Epistel 20 AGUSTUS 2023 XI DUNG TRINITATIS - Mundosaragi

 

Epistel : Psalmen 67:1-8

 Saluhut Bangso Manghamauliatehon Asi Ni Roha Ni Debata

 

I.          Patujolo

Ende (Psalmen) on, i ma pamujian tu Debata marningot saluhut sangkap dohot padanNa tu bangso Israel, na marmula sian Abraham (bnd 1 Musa 12:1-3, 4 Musa 6:24). Dipanghilalahon laos dihatindanghon ParPsalmen on do Asi ni roha ni Tuhan i, hombar tu angka padan ni Debata. I ma, na dipillit ni Debata bangsoNa nang parpsalmen on bahen parhitean ni Debata, papatarhon diriNa na songkal i, asa ganup na tinompaNa dapotan asi ni roha dohot haluaon.

Sada sintuhu ni pangidoan ni bangso i di bagasan turpuk on i ma, pangidoan nasida tu Debata asa tongtong satia Debata laho patuduhon pangaramotionNa tu bangsoNa margogo situtu paluahon bangso i. Asa saluhut bangso marnida pambahenan ni Debata na gok hasintongan jala tongtong mamasumasu bangsoNa. Laos digoari do nang turpuk on, songon ende hamauliatehon ni roha ni bangso i, i ma laho manghalashon pasupasu ni Debata. Dirajumi do, olop-olop jala panghirimon do di ibana/parpsalmen/bangso i molo dilehon Debata jolma i mamuji jala pasangapon Debata. Parsombaon hinorhon ni pambahenan ni Debata, gabe tuk portibion mananda dalan dohot haluaon na sian Debata. Laos on do na naeng siondolhononton di turpuk jamitanta on.

 

II.        Hatorangan ni Turpuk

1.                  Marsomba jala Mangelek asi ni roha ni Debata

            Di ayat 2 on, i ma elekelek di bagasan tangiang pamujian. Pangidoan di bagasan pamujion na tarida sian istilah “asi rohaM”, “pasupasu hami” dohot “marsinondang ma bohiM mandongani hami”. Tangiang pangidoan asa saut sangkap ni Debata. Boi do on patudoson tu tangiang ni Tuhan Jesus tagan so tartangkup dope Ibana. Jala rumusan tangiang pangidoan on, hampir mirip do tu tangiang pasupasu na pinasahat ni angka imam (bnd 4 Musa 6:24-26). Tangiang pasupasu na pinasahat ni imam maradophon saluhut ruas. Suang songoni i do nang di ayat on, tangiang pangidoan mangondihon saluhut jolma, bangso nang pangisi ni portibion asa dapotan pasupasu (bnd ayat 7).

            Dipataridahon do, Tuhan i sambing do inganan jala hasahatan ni pangidoan na tutu. Inganan haroroan ni pasupasu dohot sinondang (hatiuron) asa mangolu jala mardalan jolma i di gomgoman sinondangan ni Debata. Pangidoan pangondianon bahen olopolop di portibion. Molo diboto jolma i haluaon dohot dalan ni Tuhan i, i do na manghorhon olopolop dohot las ni roha ni portibion. Dalan dohot haluaon i gabe ojahan (patron) ni saluhut panggulmit ni portibi on.

            Molo didok “dalan ni Debata, boi do i pahamanta saguru dihahomion ni Debata. Marojahan di sangkapNa, HataNa, uhumNa dohot angka na asing. Adong huaso naumbalga jala na tingkos laho mangaturhon portibi on  hombar tu sangkap ni Debata. Hahomion na so marojahan tu dalan manang na piningkiran ni jolma. Sada panghirimon tu harajaon ni Debata (pemerintahan Allah) na manghorhon hasintongan dohot keadilan tu ganup jolma, naso marpili. Mangolu di bagasan dalan ni Debata, i ma na mangolu di bagasan hasintongan dohot keadilan ni Tuhan i.

            Di ayat 3 on, adong kata “hatuaon” ,molo di hata Indonesia “keselamatan” molo mangihuthon hata Heber “haluan do. Lebih mendekati do hata Indonesia “keselamatan” (haluaon). Asa saluhut bangso marnida pambahenan ni Debata. Jala molo tauji marnida pasupasu ni Debata tu si Abaraham raphon pomparanna ditujuhon do i ndada tu Isarel sambing dibagabagahon pasupasu i alai tu sandok portibi on do (1 Musa 12:3, 18:18). Jala pasupasu ni Debata patar ma tarida di na rade jolma tumangihon hata ni Debata (1 Musa 22:18, 26:4-5).   Dibahen i, dalan ni Debata na manghorhon olopolop dohot las ni roha i ma haluaon i, na dipasingkop Tuhan i marhite harorona di bagasan Kristus Jesus.

 

2.                  Olopolop tu saluhut bangso

      Hombar tu hatorangan nangkin, olopolop do molo saut asi ni roha ni Tuhan i, i ma diboto portibion dalan ni Debata jala diboto haluaon na sian Tuhan i. Molo dilehon Debata do i, manghorhon pamujion do i tu Debata, ala las ni roha ni jolma. Lam ditanda portibion Debata na tarida marhite panarihononNa. Ungkap simalolong nang pingkiran ni jolma i, mansai denggan jala uli do hape dalan dohot haluaon na sian Tuhan i. Dipanghilalahon tigor ni uhum ni Tuhan i, jala manogu sude marga, naso marpili. Di ayat 4-5 dipaandar do joujou tu ganup bangso i asa parsidohot nasida manghamauliatehon denggan basa ni Debata. tudos tu bangso Israel sandiri nasida sandiri pe taruli do jala maengalami huhut mangangkuhon haluaon na pinatupa ni Debata di nasida.

Tindakan ni Tuhan Debata na balga i ditomutomu jala dijangkon do i marhite sorak-sorak, ala mamarenta do Debata di bagasan hasintongan dohot habonaron yang memulihkan kesejahteraan sesuai dohot hukum na berlaku, laos boi do didok muse paboa dilehon do keadilan, molo adong dipihak tertentu na merasa tertindas. Dalan dohot haluaon na sian Tuhan i, ndada holan tu jolma i, dohot do nang tano i mangolophon. Mangolophon marhite mulak tu hakekat fungsional keutuhan panompaon ni Tuhan i. Taboto do naung tinoruan ni Debata tano i ala ni pangalaosion ni jolma i, jala na manghorhon hasusaan tu jolma i sandiri. Molo taida di Kejadian/1 Musa 3:14,17, “...Karena engkau mendengarkan perkataan istrimu dan memakan dari buah pohon, yang telah Kuperintahkan kepadamu: Jangan makan dari padanya, maka terkutuklah tanah karena engkau; dengan bersusah payah engkau akan mencari rezekimu dari tanah seumur hidupmu:” Nuaeng, tano i pe nunga be denggan mangalehon gogona, na tongtong  mangambai las ni roha di jolma i.

 

3.                  Saluhutna manghabiari Debata

Ayat 6-8 : Las ni roha ala ni pasupasu ni Debata tung patar do na dirajumi songon silehonlehon ni Debata di bagasan ngolu nasida. Asa marhite na masa sisongon i bangso na dumao pe mangantusi ise do Tuhan Debata, Debata ni Israel i, jala mabiar mida Ibana, jala manghaholongi huhut mangongkuhon hagogoonNa. Dung ditanda jolma i dalan dohot haluaon ni na sian Tuhan i, sude bangso na di tano on mamuji Debata. Las ni roha ala Debata na mangarajai na mamarenta di bagasan hasintongan dohot keadilan. Debata mamasumasu saluhutna, i ma Debata na manompa nasa na adong, Debata nampuna jala na mangarajai portibion dohot nasa isina. Dikesadaran baru on (ngolu na dipaimbaru) sada pasupasu do di jolma i molo diloas Tuhan i hita mamuji pasangaphon goarna na badia i. Haboion dohot hagogoon laho mamuji pasangaphon Tuhan i boi tarbahen jolma i, molo dilehon Debata asi ni rohaNa, pasupasuNa,dohot sinondangNa. Dung dilehon Debata i, gabe boi ma jolma umboto dalan dohot haluaon na sian Tuhan i. Adong kesadaran praktis ni jolma i, manghamauliatehon naung jinalona dohot naung pinarsaulihonna. Kesadaran na manghorhon pamujion gabe saluhut jolma marsomba dohot manghabiari Debata.

 

III.       Sipahusorhusoron

            Di igil turpuk jamita on do ngolu ni angka na porsea i asa marhuraja Tuhan Debata manang mamarenta nasa bangso asa unang adong anggota manang ruasna dikorbankan ala ni prestise (wibawa yang berkenaan dengan prestasi atau kemamapuan  seseorang, status sosial, kehormatan, kedudukan yang dimiliki oleh suatu individual) dohot golongan na asing. Alai justru naeng mangarahon sude parhuaso i asa marnida haluaon ni sandok bangso, songon Israel naung ruar sian tano Mesir, mangalehon ruang hidup, songon Israel na marpadan tu Debata, jumadihon tano na gabe partalian nasida.

            Sangkap ni Debata mangalehon pasupasuNa tu hita, ingkon mampanghorhon na balga ma i tu halak na asing, na so mananda Debata. Marhite pasupasu naung tajalo, gabe tandaon ni halak ma dalan ni Debata, botoon nasida ma ise do Debata na mamasumasu hita. Laos marhite pasupasu na tajalo i ma patandahon haluaon na sian Debata gabe torop ma jolma antong mamujimuji Debatanta jala marlas ni roha. Ingkon boi do hita na porsea mian di bagasan hadameon mangolu dohot halak na asing ala ni pasupasu ni Debata. Marhite pasupasu na tajalo adong ma pamujion, hamauliateon, las ni roha dohot olopolop sian hita na manjalo dohot sian halak na marnidasa.

            Tung pasupasu na balga do kemerdekaan nanilehon ni Debata tu bangsonta. Sisungkunonta tu ganup dirinta : aha do sangkap ni Debata tu bangsonta molo dilehon kemerdekaan i ? Sasintongna, asa ganup warga negara mamangke kemerdekaan i mamboan ngolu na maduma, na berkeadilan tu sude rakyat , na mambahen las roha ni Debata. Tahamauliatehon ma Asi Ni  Roha Ni Debata naung sahat taripar tu bagasan ngolunta paboa na dapotan haluaon do hita, tarpasupasu ngolunta. Antong tapapatar ma hadirion ni Debata tu portibion marhite pasupasu ni Debata na tajalo. Amen.