Masipauliulian Di Na Maimaima Haroro Ni Tuhan
Di sada tingki dung borngin, ro do sahalak ama mangalap (menjemput) anakna tu gareja. Mangihuthon perkiraan ni amanta i nunga hira sae be anakna i marguru koor naposo, ala nunga pukul 22.00 wib. Dung sahat amanta i di lambung gareja i diparkirhon ma mobilna di tempat parkir na adong di si. Sian bagas mobilna i dibereng do anakna i jongjong tardingkan pintu ni gareja i, alai ndang sadar anakna i naung ro bapana manomu ibana. Dipahohom amanta i do di bagas mobil i huhut dianahon sadia leleng do asa lulululu anakna i di panomu (jemputan) ni amana. Pola sampe 30 menit amanta i mamarohahon, dibereng sai momar do anakna i paidaida angka donganna. Dipangolu amanta i ma klakson ni mobilna dalan manait roha (menarik perhatian) ni anakna i, alai tong do ndang dirorahon. Dipangolu ma muse klaksonna songon tanda naung ro do amana i mangalapsa, alai tong ndang dibege. Diklakson ma muse sahalinari huhut manggora amanta i, dung pe i asa tarsadar anakna i naung ro do hape amana. Dung didapothon anakna i, manjonokhon mobil i disungkun ma, “Sian dia do ho bapa, nunga leleng iba tarpaima” ninna. “40 menit na salpu nunga di son bapa, alai ndang diparrohahon ho”, ninna amanta i mangalusi. Tarsonggot do anakna i umbege alus ni bapana i.
Angka dongan tudos ianakkon ni amanta i ma jotjot ngolunta, na sai lalap paberengbereng dongan dohot sibuk/lalap di ulaonta sandiri, ujungna ndang lao be rohanta marningot ari ni Tuhan i. Ndang sadar hita hape naung sai diparrohahon amanta Debata do pangalahonta.
Ndang na mura asa sai tongtong marbulus ni roha (tetap memusatkan perhatian) paimaima haroroNa, ala mansai godang na di portibi on na sai tapingkirhon dohot taangananganhon. Dung i jotjot do siala hasonangan dohot dame ni rohanta, gabe pamenakhu ngolunta. Dibahen na pasonanghu manang na pasibukhu i ma mambahen gabe tahalupahon (kita kesampingkan) taringot tu na paingotingot haroroNa. Siala ni i, jamita on manungguli hita, asa unang be tarlalap, unang tarpodom songon halak na leban. Alai totop ma hita marjagajaga huhut sadar paboa di sada tingki, sian naso panagamanta pasti ro do Ibana.
Boha do bahenonta asa totop marjagajaga, hape so taboto sadihari harorona?. Aha do siulahononta?. Angka dongan, sasintongna ndang be soal “aha do sijagahononta?” unok ni parsoalan, alai “boha do na marjagajaga?”, i do. Tangkas do diboto ruas ni huria Tesalonika unok ni parsoalan on. Diboto nasida do paboa nunga jonok ari ni Tuhan i, jala boha parroNa (ayt.1-2), alai busisaon (gelisah) do nasida ala so diboto hapastianna. Ndang holan halak kristen Tesalonika na songon i, alai angka tokoh kristen di ari na parpudi on pe torop do na suman tusi. Molo tapaihutihut do pardalan ni hakristenon, ndang otik be tokoh kristen na marusaho manjujur kepastian ni ari haroro ni Tuhan Jesus na paduahalihon i, nang pe borhat holan sian informasi dohot petunjuk na minim situtu. Nang pe so adong kepastian hasintongan ni panjujurion i, alai torop do tong halak kristen na manghaporseaisa. Memang mangihuthon pingkiranta, denggan ma nian tutu molo adong kepastian di hita, ujungna ndang sai torus be busisaon bahenon ni naso pasti i. Alai boha, nunga sintong be cara marjagajaga ni halak kristen na sai manjujur ari haroroNa i?.
Apostel Paulus mandok; Ndang!. Ala saboha pe dibahen na malo manjujur ari haroro ni Tuhan i, ndang hea marhasil i. Toho do tutu molo taharhari do ragam panjujuron ni angka na hea manjujur ari haroro ni Tuhan i, nanggo sada pe ndang adong na sintong. Isarana; sekte Leeds na di Inggris mandok taon 1806 ro nama ajal ni hasiangan on, ternyata meleset do. Sekte Mirelis mandok di 23 April 1843, meleset do. Sekte Mormon mandok di Desember 1891 nama, tong meleset. Komet Halley mandok di taon 1910 do, tong meleset. Sekte Coalition mandok di 31 Desember 1982 nama, tong meleset. Sekte Gerbang Surga muse mandok di 26 Maret 1997 nama, tong meleset. Si Nostradamus mandok di taon 1999 nama, tong sala. Sekte Y2K mandok di taon 2000 nama, meleset tong. Ro muse si Noone di 5 Mei 2000 do, tong sala. Songon i Gereja Rhema Pentakosta Filadefia Balendah Bandung Selatan niuluhon ni Pdt. Mangapin Sibuea mandok tgl 10 Nopember 203 do bisikan ni Tondi i, ternyata salah. Ronald Weinland mandok di taon 2008 do kiamat, tong sala. Na parpudi Harold Camping mandok 21 Oktober 2011 do, tong meleset.
Mangihuthon Apostel Paulus ia angka usaha sisongon i ndang holan patubuhon harugian materi, alai laos dohot do rugi di partondion. Siala i ma ndang adong gunana jujuronta i, ai songon panangko borngin do harorona, tompu ndang adong na umbotosa. Ala tompu do haroroNa, songon pambebeon tu na gabegabean do ndang adong haporusanna (ayt.2-3; Pat. Jer.4:31). Jadi nang pe sai tajujuri ariari i, ndang tolap hita pasidinghon naso pasti i. Alai nang pe songon i ndang pola ringkot hita busisaon, na ringkot marjagajaga be ma manang sadihari pe taho parrona.
Tamba ni na pasingothon angka halak na busisaon binahen ni ari na so pasti i, tong do dipasingot ibana angka halak na so parduli di haroro ni Tuhan i. Didok ibana, “molo didok halak, dame do jala mora so adong, di si ma tompu tahop tu nasida hamagoan i…” (ayt.2). Dibahen i ma asa saluhut hita masipaingotan jala masipauliulian, asa unang tarpodom songon halak sileban, asa unang pasonanghu manang sabalikna gabe busisaon (ayt.11). Ala anak hatiuron jala anak arian do hita, antong marjagajaga na sintong ima marroha na torang (ayt.5-6),
Amen!
Post a Comment