Maimaima Di Langit Naimbaru Dohot Tano Naimbaru
Pamuhai
Songon naung itaboto, ia buku ni panurirang Jesaya marisi tolu bagian, ima: Proto Jesaya (Bindu 1-39) na patorangkon boaboa ni dosa bangso Israel tu adopan ni Debata Jahowa marhite panghataion nang songoni parulaonna nasida. Deutro Jesaya (Bindu 40-55), na patorangkon: ngolu ni bangso Israel uju di tano habuangan Babel, jala masa pe i alani dosa nasida do tu Debata Jahowa, laos marhite na masa i di bagasan ngolu na so marpinghirimon do nasida. Trito Jesaya (Bindu 56-66), na patorangkon: parngoluon ni bangso dung ruar sian tano habuangan Babel, jala mulak do nasida tu Jerusalem. Udutna, adong do dipasahat Debata angka bagabagaNa na patupahon las ni roha tu bangso i.
Alani i, ia turpukta on ima masuk do tu horong na patoluhon, na pabotohon tu hita situasi ni bangso i nunga ruar sian tano habuangan Babel. Marpardomuan songon naung ni dok nangkin, adong do angka bagabaga ni Debata tu bangso i. Angka aha ma bagabaga ni Debata tu bangso i? Boi dope itahangoluhon bagabaga ni Debata i tu hita na mangolu di partingkian sinuaeng on? Songon dia situasi na pinatupa ni Debata di sososo ni bagabaga na pinasahatNa i? Angka ise do na boi mandai bagabaga ni Debata i?
Ima sungkunsungkun na boi itabereng sian turpuk on laho patanghon dohot paradehon dirinta di bagabagaNa i.
Hatorangan ni Turpuk
Andorang so masuhanta tu tu ayat ni ojahan ni jamitanta, denggan na itaida ma jo tu bindu 65: 1-16. Disi dipatorang do angka uhum na masa tu halak na mardosa, jala jambar haluaon tu angka halak partigor, laos diuduti ma hatuaon tu angka naposo ni Debata (ay. 15). Ia partigor, boi do dohononta saurdot do i dohot naposo ni Debata. Ala angka partigor masuk do i tu horong ni angka naposo ni Debata. Marhite i, boi do dohononta ia turpukta on ima udut ni sian ayat na sebelumna. Alani, boi ma itabahen pandapot, ida turpukta on dikhususkan tu angka partigor manang naposo ni Debata.
Ay. 17-19. Langit dohot tano na imbaru mangkorhon las ni roha di jolma nang di Debata. Debata sandiri do na manompa langit dohot tano naimbaru i, jala dipatorang do na so ingoton be angka na parjolo i, jala ndang ingoton manang tarsunggul be roha ni Debate ima: angka hadosaon naung ni ula bangso i. Laos alani i, masa ma angka las ni roha di angka partigor manang angka naposo ni Debata i, jala salelenglelengna do i masa saluhutna, ndada parsatongkinan. Jala, langit dohot tano na imbaru i, Debata sandiri do patupahon i, Ibana do na manompa i saluhutna. Di angka naung tinompa ni Debata langit dohot tano na imbaru las do roha ni Debata marnida saluhutna i, tarmasuk angka las ni roha na masa tu angka partigor manang naposo ni Debata i. Ndang adong angka soara partangisan manang soara anggukangguk.
Songon itaboto, molo masa soara anggukangguk dohot partangisan manggombarhon angka arsak ni roha do i. Ndada mungkin jolma manggukangguk molo las roha, pasti do i na tongon di bagasan lungun ni roha. Alai, ndang masa be i molo di tano dohot langit naimbaru na tinompa ni Debata I, parolopolopon nama nama na masa.
Ay. 20-23. Manghasaulihon saluhut na pinarade ni Debata. Dung maringanan di langit dohot tano na imbaru na tinompa ni Debata, tontu parsaulihonon nasida nama angka na adong disi. Ia angka na pinarsaulihon nasida ni rangkum dibagasan tolu bagian, ima: ganjang ni umur marhite ndang adong be disi posoposo sisaotik ari, manang na ubanon na so gok arian, d.u(ay. 20), hangoluan marhite na paulion nasida bagas, manuan hau anggur, d.u (21-22), ndang hilalaon be loja dina mangula, manubuhon anak, d.n.a (23).
Astuanna, ia angka partigor manang naposo ni Debata parsaulihonon do angka naung ni pajojor ondeng. Jala saluhut na i Debata sandiri do paradehon i tu angka nasida. Tontu, manggombarhon las ni roha do saluhutna i, jala holan di tano dohot langit na imbaru i do boi itadapot i. Ala Debata sandiri do na mandok i, unang ragu hita, laho tu hita do i asal ma itatotophon di rohanta tung so olo hita manimbil sian dalan naung tinontuhon ni Debata. Jala molo itaauhon huhut itahangoluhon do na partigor manang naposo ni Debata hita tardok ma hita pinompar ni na pinasupasu Debata hita sahat di angka pomparanta (23)
Haonahan
Holan angka partigor manang naposo ni Debata do na boi hilalaonna manang daionna langit dohot tano naimbaru. Angka ise do na tardok partigor manang naposo ni Debata? Ima halak naung patupahon haimbaruon (pertobatan) di bagasan rohana, jala haimbaruon ni martahan sahat tu ujungna, ndada mamereng partabo ni roha dohot angka na asing. Ima hataridaan di hita laho maimaima tano dohot langit na imbaru na tinompa ni Debata di hita. Marhite i, apakah kita sudah termasuk orang yang melakukan pertobatan yang kekal, tidak sementara, di ngolunta on? Unangunang, holan di ari Minggu, manang uju mangihuthon angka parpunguan ni halak Kristen di bagasan rohanta na tardok tingki na lehet laho patupa haimbaruon ni roha?
Di naung dipatupa Debata tano dohot langit na imbaru di angka partigor, jala molo itahubungkon tu parngoluonta si nuaeng on. Dia na rumingkotan di hita, apakah tano dohot langit naimbaru i do manang angka na di portibi on? Ndada na mandok ndang ringkot mangalului angka na di portibion, alai unang lalap hita hinorhon ni i, itaingot ma adong inganan na rumingkot di hita naung pinarade ni Debata. Boha, tagamonta do parsidohot hita disi?
Ndang tugasta laho mamboto manang manafsir sadihari do parro ni tano dohot langit naimbaru i. Alai, itaingot ma tugasta ima manongtong paradehon diri manang sadihari pe parro na, marhite na patupahon haimbaruon ni roha asa tarmasuk hita tu horong ni partigor manang naposoNa i.
Post a Comment