Minggu, 10 Oktober 2021 (19 Dung Trinitatis)

Minggu, 10 Oktober 2021 (19 Dung Trinitatis)
Evangelium : Job 23:10-17

DEBATA NA SO HEA MUBA

I. Patujolo

Molo tajaha buku Job on, idaonta ma habalgaon ni huaso ni Debata marmahani jolma na tinompaNa. Ido umbahen godang Teolog manggoari buku on “Providence” manang pemeliharaan. Providence sian hata Latin Pro “sebelum”, dohot Video “melihat”. Lapatanna nungga diboto Jahowa aha namasa tu ngolu ni jolma andorang so masa dope angka i, jala saluhutna i tarpatupa Ibana dalanNa laho manggohi sakkapNa dohot patuduhon holongNa. Di turpuk on, dipatuduhon Debata ma i tu si Job na maringan di huta Us, sahalak na tigor jala na daulat roha. Dipasupasu Debata do ngolu ni si Job marhite hagabeon dohot hamoraon (pat. 1:2-3). Alai di sada partikkian ro ma angka anak ni Debata, jala tung ro ma dohot sibolis jonjong diadopan ni Debata. Disukkun Debata ma sibolis i sian dia ibana, jala dialusi sibolis do na mangkahapi tano on ibana, jala laos didok Debata diida ho do naposongku si Job? Ai ndang adong be jolma tudos tu ibana di haburjuon, hadaulaton, biar mida Jahowa dohot padao angka hajahaton. Alai didok sibolis i mangalusi Jahowa, ala na dipasupasu Ho do ibana umbahen tigor jala daulat si Job, alai aut sura disurdukhon Ho tanganmu mambuat saluhut na di si Job, buraan ni si Job do Ho jala tadinghononna. Dungi diloas Debata do sibolis i mangunjuni si Job marhite na mambuat artana, anakhonna dohot sude na adong di ibana, termasuk ma i dohot angka donganna gabe marbalik manghasogohon dohot manguhumi si Job ala partinaonanna i.

II. Hatorangan

Alus ni si Job tu hata ni si Elipas. Bindu 23 on ima alus ni si Job di angka hata tuhas na pinasahat ni donganna si Elipas tu ibana. Didok si Elipas do masa pe angka na tinaon ni si Job i ima ala angka dosa dohot hajahaton na niulana. Hata uhum do dipasahat si Elipas tu si Job, umbahen dao Debata sian ibana jala gabe ditabunihon Debata bohiNa dompak si Job. Tutu mansai mura do manguhumi manang mangapuli dongan jolma hita tagan ro angka sitaonon dohot parsorion i, alai aut sura marbalik i tu hita tagamon do hita hot jonjong di hatigoran songon si Job? Diakuhon si Job do balga ni dalan ni Debata lao papitahon roha ni jolma, jala di saluhut namasa i ndang mardosa ibana dompak Jahowa. Porsea do ibana malua sian pangunjunan namasa i, ala ndang hea ditadinghon ibana Debata, ala ni hasatiaonna sian najolo, holongna tu hata ni Debata dohot biar na mida Jahowa pasti lulus do ibana sian namasa i.

Ditonga tonga ni ngoluon ragam do tutu namasa tu hita siganup ari. Adong do sitaonon i umbalga sian natinaon ni si Job, adong muse na gumelleng sian i, marguru tu namasa na tapanghilalahon. Pardalanan ni ngolu ni si Job maradophon Debata gabe parsiajaran na mansai arga putihonta, ima ndang ditadinghon si Job Jahowa di saluhut parsorion i. Sipata di ngolu on, molo ro angka hasonangan, paruntungan, hahipason mansai maol do jolma mangalului Debata. Alai dung tartuktuk ngoluna, dilului ma Debata. Dilului pe Debata ndada pasahathon dirina dohot sitaononna, alai gabe manguhumi pambahenan ni Jahowa do. Ndang dirajumi rohanta saluhut na masa di ngolunta dalan ni Debata papitahon haporseaonta dohot mambahen hita mabiar mida Ibana. Aut ro namasa i pintor tapangasahon do pambahenanta tu Debata marhite na talehon saotik tingkitta na martangiang, marminggu dohot parsaoran na asing dalan lao pasintonghon diri di adopan ni Jahowa. Alai marguru ma hita tu si Job, ndang dipangasahon ibana na binahenna marhite mangolu di hatigoran, daulat rohana jala biar mida Jahowa, sandok guru di Ibana ma marmahani hita tung songon dia pe dalanNa dibahen.

Ujian i papitahon haporseaon. Ala marsihohot do haporseaon ni si Job dipangunjunan i, porsea do ibana songon sere do muse ngoluna dung malua sian i. Dang diporso ibana pangunjunan i, alai lobi sian i ditatap ibana do naboi bolusonna parsorion i. Adong do tumpal na diparade Jahowa tu angka na tigor rohana. Balga ni haporseaon ni si Job tuk manatap sangkap ni Jahowa di ngoluna. Boi do i tapatudos songon tu si Abraham na mamelehon anakna si Ishak tu Jahowa, uju diunjuni Jahowa haporseonna. Alai malua do si Abraham, alai umbalga do holongna tu Jahowa marimbanghon angka pasupasu ni Jahowa naung sahat di ngoluna. Ndang ditadinghon si Job Jahowa, alai Jahowa sandiri do dibahen haporusanna. Ndang adong hata dosa dohot hata manguhumi Jahowa haluar sian pamanganna tung pe songoni balga sitaonon i, ai tangkas do ditanda ibana Debatana. Diparngoluon on tagan jumpa ni jolma sitaonon i, adong do dua dalan dipillit jolma i; ima lam jonok tu Debata, dohot gabe mandao sian Debata. Rap markonsekuensi do na dua dalan i, alai martua ma jolma na Jahowa dibahen haposanna ai tudos tu hau na sinuan di topi ni batang aek na manjarar uratna di lambung batang aek jala totap marparbue (Jeremia 17:7-8).

Ndang hea muba Debata. Panandaion ni si Job di Debata Jahowa ima hot manontong ro di salelengna do asinirohaNa. Tung songon dia pe namasa, ndang hea ditadinghon Jahowa angka na daulat roha, alai tanganna na gok huaso i tontong mangondingi asa sio sian ragam ni parmaraan. Ido panandaion haporseaon na sintong sian si Job tarida di turpuk on. Didok ibana do “parhata sada do anggo Ibana”, na marlapatan aha naung dihatahon jala dipatikhon Debata ingkon do saut. Ndada adong naboi manogang i, ai guru lomona do dipasauthon. Dirajumi si Job do songon dia dalan ni Debata papitahon haporseaon na, jala ido dipangido ibana asa dipaujung manang dipatuduhon Debata i. Dipaboa ibana do songon dia angka sitaonon i mambukbahi ngoluna, alai rohana ndang hea manadinghon Debata. Satia do ibana tu Debata, Debata pe antong satia do mamasu masu ibana. Dung pe salpu angka pangunjunan i, mulak imbaru ma muse partalian ni Jahowa tu si Job. Boi tangkas taida muse diujung ni buku on, aha na mago sian ngolu ni si Job dipaulak Debata i muse marlompit ganda tu ibana, ima di angka pahan pahanna, silompit dua dipasahat Debata, angka donganna pe muse ro mangapuli ibana, jala maranak marboru muse si Job. Sian namasa on naeng marsiajar hita ndada hea Debata mambolonghon, manadinghon jolma i, alai hita jolma do na jotjot manadinghon Debata, jala olo mambolonghon haporseaonta sian Ibana. Saluhut sitaonon na tu si Job ndada ala ni dosana. Hita pe antong molo masa pe angka parsorion dohot sitaonon i, sotung tatadinghon Jahowa, marsihohot ma tabahen ngolunta tu Ibana, ai tangkas taida ndada adong huaso ni manang aha boi mangasta huaso ni Debata, ndang adong holong na umbalga sian holong naung binahen ni Debata dibagasan Kristus Jesus. Tiop ma hatana jala haporseai, dungi gok hatuaon ma songgop muse tu ngolunta be.



III. Hahonaan/Impola
Pardalanan ngolu ni si Job patuduhon gombaran pardalanan ni jolma na mangolu dibagasan hadaulaton dohot hatigoran. Hadaulaton ni roha ni si Job, ima integritas ni pangalahona na so muba-uba, jala hasintongan ni si Job, ima pikkiran ni si Job taringot Debata totap sintong dibagasan panghataionna dohot pangalahona. Kisah ni si Job patuduhon parsoalan di sitaonon ni na porsea. Sitaonon na masa di angka na porsea (Job), ima pergumulan ni Debata dohot sibolis lao tu hasangapon ni Debata. Dihujat/dileai sibolis do Debata na mandok, na mamparbuat do si Job i mida Debata ima ala maduma manang mamora do ibana. Dipatuduhon Debata do tu sibolis i na hot do haporseaon ni si Job tu Debata tungpe mago angka i sude. Sitaonon ni angka na porsea ima laho patuduhon hasangapon dohot hamuliaon ni Debata, manggotaphon usaha/dalan ni sibolis, jala papitahon dohot pahothon haporseaon. Di sitaonon i, si Job ima gombaran ni Kristus Jesus na mangula paraloan tu sibolis jala manaluhonsa marhite partinaononNa jala dihamonanghon marhite mulak mangolu jala manaek.
Tagamon do masa songon na diadopi si Job on tu hita saonari. Alai aut sura masa angka i, dipambuat muse na adong di hita, manontong dope haporseaonta di Ibana? Tolap do hita mandok songon na nidok ni si Job on; “Jahowa do na mangalehonsa, Jahowa do muse mambuat, pinuji ma goar ni Jahowa (1:21b)”. Tolap dope hita mamuji muji Ibana di ragam ni sitaonon manang justru mamburai Jahowa haluar sian pamanganta? Unang tikki tajalo pasupasu i tadok puji Tuhan, hape dung mago/malua i sian hita dang gabe tapuji Tuhan i. Molo tajalo na tonggi sian Debata, tagamon do jaloon na paet. Alai disaluhutna i, unang ma mardosa hita sian panghataion dohot parange tu Ibana.
Debata na so hea muba, ido ojahan ni minggu ta sadarion. Laos ido tong disurathon di Heber 13:8 “ Ia Jesus Kristus, songon i nantoari, songoni sadari on, laos ido ro di salelenglelengna”. Molo taida ngolunta, martiti be do sude, alai Debata ndang marmula jala ndang marujung. Tungpe marragam angka namasa taadopi di ngolunta, sakkap dohot dalan ni Debata doi manguji haporseaonta asa papitaonNa. HolongNa ndang he muba, panarihononNa di hita ndang hea diose, jala padan na pinatikhonNa ndang hea oseonNa. Ido hadirion ni Debata. Alani i marsihohot ma hita jala manontong marsigantung tu Ibana, ai ibana do sumarihon ngolunta. Tapangido ma sapala naung dipasu pasu Ho hami, tambai ma asini rohaM asa martua hami nuaeng ro di salelenglelengna. Amen.