu ni baoa i ima angka halak
donganna sajabu”. Ayat 35 mandok Tuhan Jesus dibaritahon tu sada kelompok dohot
keluarga, adong do na porsea dohot na so porsea di Ibana. Siala parjumpaan
dohot Ibana, jolma manisia ingkon mamillit mangihuthon Ibana manang na ndang
mangihuthon Ibana.
Adong 2 horong ni jolma, ma mangihuthon Ibana dohot ndang
mangihuthon Ibana. Boasaadong na pabadahon anak tu amana? Siala nasida porsea
tu Jesus, siala anak boru i manjaloJesus, jala inana ndang manjalo Jesus. Boasa
disirang parumaen tu simatuana boru? Sialaparumaen na manjalo Kristus, jala
simatuana boru ndang manjalo Kristus. Di Lukas 12 : 51didok “Na dirimpu
rohamuna do, na laho mangalehon dame Ahu tu atas tano on, umbahen na ro? Nda
tung, hudok ma di hamu: Panirangon do tahe”. Ido umbahen didok di ayat 36 “Jala
tung donganna sajabu gabe musu ni jolma i”.
3. Ayat 37
Molo adong sasahalak nanaeng mangihuthon Kristus, ingkon parjolo do Ibana sian na asing manang na ise pe i. Siala hubungan dohot Ibana ingkon lebih erat dohot “intim” sian hubungan dohot donganna sa jabu.
4.
Ayat 38
Mamorsan Silang ima gombaran sitaonon na ingkon disirang sian jolma na asing. Manang aha pe na masa dibagasan ngolunts ingkon boi hita manahan huhut mangulahon lomo ni rohaNa. Ayat 38 on na marlapatan sasahalak na tama gabe siseanNa ima na olo mamorsan silang i di bagasan ngoluna, jala olo disirang sian na asing.
5. Ayat 39
Na marlapatan di bagasan ngolunta on ingkon parjolo Ibana sa
dapotan hangoluan salelenglelengna hita saluhutna. Adong do jolma siala ala ni
hasangapon jabatan dohot angka lan na asing di portibi gabe “digadis”
haporseaonna gabe marbalik tu ugamo na asing. Taingot do si Munson - Lyman
dohot Apostel ni halak Batak si Nommensen na sumeahon
ngoluna ala ni Ibana, laho marbarita nauli, gabe mate martir nasida. Ringkot do
satia dibagasan Ibana.
III. Sipahusorhusoron
1. Manahan ma hita manang aha pe na
masa (BE. No. 149 : 3) di saluhut panggulmitningolunta
2. Satia ma hita mangihuthon Ibana
mamorsan Silang i sahat ro di ujung ni ngolunta
3. Josua 24 : 15d “Alai anggo ahu dohot
donganhu sajabu, ingkon Jahowa do oloan nami”. Taoloi ma Ibana diganup ulaonta,
di ganup ngolunta sahat ro di ujung ni ngolunta. Amen
Post a Comment