MINGGU XXII DUNG TRINITATIS
Epistel: Roma 12 : 1 – 2
Pasangap Ma Debata Marhite Hamoraonmu Dohot Dagingmu
I. Patujolo
Turpuk jamitaon difokushon pasangaphon Debata marhite daging. Panghorhon ni dosa gabe ramun jala jorbut do pangalaho ni jolma. Molo tasulingkiti panghorhon ini dosa i ndang tarbahen jolma i be mangulahon lomo ni roha ni Debata. Jotjot nama jolma i mangoloi hagiot ni pardagingonna. Gabe hasomalan nama dietong roha ni jolma i laho mangulahon dosa. Ndang dapot be roha nadaulat maradophon Debata. Ndang tarula jolma i be laho pasangaphon Debata marhite daging/pamatangna. Diturpukon diarahon do hita laho mangantusi pasangaphon Debata sian roha na daulat tu Debata marhite daging naung dipaimbaru marhite mudar ni Kristus. Boasa diondolhon si Paulus pangajarion sisongoni tu Huria Rom? Ala sanga lipe pangantusion ni ruas i hinorhon ni pangajarion naro sian pangajari namangondolhon parugamoon ni halak Jahudi.
II. Rangrang Ni Turpuk
Ayat 1 : Na huapoi ma hamu ale angka dongan marhitehite asi ni roha ni Debata. Pasahat hamu ma dagingmuna bahen pelean namangolu, nabadia, nahinalomohon ni Debata; ima hadaulaton ni namarroha.
Diarahon turpukon do hita laho mangantusi “Hadaulaton ni Namarroha/Ibadah Yang Sejati”. Di hata Heber, hata Ibadah ima “avoda”; di hata Yunani “latreia lapatanna : Melayani/Mengabdi. Sian hata “avoda/latreia” boa dohononta hadaulaton ni namarroha/ibadah yang sejati ima “mamelehon saluhut ngoluna tu Debata sian nasa ateate dohot sian nasa roha”. Tudos tu pandok ni si Paulus diturpukon suhatsuhat ini hadaulaton ni namarroha ima “Pasahat hamu ma daging muna bahen pelean namangolu, nabadia, nahinalomohon ni Debata”. Diturpukon sipasahaton tu Debata ima daging, ndang arta/hamoraon. Saotik tasulingkiti taringot tu daging nadipelehon tu Debata. Dipadan Narobi (PL), daging namangolu dipamate gabe pelean situtungon sipasahaton tu Debata. Alai molo di Padan Naimbaru (PB), daging naung mate dipangolu gabe pelean pardengganan tu Debata, ima AnakNa Jesus Kristus. Hata “daging” sipelehonon tu Debata diturpukon ima daging naimbaru naung ditobus Jesus Kristus sian dosa dohot hamatean. Daging naung dipaimbaru marhite mudar ni Kristus, nunga gabe badia jala dihalomohon Debata.
Marhite hata ni Tuhan napinasahat ni si Paulus tu Huria Rom diturpukon, dipodai nasida asa marhadaulaton ni roha tu Debata marhite saluhut gulmit ningoluna. Naeng pasangapon nasida Debata marhite ngolu naung dipaimbaru dibagasan Jesus Kristus. Saluhut pardalanan ningoluna pelehononna tu Debata. Ndang holan di Bagas Joro nasida patuduhon roha nadaulat tu Debata, alai diparngoluon siganupari tongtong nasida patuduhon roha nadaulat tu Debata. Molo napistar diportibion di dokma istilahna “Hidup Ini Adalah Ibadah”.
Ayat 2 : Jala unang gabe sarombang hamu dohot portibion; alai gabe imbaru ma hamu, dung muba pingkiran muna, asa tau hamu manimbangi lomo ni roha ini Debata, i ma nauli, na hinalashonNa dohot na sun denggan.
Roha na daulat tu Debata ima ngolu nahibul marsihohot tu Debata. Molo si Paulus mandok unang gabe sarombang dohot portibion. Ngolu ini jolma i tu Debata ndang boi meoleol manang mumbang lonong songon kapal selam, manang songon bunglon naboi martungkar kulitna. Alai ingkon marsitutu jala marsihohot do manghophop Tuhan i di gulmit ni ngoluna. Asa dapot pangalaho nasongoni, ido umbahen didok si Paulus “alai gabe imbaru ma hamu/berubahlah oleh pembaharuan budimu”. Naboi paimbaruhon jolma pardosa ima Debata marhite panghophop ini AnakNa Jesus Kristus. Panghorhon ni ngolu naung dipaimbaru marhite mudar ni Kristus do tarbahen jolmai marsihohot dohot marsitutu mamelehon hibul ngoluna tu Debata. Ndang margogobe huaso ni portibion laho mangelaela jolmai asa sarombang dohot portibion. Ima gogo dohot huaso ni Debata laho manghophop jolma pardosai, asa mulak denggan hombar tu lomo ni rohaNa. Molo napistar diportibion di dokma istilah panghophop ni Debata tu jolma pardosa i “Memanusiakan Manusia”.
Marhite turpukon dipasahat si Paulus tu Huria Rom, asa boi dihangoluhon roha na daulat tu Debata ingkon jolo gabe jolma naung dipaimbaru dibagasan Jesus Kristus (Pat. 2 Kor. 5 : 17). Ngolu naimbarui dibagasan Kristus manopa jolmai gabe jolma nabisuk dohot napantas marroha. Mudar ni Kristus i paimbaruhon jolmai sian daging naung busuk gabe daging namarbisuk. Gabe margogoma jolma i manontong patuduhon roha nadaulat tu Debata, gabe saurdot panghuling dohot pangalaho.
III. Hahonaan Tu Jamita
Memang molo jujur hita mangida hakristenon si saonari, tung jotjot dope hita marpangalaho sarombang dohot portibion. Tung mansai maol dope taulahon manontong marroha daulat tu Debata. Jotjot dope hita halak Kristen martabuni dipahean parduru songon nabadia, hape roha parbagas mansai ramun. Nunga tajalo panobusion marhite mudar ni Kristus, alai balosna jotjot do tumatangis tabahen Tuhan ni. Isarana, hea do hubereng hami sahalak Parhalado tung mansai ulido berengon pardalanna sian pahean parduru. Denggan marjas, diboan tas na marisihon Agenda, Bibel dohot jubahna. Tingki marminggu tung mansai denggan berengon pamangke ni jubahna laho maragenda. Tung mansai badia ma berengon tingki parsaoran dohot Debata diparmingguon i. Simpul parmingguon, laho ma amanta Parhalado on tu Lapo, didapot ma di lapo i angka ama naso marminggu sambil marjudi. Dibungka Parhaladoonma Jas na dohot dasina laos digantunghon di lapo i, dungi pintor dohot ma ibana marjuji rap dohot na so marminggu i. Dirimpu amanta Parhalado i do huroha molo gantung Jas na i, gantung ma dohot tohonan haparhaladoon i, boi ma ibana marjuji. Jolma sisongonon ndang Parhalado namarroha daulat maradophon Debata. Ai holan di bagas joro do ibana songon na daulat maradophon Debata, simpul sian bagas joro nunga dipelehon dirina sarombang dohot portibion.
Si Paulus mandok, roha nadaulat tu Debata ima saurdot jolma parduru dohot jolma parbagas mangoloi lomo ni roha ni Debata. Ndang boi asing dipamangan, asing di roha/lain dimulut, lain di hati. Ndang boi hita gabe jolma namunafik maradophon Debata. Hira nabadia do begeon hatanta/jamitanta, alai holan naguntur dohot keluargana dijabu. Sai jotjot marhata ni Debata tu donganna, alai manangkoi ulaonna. Roha nadaulat tu Debata ima sai dipasangap Debata marhite parange nadenggan di saluhut pardalanan ni ngoluna. Dihangoluhon jala dihaporseai pamatangna nunga dipaimbaru Tuhan Jesus marhite mudarNa na durus di Golgota. Panghophop ni Tuhan i tongtong diramoti asa margogo laho mangihuthon Tuhani.
Marhite Jamita on, diarahon turpukon do hita mamillit dalan napatut hombar tulomo ni roha ni Debata. Molo taulahon roha nadaulat tu Debata taruli ma hita dibagabaga nang diragam ni pasupasu sian Debata. Saonari nang marsogot nang haduan pe sai namarhasonangan do ngolunta dipasupasu Tuhani. Ala ni i, lului hamu ma Jahowa asa mangolu hamu ! (Amos. 5 : 6a). Amen!
Post a Comment