MINGGU XXII DUNG TRINITATIS
Pasangap Ma Debata Marhite Hamoraonmu Dohot Dagingmu
I. Patujolo
Boi dope tahilala panarihonon ni Debata do naadong dingolunta marhite arta manang hamoraon? Manang taetong do ala nigogonta dohot malonta molo godang artanta huhut mamora hita? Mangalusi sungkunsungkunon naeng hangoluhonta hata ni Tuhan di Poda 10 : 22 “Pasupasu ini Jahowa do mambahen mamora, jala ndang mardongan hangaluton dibahen”. Nang pe naung tajalo Barita Nauli, alai sai adong dope jumpang hita diparngoluonon parngoluon ni jolma “mardebatahon mammon/hepeng/arta”. Parngoluon ni jolma sisongonon digombarhondo “songon na minum aek laut; lam diinum lam tu uasna”. Artai nama namangatur dohot mangarajai ngoluna. Ndang dapot hita dingolu ni jolma sisongonon roha namarpanarihon tu donganna. Naeng do holan namngonsop mudar ni dongan na jolma parngoluon ni jolma si songonon, digoari ma ibana “lintah darat”. Tarpatupa jolma naung mardebatahon arta dope laho pasangaphon Debata dibagasan ngoluna marhite hamoraon dohot dagingna? Hombar tusitusion do naeng sigatanta di turpuk jamita on.
II. Rangrang Ni Turpuk
Ayat 9 : Pasangap ma Jahowa marhite sian hamoraonmu dohot marhite sian patumonaan ni sandok pangomoanmu.
Bangso Israel dipillit do Debata gabe bangso nanimiahanNa. Taruli pasupasu do sandok parngoluaon ni Bangso Israel, nang angka suansuanan rodi pahanpahanan. Marhite turpukon, disosoi Debata do bangsona asa pasangaphon Jahowa sian patumonaan ini sandok pangomoanna. Boasa ingkon pasangaponna Jahowa? Hata “Pasangap Jahowa” mandok ndang nahurangan Debata diangka sipanganon, alai naeng tangkas botoon ni bangsoNa paboa Debata do nampuna tanoi, halak dagang jala paisolat do nasida (3 Musa 25 : 23). Jala Debata do nang mamasumasu saluhut naniula ni tangan nasida umbahen manjadi jala manggotil nasida marlompit ganda. Hata “Pasangaphon Jahowa” marlapatan do i muse asa naeng tangkas botoon ni bangsoNa “naeng jumolo Debata taruli (prioritas) disaluhut angka naniula ni bangsoNa”. Hinorhonni i do umbahen diparentahon Debata tu bangso Israel : “Ingkon boanonmu do patumonaan sian tanomi masuk tubagasan jabu ni Jahowa, DebataM...” (2 Musa. 23 : 19). ; 3 Musa 23 ). Songoni do di 3 Musa 23 : 11 di dok Jahowa tubangsoNa : “Paboama tu halak Israel jala dohononmu ma tu nasida : Ia dung sahat hamu tu tano silehononHu tu hamu, jala sanga hamu manggotil gogona i, ingkon boanonmuna ma tibalan parjolo sian patumonaanmuna i tu malim”. Ruhut “Patumonaanon” tongtong do diihuthon sundut naumpudi dipomparan ni bangso Israel (Pat. 5 Musa. 26 : 1-11).
Marojahan sian parenta ni Jahowa tu bangsoNa dung sahat nasida di tano Kanaan, gabe andor sipaihutihuton do i to pomparan ni bangso Israel sahat tu panggonggomion ni si Salomo gabe raja di Israel. Dihangoluhon si Salomo do naummarga do Debata dipardalanan ningoluna umbahen naboi ibana mamora jala maduma. Songon panghaporseaon ni si Salomo di Jahowa, naengma songoni bangso nanigonggomanna manghangoluhon Jahowa disandok gulmit ni ngoluna. Raja Salomo paingothon bangsona asa unang manghalupahon Jahowa silehon pasupasu i. Unang ala ni arta/hamoraoni mambahen holang sian Jahowa (lupa kacang dari kulitnya). Unang ala ni arta/hamoraoni gabe dalan ni sibolis manegai parsaoran ni nasida dohot Debata. Unang ala ni arta/hamoraoni gabe patubu dosa dohot ginjang ni roha. Alai marhite arta/hamoraon namarharoroan sian pasupasu ini Jahowa, naeng ma nasida manontong mandok maulite tu Jahowa silehon pasupasu i. Dalan nasida mandok maulite tu Jahowa ima marhite pasangaphon Jahowa disaluhut hamoraon manang arta naung pinasahat ni Debata. Jala ingkon tongtong dihangoluhon bangsoNa, Jahowa do naummuli/prioritas disandok gulmit ni ngoluna, ai Debata do manarihon saluhut naringkot dingolu ni natinompaNa.
Ayat 10 : Jadi marsipinjot ma angka sopom, jala sirnip tuak anggur angka pangilanganmu.
Parbue ni pangoloion ni bangsoNa di Hata ni Debata, di dok si Salomo do : “Jadi marsipinjot ma angka sopom, jala sirnip tuak anggur angka pangilanganmu”. Dalam Bahasa Indonesia dikatakan : “maka lumbung-lumbung mu akan diisi penuh sampai melimpah-limpah, dan bejana pemerahanmu akan meluap dengan air buah anggurnya”. Naeng berengonta sian turpukon ima, parsaoran nadenggan tu Jahowa marhite napasangaphon Ibana sian “Patumonaan Naniula” mambahen las roha ni Debata. Dipatuduhon Jahowa ma las ni rohaNa mida jolma napasangaphon Ibana marhite pasupasu hangoluan dohot hadumaon. Pasupasui di barita raja Salomo di dok : “Jadi marsipinjot ma angka sopom, jala sirnip tuak anggur angka pangilanganmu”. Hadirion ini si Salomo namanghangoluhon poda ni Debata marhite amana si Daud mambahen si Salomo gabe jolma natarpasupasu, jala gabe pasupasu tunahumaliang. Di barita ini 1 Raja-raja. 3 : 14-15 di dok : “Dung i molo sai tong marparange ho di angka dalanHu laho mangaradoti angka patikHu dohot tonangKu, songon parange ini amangmu si Daud, tumpahanHu ho huhut sarimatua. ...Jadi dung sahat ibana tu Jerusalem, jongjong ma ibana dijolo ni poti parpadanan ni Jahowa, jala dipelehon angka pelean situtungon, dibahen huhut angka pelean hamauliateon, jala dilehon mangan saluhut naposona”.
III. Hahonaanna Tu Jamita
Dipiga inganan pelayanan di bona pasogit, adong dope dapot diluat i molo dapot tingkina gotilon/panen sai jumolo dipatupa “mamonamona”. Ulaon patumonaan naniula dipatupa ingkon jumolo pasahaton parbue naniula i tu Debata marhite naposoNa di Bagas Joro. Dipasahat ma i tingki “Pesta Gotilon” nadipamasa ditongatonga ini huria i. Dihaporsea i ruas ni huria do songon hata ini Debata na di dok di Buku Ende No. 373 : 1 “Mangula hita jolma manabur boni i. Alai anggo jadi na di Debata do i. Dilehon las ini ari, nang nambur, udan pe. Tongtong dipanumpakna marguru sasude. Nasa uli basa ro sian Debata. Ipe Ibana pujima, huhut haposi da”. Marhite pelean patumonaan naniula i, dihangoluhon ruas ni huria do dalan nasida laho mandok mauliate tu Debata ala ni pasupasuNa : gabe naniula, sinur napinahan, horas dihajolmaon. Porlu do dilestarihon Pelean patumonaan naniula ditongatonga ni huria asa manontong ngolu napasangaphon Debata marhite hamoraon najinalona sian Debata. Tugas ni huria do melestarikan kearifan lokal patumonaan naniula gabe sada warisan nadenggan tu sundut naumposo songon napinatupa ini si Salomo tu bangso Israel.
Molo pinamanat partondion ni ruas naung manghangoluhon denggan basa ni Jahowa, adong do jumpang pangalaho napasangaphon Jahowa marhite hamoraon naung jinalona sian Debata. Adong do keluarga naolo pasahathon tano inganan pargarejaan; biaya pembangunan gareja manang bagas ni Pandita; mangalehon mobil dinas tu huria. Suang songoni do molo dipatupa huria pesta penggalangan dana, sian hamoraon napinasahat ini Debata dipasahat angka ruas do bantuan/sumbangan. Molo pinamanat parngoluon ni jolma nasai manontong pasangaphon Jahowa marhite hamoraonna sai lam martambatamba do hamoraonna. Baliksa, parngoluon ni angka jolma nasai mangholit tu Tuhani, lam marpogos jala ndang adong namasa dingoluna. Disonma hinaringkot nipangauhononta di hata ni endenta Buku Ende No. 470 : 5 “Sere, arta, hepeng pe buat ma di Ho sude. Tondi nang pamatanghi, ingkon Ho oloan ni i”. Dohot di hata ni Tuhan Jesus di Mateus 6 : 33 “Sai jumolo ma lului hamu harajaon ni Debata dohot hatigoranNa, dung i tambahononNa do sude angka ondeng tu hamuna”. Amen!
Post a Comment