Minggu, 31 Desember 2021 (Malam Akhir Tahun)

Parsihohotan (integritas, konsistensi) di Debata nunga gabe sada “barang langkah” i di sepanjang sejarah umat manusia. Godang do jolma i na gagal di komitmen diparhusoran ni partingkian na baoi mangaliluhon haporseaonna. Angkup ni i, mamolus angka hamaolon na songgop tu parngoluonta, sipata gabe muba do parsihohotonta i tarlumobi mangadopi angka situasi na manimbil sian hatigoran ni Debata. “Eme na tata digagat ursa, ia i na masa i ma niula”, ninna sada pandohan ni halak Batak. Alai anggo Panurirang Jeremia, dipatuduhon ibana do sada parsihohotan, integritas, konsistensi, manang komitmen na luar biasa maradophon Debata tung pe dibolus Panurirang i bahat angka hamaolon dingoluna. Jotjot do ibana dipaburuburu, diancam, jala mangihuthon tradisi ni halak Jahudi gabe mate tarbunu do ibana secara tidak wajar. Asing sian Raja Josia, hira sude do raja ni bangso Juda cuek di suara kenabian na pinasahatna jala manguluhon bangso i mandao sian Debata. Nang pe mangula Panurirang i di tongatonga ni bangso angka na jogal na palipehon haporseaon nasida tu debata sileban, alai dipatuduhon si Jeremia do haheheon ni partondionna.

Molo tapangke do suhatsuhat ni portibion laho menilai keberhasilan ni si Jeremia tardok gagal do ibana, ai saleleng 40 taon ibana mangula ndang adong na umbegesa. Alai dipamereng ni Debata, Jeremia justru sada panurirang na paling berhasil do di sepanjang sejarah. Suhatsuhat ni keberhasilanna on, ima parsihohotonna di Debata dohot hadaulatonna. Margogo situtu do panurirang i mangula, pasahathon hata ni Tuhan i, tung pe di tongatonga ni angka hamaolon na mansai godang.

Ayat 10 : Adong tolu pandapot na marasing taringot tu pandohan “70 taon on”. Na parjolo mandok, taon 605-538 andorang so Kristus do i, mamungka mai sian haboborhat parjolo ni angka na tarbuang sian halak Israel tu Babael sahat tu hamumulak parjolo ni angka na tarbuang i muse tu Jerusalem dung ruar parenta ni Raja Koresy. Napaduahon mandok, taon 586-515 andorang so Kristus do i, mamungka ma i sian haboborhat parpudi ni angka na tarbuang i tu Babel dohot halelengse ni Bagas Joro i sahat ro di na pinajongjong na muse Joro i. Napatoluhon mandok, 70 taon i ma umur rata-rata ni jolma manisia. Alai torang do, dipaloas Debata tarbuang bangsoNa pola nanialelengna, ndang jempek tingki habubuang nasida i songon na ni lumbahon ni angka panurirang pargapgap i.

Ayat 11 : Margogo do hita marhite angka uluanta na mamboan hita mangalangka tu jolo, ima angka uluan pinasahat nasida jala rampak nasida dohot hita saleleng di pardalanan i. songon i nang panguluhonon ni Debata di hita. Diboto Debata do masa depanta jala sangkap na uli na denggan do angka sangkapNa (Sangkap Hatuaon = Rancangan Damai Sejahtera) maradophon hita jala gok panghirimon . Raphon Debata, na mamoto masa depanta, na mangalehon angka garis besar ni ulaonta, jala na mandongani hita paujunghon missiNa i, gabe gok panghirimon na mangolu ma hita. Ndang na marlapatan i, gabe so adong angka hamaolon, parungkilon, sahit, dohot lan na asing, di tongatonga ni ngolunta, alai dilehon Debata di hita gogo mamolus dohot mangadopi saluhutna i.

Ayat 12-14 : Ndang dihalupahon Debata bangsoNa i nang pe tarbuang nasida di Babel. Disangkapi Debata do mangalehon parmulaan na imbaru tu nasida marhite sada sangkap na imbaru pauba nasida gabe sada bangso na imbaru.

Mamolus partingkian na tung maol di tongatonga ni ngolunta, sipata ndang mampu hita marnida pandonganion ni Debata disi, hira na dihalupahon Ibana hita, alai sipata ndang tasadari na diparade Debata do hita, songon na binahenNa tu bangso Juda on, tu sada parmulaan na imbaru-parngoluon na Ibana gabe pamusatanna. Hombar tu sangkap na uli sian Debata, gabe adong ma di bangsoNa i sada masa depan jala gabe marpangkirimon na mangoluma nasida, alai disisi na asing luluan nasida ma Ibana sian nasa rohanasida. Nang pe mamolus partingkian dohot situasi na borat angka na tarbuang i ndang gabe mandele nasida ala adong do dinasida pos ni roha dikehadiran ni Debata, bolas do nasida tongtong martangiang tu Ibana, jala marlas ni roha do Debata maradophon nasida. Molo talului Debata sian nasa rohanta sai na jumpangta do Ibana. Alan ii, ndang adong na tuk manirang hita sian Debata.

a. Panurirangion ni si Jeremia on dipasahat tu hita di na tarajumi mamolus ariarinta di bagasan sataon bolon. Tontu adong pangarimangion sian angka halak na porsea di na boi hita tolhas mangujungi taon on jala manang pigapiga jom nari tasalpuhon ma taon 2021 on, alai beha do hita manghamauliatehon sude denggan basa ni Debata na mandongani dohot manjagai hita mamolus taon on. Molo tarimangi angka pardalanan ni ngolu rap dohot Tuhan Jesus, ndang tagamon so jumpang angka parmaraan dohot hamaolon di bagasan pardagingon nang partondion na boi mambahen hita madabu tu pangunjunan. Alai ndang dipaloas Debata hita mardalan di hamaolon i di bagasan ganggu ni roha dohot biar ni roha ala sai tongtong do dijagai hita marhite TondiNa (Rom 8:38-39). Ala ndang tarsirang hita sian na manghaporseai Jesus Kristus naung paluahon hita. Jala sian mulai ojak portibion tung so hea do sangkap na roa dohot na so gabeak di sankapi Debata masa tu ngolunta, alai tung sangkap nauli dohot sangkap hatuaon do ianggo sangkap ni Debata, nang pe sipata ingkon tabolus ragam ni angka hasusaan dohot hamaolon i dingolunta.

b. Di hata ni Jesus pe na laho Ibana mandapothon Amana i uju pasahathon tona tu angka siseanNa dilehon Ibana do sada jaminan na donganonNa hita rasirasa ro ajal ni hasiangan on (Mateus 28:20). Jaminan i do nang na gabe sitioponta laho mangujungi taon on dohot laho mandalani taon na imbaru.

c. Godang naung tabolus angka hamaolon dohot mara di taon 2021, alai dung tolhas hita di ujung ni taon on, tahilala do na malua do hape hita binahen ni asi ni roha ni Tuhan i sahat tu tingki on.

d. Alan ii, lam tapasolhot ma tu Debata na sai tongtong mangalehon Sangkap Hatuaon i dingolunta jala tahatindanghon ma pangaramotionNa i dingolunta on marhitehite angka ulaon na dumenggan dope sian angka tingki naung salpu, ima tandana hita na manghamauliatehon holong ni Tuhan siramoti ngolunta dohot tondinta. Sai tamba ma holong ni rohanta tu Debata, lam tahasiholi ma pajumpang dohot Tuhantai marhite haringgasonta martangiang dohot marhite na mangulahon angka na denggan tu donganta jolma.

e. Naeng marsirang ma hita sian taon 2021 jala naeng bongotonta ma taon 2022. Las ma rohanta jala sonang ma rohanta mamongoti taon 2022, ai Debata na sun hinagogo i do donganta arian nang borngin, didia pe hita maringanan, disituasi dia pe hita mangolu, asal ma olo hita ditiop tangan Siamun ni Debata marhite Tuhanta Jesus Kristus dohot Tondi Parbadia i. Amen.