Dipatimbul Rohakku Do Tuhan I
I. Sibonsiri
Tangiang ni si Hanna di epistelta on, ima uju diboan ibana anakna si Samuel tu Silo. Dung hira sirang susu anakna si Samuel, diingot ibana do baga-bagana nauju i asa pasahatonna anakna i tu adopan ni Debata. Jadi uju martangiang ma ibana rap dohot sinondukna Elkana, dihatahon ibana balga ni rohana di adopan ni Jahowa mardongan angka peleanna.
Sahalak ina na hol (mandul) do iangga si Hanna inanta ni si Elkana sian huta Rama di dolok Epraim. Nunga leleng marruma tangga ibana dohot sinondukna Elkana, alai ndang dope tikkina gabe-gabean. Sai manghirim ibana anggiat asa tung adong nian anak tinubuhonna, hape dang masa i dope. Lam lungun do rohana tahe ai sai digitihi si Penina imbangna do rohana, ala sai hol dope ibana. Ai dua ripe ni si Elkana, si Hanna ma sada jala napaduahon si Penina goarna. Nangpe rap nasida nangkok tu Silo bagas joro inganan pamelean tu Debata siganup taon pasahat peleanna, alai sai tong dope direhe jala bais si Penina tu si Hanna, ai nunga gabean si Penina maranak marboru (pat. 1 Sam. 1:4). Ala ni i sai marsak rohana, gondok jala hansit situtu dihilala dipanggitihi ni si Penina. Gabe sai tumatangis ibana, pola jotjot dang tarbahensa mangan alani lungun ni rohana. Songoni ma ganup taon dihilala si Hanna ala pambahen ni imbangna si Penina. Nian diapuli amantana si Elkana do rohana, mandok; “Ale Hanna, boasa tung tumatangis ho? Jala boasa so olo ho mangan? Jala boasa sai gondok roham? Nda tagonan ahu di ho sian anak sampulu? Nang pe songoni diapuli amantana i ibana, alai dang natarapul dope rohana.
Idaonta ma impola ni Minggunta sadari on, namargoar Reminiscere namarlapatan; Sai ingot ma ale Jahowa denggan ni basaM.” Marhite tangiang ni si Hanna, patar ma lapatan ni Reminiscere; Tarilu-ilu si Hanna martangiang di adopan ni Jahowa di Silo, huhut ma ibana marbaga-baga (bernazar), di tangiangna didok: “Ale Jahowa Zebaot! Molo ditatap roham pardangolan ni naposomon, jala diingot Ho ahu, jala ndang halupahononmu naposomon, jala dilehon Ho tu naposomon sada anak, lehononku ma ibana muse tu Jahowa saleleng mangolu ibana, jala ndang jadi hona raut parnabung uluna”. (1 Sam. 1: 10). Songoni ma tangiangna mangido anggiat diungkap Tuhan i bortianna, jala tubuhononna anak.
Tung leleng do martangiang si Hanna, jala jonok do sian inganan namartangiang i hundul disi malim Eli, di lambung ni tiang bagas joro i. Gabe sai diparrohahon si Eli ma pangalahona uju martangiang. Ndang tarbege ianggo soara ni si Hanna alai sai ubit-ubit bibirna. Pola dijonohi si Eli ibana jala gabe dirippu namabuk alani anggur, gabe disungkun; sai dia lelelengon ho mabuk? Hape ndang na mabuk si Hanna, jala dialusi ma malim Eli; Sitokka ma i ale tuanku, alai na gondok roha do ahu, rohangki do nahuusehon di adopan ni Jahowa, ai sian ponjot dohot arsak ni rohangku na godang i ahu mangkatai rasirasa nuaeng. Dungi didok malim Eli ma tu si Hanna; “Laho ma ho muli mardamedame! Sai na lehonon ni Debata ni Israel tu ho na pinangidom sian Ibana”.
Dimanogotna i mulak ma nasida tu jabuna di Rama. Ditopot si Elkana ma si Hanna jala saor dohot jolmana i, gabe marningot ma Jahowa di ibana. Gabegabean ma si Hanna, jala ditubuhon anak sada, dibahen goarna si Samuel, namarlapatan “sian Jahowa ibana hupangido”.
Hombar tu baga-baga ni si Hanna uju martangiang di joro di Silo di taon-taon nasalpu, dung sirang susu dakdanak i diboan ma si Samuel tu Silo. Ihut diboan nasida peleanna anak ni lombu tolu dohot itak sada Epah dohot anggur sapoting. Diboan ma si Samuel, tu si Eli jala didok si Hanna ma: Santabi ale tuangku, ahu ma parompuan i na jongjong di lambungmon na jolo, martangiang tu Jahowa. Dakdanak on do na hupangido uju i, gabe dibasa-basahon Jahowa tu ahu na pinangido ni rohangku sian Ibana. Dibahen i pasahatonku ma ibana tu Jahowa saleleng mangolu ibana.
II. Hatorangan
Marolop-olop ma Sipartangiang Bahenon ni Jahowa (:1-5)
Ianggo na ujui jolma nadangol do si Hanna, gondok, godang arsak jala ponjot rohana. Alai ndang be ingonton i apala nuaeng ai nunga marbasa-basa Jahowa tu ibana. Jolma namarlas ni roha dohot namarolop-olop nama siingot di ibana. Ndada holan dagingna marolop-olop alai dohot do nang tondina, ai Jahowa patimbul dohot mangurupi ibana. Asa dang be hape tarbahen angka musu mangitihi manang patutoru ibana. Ido tutu Jahowa do pangurupi, jala manang ise namartangiang tu Jahowa, sai patimbulonNa do ibana jala bahenonNa marolop-olop.
Dihatindanghon si Hanna marhite tangiangna; Nabadia do Jahowa jala bonar, ndang adong tudosanna. Diboto do tikkina patimbulhon angka sipartangiang. Alani i, sai tu Jahowa ma tapangalu-aluhon angka arsakta ai Jahowa do partanobatoanta (parlinggoman/ pangalu-aluan). Nang pe na sai laon jolma na dangol ngoluna, alai molo Debata do napintumbul ibana, timbul do i nang diadopan ni angka munsuna. Ndang tarbahen angka naginjang marroha be manenga-negahon diri tu angka si partangiang ai dipamponggolhon Debata do hajahaton ni parjahat maradophon si partangiang, doshon Jahowa mamonggoli sior ni ulubalang. Asa dang be manahiti manang mamunu sior hajahaton. Masa ma songon parhusor ni sorha ni padati, ai Jahowa do mandasing roha. Marhohos hatogaron ma angka naung mandate na sai laon, jala angka na rapar marlanggelangge muse, tubuan anak angka na hol. Pola masa dohot; Na lobian na sai laon gabe laho do mansari sipanganon jala merus boti sitorop anak hian.
Jahowa do Napatimbulhon Jolma Nang Paijurhonsa (meninggikan dan merendahkan (:6+7B -9)
Songon sorha ni padati do parngoluon na di hasiangan on todoshonon. Boi do napogos nasailaon gabe mamora nuaeng, nalea gabe marsangap muse jala hundul di tonga-tonga ni angka nasangap, nadangol gabe marolop-olop taruli pasu-pasu sian Tuhan, namatemane gabe dapotan hangoluan dohot namartua. Alani i guru di Jahowa do ngolunta. Di ayat 6 didok; “Jahowa do na mambunu (mematikan) dohot na pangoluhon; Ibana patuathon tu banua toru dohot panangkokkon muse.” Jala di ayat 7 B; “Ibana do paijurhon, laos Ibana patimbulhon muse.” Jahowa margogo patimbulhon jolma naso targoar hian, laos songoni balikna, ibana do paijurhon (merendahkan) angka naginjang roha dohot parendephon angka siparroha najahat. Haru tahe guru di Ibana do hosa ni hajolmaon; mate manang mangolu. Ai Debata do nampuna ojahan ni tano on.
Anakhonhi do Hamoraon Di Ahu (: 7)
Adong ende do ni hita Batak; “Anakhonhi do hamoraon di ahu”. Songoni do nang si Hanna diparhatopot do, naung mamora ibana sian nalea hian nasailaon, alai targoar namamora dung dilehon Debata tu ibana si Samuel nasorang sian bortianna. Ringkot do mangarimangi hita di hata ni ayat on. Boha do bahenonta asa gabe tardok, anahonki do hamoraon di ahu? Nang si Hanna ndang masa boti umbahen didok ibana Jahowa mambahen mamora di naung dilehon di ibana anak. Dung dipasahat ibana parngoluon ni anakna i tu Jahowa, baru pe asa dihatahon ibana songoni.
Anakhonta i do hamoraonta dohot hamuliaonta. Unang ma balik antong, hatiha so margelleng keluarga i dope, tardok namamora do nasida. Hape dungkon ni naung tubu jala adong anak manang boru, gabe marpogos keluarga i. Ai tangkang jala jahat anakhonna mansuasaehon arta ni amongna dohot inongna. Nasonang hian do keluarga i, ala i alani pangalaho ni gellengna, gabe susa jala diago arsak, ala parjahat anakhonna. Naeng ma tahe songon pandok ni si Hanna, gabe mamora ibana dung tubu anakna, jala asa boi masa songoni nang di kelarganta, tapasahat ma ngolu ni anakhonta i tu Debata, ringgas ma hita mamboan anakhonta tu huria, tu parmingguan namanjalo hata ni Tuhan i.
Sai naponjot do rohana, dangol jala marsak, songoni ma ngolu ni si Hanna dihatahon ibana uju dang adong dope dakdanak tinubuhonna. Alai nuaeng gabe namarolop-olop nang tondina, namarlas ni roha, jala timbul dohot tandukna, huhut jolma namamora. Nasangap ibana nuaeng di adopan ni angka jolma siginjang roha, namanjahati dohot di adopan ni jolma namamusui ibana. Saluhutna i dungkon ni naung dilehon Tuhan i pangidoanna marhite tangiang; asa tubuan anak ibana.
Timbul do Hagogoon ni Mesiasna (yang diurapiNya :8)
Haporseaon ni si Hanna mandok; “Sai na tunduk do bahenon ni Jahowa halak angka na mangalo Ibana; mangkuling ronggurna di banua ginjang di atas nasida; Jahowa manguhum angka ujung ni tano on sogot, jala lehononna hamuliaon tu Rajana, jala patimbulonna sogot tanduk ni Messiasna.” Molo manguhum Jahowa jala mandasing (menguji) di sandok ujung tano on, sai na tunduk do angka parjahat. Ndang tarpangasahon jolma i ngolu dohot pambahenanna di adopan ni Jahowa, alai dapot taruli olop-olop do angka sipartangiang jala naporsea di Tuhan i. (pat ayat 10).
III. Hahonaanna dohot Panimpuli
Sian barita nauli nasahat tu hita taringot parniahapan ni ngolu, haporseaon nang dohot tangiang ni si Hanna, boi do buatonta nagabe hahonaanna di bagasan ngolunta:
Jolma Sipartangiang jala namamuji-muji Tuhan i ma hita, ai nang Jesus pe diajari do angka siseanna asa martangiang. Didok Jesus; “Asa manang aha pangidoanmuna marhitehite Goarhu, patupaonku do, asa marsangap Ama i di bagasan Anak i! Molo dipangido hamu manang aha sian Ahu marhitehite Goarhu, patupaonku ma i. (Johannes 14: 13-14)
Marragam do namasa di ngolunta on sian angka jolma naasing, nang sian angka donganta na jonok pe. Parungkilon nabalga do di si Hanna hinorhon na hol i ibana laos digitihi imbangna muse ibana. Jotjot gondok, marsak jala maheu ibana gabe marsahit rohana. Alai di tikki sisongoni parniahapanna, dilului rohana do Tuhan jala mangalu-alu tu Jahowa. Diuusehon ibana sitaononna, jala dipangido asi ni roha ni Debata asa tung dilehon napinarsitta ni rohana. Ditangihon Debata do si Hanna, jala dibahen las rohana. Asa nang hita pe nuaeng, tu Debata ma hita mangido di bagasan Jesus sai patupaonNa do sihol ni rohanta. Tapuji ma Jahowa mardongan olop-olop.
Anakhon nagabe si lasniroha do angka anakhonta di tonga ni bagasta asal ma tatangianghon burju tu Tuhan i. Doshon si Hanna dipasahat do anakna si Samuel tu Debata. Ganup nang hita pe asa silas ni roha angka anakhonta tapasahat ma parngoluonna, sangkapna tu Tuhanta. Unang ma mangasahon botohon, hapistaronta dohot sangkapta sambing pagodang dakdanak. Molo ringgas hita mamboan anakhonta tu joroNa mamuji Tuhan i jala manangihon hataNa, pos do rohanta pasu-pasuon ni Tuhanta do nang angka anakta.
Jahowa do Sipatimbul angka naporsea. Marhuaso do Debata patimbul angka naporsea, namartoruk ni roha jala sipartangiang. Nalea boi do sangap jala hundul di tonga-tonga ni angka nasangap, napogos boi mamora, nagale gabe margogo, molo Debata patupahonsa. Ido dihaporseai rohanta ro di salelengna.
Tapasahat ma peleanta tu Tuhanta, pelean las ni roha ai ditumpahi jala dipartumpali do hita di ngolunta. Ndang marsombu-sombu Tuhanta di sitaononta, alai diapuli, ditogu-togu do hita di dalan nadenggan. Dipasahat do nadumenggan di ngolunta asa tarbahen hita marolop-olop. Alani i tapasahat ma pelea
nta nadumenggan.
Post a Comment