Khotbah Minggu 15 Oktober 2023 - Mundosaragi

 

Evangelium: Matius: 22:1-14

 

Torop Do Natarjou Alai Otik Do Natarpillit

I.                   Patujolo

Adong hata batak mandok “Gokhon do sipaimaon jou jou do sialuson”. Molo naung sahat gokhon on ikhon jala denggan ma adopan. Lumobi ma diulaon  hita halak batak. Molo naung ro do gokhon baik sian paranak manang sian parboru pintor rade do rohanta maniti ari boha asa boi hita ro diulaon i. Napasti baenonta boha asa boi adopanta jala unang mambaen kecewa na manggokhon hita. songon I nang angka pangaradeonta, tandok, tortor, tumpak dohot Ulos angka nasing muse. Gari dao pe ulaonni nangpe ikhon kaluar sian kantongta gabe harugianta doi asalma taadopi pesta i. Sude nai diulahon, boha asa gohan lasniroha ni hasuhuton lumobi namangontang.

Molo tajaha do surat Injil ndada sahali on be Jesus mambaen parumpamaan taringot “harajaon ni Debata”. Angka Parumpamaan taringot Harajaan ni Debata ima perumpaan songon sada namora(Mat.20:1-16), songon dakdanak(Mat.18:1-5), songon panabur boni(Mat 13), Anak boru nasumpulu(Mat 25) dohot na asing nai dope. Jala dang naholan taringot “harajaon ni Debata ” Jesus mambaen parumpamaon dohot angka pangajarion na asing pe jotjot do Jesus mamakke parumpamaan. Di turpuk on didok parumpamaan Harajaon ni Debata tarpatudos tu sada Raja mamestahon ianakhonna mangoli.

 

II.        Hatorangan ni Turpuk

Molo didok marpesta pasti mai ulaon lasniroha. Asa manggohi lasniroha nasida pasti adong do nani ontang na nasida. Dison didok sahalak Raja do nampunasa ulaon manang “suhut bolon”. Tontu boi tardok Raja ima halak nasangap, jala nanihormatan ni saluhut. Napasti Bolon do ulaon I, jala angka na ni undang na pe pasti do torop, rodi angka sisolhotna, nang angka rekan pejabat. Songon ido somalna molo marpesta angka uluan nasangap. Jala Ise naso lasroha molo sahat undangan I, apalagi muse nampunsa ulaon I ima sahalak raja namarhasangapon.

Alai Ironis manang “ngeri hian” do namasa diturpuk on, dung sahat Gokhon I . Nunga Rade be sude angka nahombar tu ulaon I rodi angka sipanganon laho menyambut angka undangan ni pesta i. Disuru Raja I ma manjou naposona, molo dihalak batak songon parhobas ima angka parboru. Raja I nagabe suhut disuru ma angka boruna(parhobas) laho manjou angka ontangna asa ro. Mandok nunga siap jala nunga rade be ulaon pesta lasniroha i. Alai dang adong naro nanggo sada. Molo di hata halak hita batak didok “Gokhon do sipaimaon , jou jou do sialuson”. Nunga tingkos nabinaen ni Raja I songon hasuhuton di Pesta i. di Gokhon jala adong do muse panjouon I, dang adong olo ro.

Dungi diulai Raja ido muse marsuru naposona, didok “paboa hamu ma tu angka naginokhonnan muna, nunga rade sipanganon,….nunga rade saluhut…. Lapatanna Raja I ima hasuhuton di Pesta nunga tangkas paboahon haradeonna, haradeon namanjanghon, manamue , dohot naringkot disipanganon nasida pe. Alai marsidalian do nasida dibaen “…tois niroha nasida, nasada laho tu hauma, nasada laho tu partigaa tigaan”. Aha do huroa mambaen borat nasida ro tu Pesta? Alani toisna gabe marsidalian nasida.

Sasintongna parumpaan on laho mengencam  halak Jahudi do hatihai. Songon halak Jahudi naung saleleng on manghirim diharajaon ni Debata marhite hite mesias. Naeng didok Jesus: nunga saut be Harajaon ni Debata I songon gokhon asa masuk tu harajaon ni Debata. Gokhon I tu halak namanghirim saleleng on diharoroNa. Raja I nampuna Ulaon I ima Tuhan Jesus, naro tu portibion laho “manjamu hita, narade manamue hita di perjamuan Pesta i.  Saonnari rodo GokhonNa jala Jou jouNa,alai dang adong naro, jala laos martois niroha mambaen sidalianNa. Halak Jahudi naleleng on sai radot di Patik ni Tuhan I, alai laos do adong do parulaonna, songon angka siboto surat naso porsea di harajaon ni binuan ni Tuhan  Jesus. Songon angka Namarsangap ni Israel naso olo manjanghon pangajarion ni Tuhan I marhite angka panurirang songon sejarah dipadan narobi.

Dirimpu rohani nasida do Naposo nasinuru ni Raja I gabe alo nasida, gabe manggunturi nasida. dipusa nasida mai. Naposo ni Debata Ima angka SiseanNa, angka parjamita, angka panurirang, songon I angka naung pinabangkitna gabe ula-ulaNa. Hape NaposoNa i ima perwakilan ni Raja laho manjou nasida asa ro tu Pesta i. Holan namanjou do uloan nasida, hape gabe dipusa jala dibunu do nasida. Sahalak naposo ni Debata ima angka naung dipabangkit Debata ima manjou nasa jolma tu Harajaaon ni Debata asa Dapotan Haluaon.

Nangpe dang ro nanggo sada naung ginokhonna I, dang gabe mago buti Lasniroha ni Raja i. pasti do adong kekecewaan molo adong sahalak namarulaon manggokhon alai dang ro naginokhonnai. Alai didok Raja I “Nunga rade nian nahasea tu pesta I, alai dang tau angka napinio”. Didok Jesus “dang tau”(bhs Indonesia:”tidak layak”). Wajar do rajai mandok  songon I, Ala dang denggan respon ni angka na niundang I tu ibana. angka naso tarharaphon be, angka pangalaho naso rade  dijou, nagok sidalian I, dang tau I mandapot harajaon ni Debata I, dang tau I manjalo inganan ni haluaon i.

Nang soro angka naung ni gokhon nai, dang sumurut lasnirohana nangpe adong kekecewaanna. Disuru do muse naposoNa tu angka dalan balobung, asa diarahon angka saluhut najumpangna. Lapatanna manang ise naolo diarahon. Nadidokna naung godang hape naung manghirim, tardok porsea naung gabe sasaran ni halaon I, dang gabe jaminan olo ro manopot Tuhan i.

Ido umbaen didok Raja I “manang ise jumpangmu”. Lapatanna Rade do tangan ni Jahowa manjou manang ise naolo ro tu Ibana. didok do “na jahat dohot nadenggan” ima namanggohi Pesta i. dang sumurut Lasniroha ni nampunasa Ulaon I hape, ai torop do manang ise naro tu Pesta i. Halak naung jumpangan ni Jahowa, ima halak naung marlasniroha. Martua ma halak najumpangan ni naposona, tarjou ibana, jala rade rohana jonok tu Debata. Pasti do gok lasniroha ganup halak naung jumpangan I ro tu Pesta i. Alai adong sahalak tamue ni Raja “naso marpahean pesta”. Tontu halak naro tu pesta nda ikhon denggan do paheanna patuduhon haradeonna mangadopi pesta i. Merasa do ibana parsidohot marlasniroha dipesta I, hape dirina pe dang diparrohahon. Marsipaula do ibana songon naung layak manjalo lasniroha hape diboto Debata do rohana. nda haleaon do  nabinaenna, manang hailaon do nabinaenna disi molo so denggan paheanna. Ipe didok Jesus do “nabeha do parmasuk mu tuson amang? Ai dang marpahean Pesta Ho?

Nangpe sahalak Raja ibana, nampuna ulaon I songon “hasuhuton” di Pesta I ditanda ibana do angka tamuena, jala diparrohahon ibana do songon dia pangalahona, sikapna di Pesta i. ndang gabe sibuk ibana sandiri ibana ala nampuna ulaon. Anggo di Halak Batak, Olo dope ra hasuhuton ipe dang ditanda angka halak naro tu paspestaan I alani torop na. alai anggo Raja I sumurung do. Jesus Kristus I songon sahalak raja I, nampuna huaso di HarajaonNa. Ganup namasuk tu Harajaonnai pe ima halak naung tangkas tarjou hombar tu pangalohana dohot sikapna.

Songon  sahalak naso marpahean pesta I gabe ditali patna dohot tanganna laos dibolonghon,masa ma angka anguk anguk…” Jesus do nampuna Harajaon I, Di Ibana do Hunsi ni Hangoluan i. Lapatanna molo ro hita tu Debata, ikhon ma dibagasan hahormarton, dibagasan habadiaon, ndada leas niroha. Nangpe adong namardosa, adong na denggan masuk harajaonni Debata, ndada diparsoalhon Tuhan i. Alai halak naso marhite marpahean hasintongan ni Kristus, namangolu dibagasan Kristus ido namanjalo jambarna tu api narongko. “Alai Lan do nadijou alai saotik do natarpillit”. Ise do natarjou? ise do natarpillit i? lapatanna natarjou ipe hape nda gabe jaminan naung parsidohot diharajaon ni Debata. Alai naung tarpillit I tontu ima angka halak naung dijanghon Debata, halak naung dipakke Debata, jala Halak naung parsidohot Di Harajaon ni Debata.

 

III.       Panimpuli/ Siparhusorhusoron

1.      Tinggil  jala oloi ma hita di Jou jou ni Tuhan i. Molo tardok halak naung porsea ikhon ma nian olo hita mangoloi jou jou ni Tuhan i. Marragam situtu di panjouon ni Tuhan I asa mardalan hita dihasintonganna. Tung unang be marsidalian hita, masiboan alasanna, masiboan sahitna, dang boi hita manjua asal olo hita rot u Tuhan I mangoloi HataNa jala mardalan tu lomo nirohaNa.

2.      Rade Do Tuhan I manamue hita. Holan Tuhan Jesus do songon panamue na burju. Lapatan ungkap jala rade do rohana manamue hita manang sadihari pe ro hita tu Ibana. Dang Hea adong Sordak ni pintuNa,nangpe di Ibana nampuna Hunci  Hangoluan i. Alani I binsan adong mangolu hita, ro ma hita, ai rade dibaen Tuhan tai ganup napinapinganido nirohanta di ibana do, ibana do Bona ni hangoluan, Ibana do haroroan ni pasu pasu. Alani I haringgashon ma ro tu Tuhan Jesus. didok do “ro ma hamu tu Ahu, hamu angka naloja....(Mat.11:28),Ai do dalani, dohot hasintongan dohot  Hangoluan …(Joh.14:6), Au Ho Roti Hangoluan i(Joh.6:48).

3.      Tuhan Jesus do Hunsi ni Haluaon. Tangkas diboto Tuhan ido manang ise naro tu Pesta i. Halak Natarjou ipe naso ro mangalusi joujouNa I,dang tau i dohot di HarajaonNa. Jala halak naso denggan marpangalaho, namarsipaula parsidohot, dang dapot Haluaon i. Holan Tuhan Jesus do berhak mamillit ise do na bongot tu HarajaonNai. Sian tonga tonga ni natarjou I pe, diboto Debata ise natau sipillitonna.”Jadi dilehon do tu Ibana huaso na manguhumi ala Anak ni Jolma I Ibana (Joh.5:1). Ditingki di boto Ibana naso layak ibana dipiliit pintor di tali ma dungi dibolonghon. Tuhan Jesus do nampuna “uhum” jala manguhumi namangolu dohot namate. Ibana do manontuhon, jala manirang angka naporsea dohot nasoporsea i.

Godang do natarjou alai otik do Natarpillit. Tuhan Jesus umboto do manang ise natau parsihot di harajaonna. Jala dang sude tarjou, garipe naung digokhon hape anggo solo olo, nga pasti dang dohot i. Hape adong do natarjou, jala olo ro tu Pesta I, alai anggo dang sian ias nirohana, roha namarpangansi, jala marsipaula hona uhum sian Debata. “nda saluhut halak mandok :Ahu Tuhanna bongot t harajaon banua ginjang I, holan angka namangulahon lomo niroha ni Damang nadibanua ginjang ido”(Mat.7:21). Jala dung ari parpudi ipe, ditanda Debata do angka biru biruNa, nasai sihol tu asinirohaNa, siulahon HataNa, jala naolo mamelehon dirina mangurupi angka nagale. Ganup naso mangulahon I didokma “Dang hutanda hamu, laho ma hamu sian lambungHon.(Mat.7:23).