MINGGU XX DUNG TRINITATIS
Evangelium
: Jesaya 45:1-7
Debata
Do Sibahen Haluaon
I.
Patujolo
Hampir do
sude halak hea manaon haporsuhon manang
krisis di tonga-tonga ni ngoluna. Boi do i krisis di partondion, relasi dohot
krisis perekonomian. Di kondisi na sisongoni tung berharap do hita adong ro
pangurupion laho paluahon sitaonon na borat i. Situasi partingkian di Jesaya
45:1-7 on bangso Israel sedang di habuangan Babel (Deutro Jesaya 40 – 55).
Hansit do diae nasida di habuangan i, jala diharingkothon bangso i do asa adong
na paluahon nasida sian habuangan i.
Tarida do bagabaga haluaon i tu bangso Israel. Halak Israel na tarbuang
uju i ima sian golongan atas sian Jehuda jala nasida borhat ndang sekaligus
alai secara bertahap. Parborhat ni nasida adong tolu gelombang sian taon 598
dohot 582 SM. Na tarbuang i, i ma angka bangsawan, malim dohot angka pegawai
tinggi ni kerajaan rap dohot torop angka ahli pertukangan. Dipaloas do Nasida
pajongjong bagas di Babel dohot mangulahon angka ulaon na boi gabe ngolungolu
nasida di inganan i huhut mangulahon ruhut parugamaonna. Alai, nasida ndang boi
malua sian kerja paksa na binahen ni harajaon Babel. Dung ditingki Raja Kores
(Cyrus/Sirus-Raja di Iran Selatan/Persia) na marhuaso di Babel dilehon do kebebasan tu bangso na nirajaan ni
Kores i pajongjonghon angka inganan parpunguan manang bagasjoro.
II.
Hatorangan
Ni Turpuk
Ayat
1:
Ia
Raja Kores marhuaso dung 40 taon ma lelengna bangso i di habuangan Babel. Huta
Jerusalem nunga hancur so adong be na tading na gabe boi inganan. Kores ima
sasahalak raja non Juhudi na diurasi (diurapi) Jahowa. Debata mamiahi-melantik
Koresy gabe sipalua tu halak Israel. Sada hasomalan do molo di Israel melantik
sada raja ingkon diulahon panurirangNa, taingot Raja Saul, Daud, dna. Debata do
na mengangkat Raja Kores laho manggonopi bagabagaNa. Ditiop Debata do tanganna
siamun papatuhon angka bangso parbegu dijolona. Dilehon Debata do huasoNa
mangalehon gogo dohot manungkoli si Kores. Diiring Jahowa do si Kores jala mamparrohaon sude gerak-gerik dohot
angka sangkapna songon Si Elisa na mameak tanganna tu atas tangan ni raja i di
tingki manangging sior i (2 Raja 2:13:16). Tarida ma panjouon ni Debata tu si
Kores ndang mamereng bohi, latar belakang, suku, bangso ni sasahalak laho
patuduhon huasoNa. Misi ni Jahowa marhite na miniahanNa si Kores ima laho
paluahon bangso na pinillitNa i sian habuangan Babel. Marhite huaso ni Jahowa
diharhari sinjata sian gonting ni angka raja, mangungkap di jolona angka pintu
dohot bahal. Pandohan on patuduhon tu hita tung so adong do na boi manghambati
ulaon ni Debata di liat portibi on.
Ayat 2-3:
Halak
na pinillit ni Debata pasti mampu mangulahon na nidokNa ala Debata do
mandongani ibana huhut ndang mandao sian ibana, songon si Kores na taida dison
didongani Debata ibana mardalan dijolona. Ganup ari do si Kores diramoti Jahowa
manang aha pe na diulahonna sai mardongan huaso ni Jahowa. Ndang alangalang
Jahowa mandongani jala mamasumasu ganup pardalanan ni si Kores pahornopon angka
buntulbuntul, ropuhonNa angka pintu tombaga jala segaanNa angka sordak bosi.
Ndang adong nangga sada na boi mangalo ulaon ni Tuhan i. Digohi Tuhan i do si
Kores marhite hamoraon ima arta na dihaholomon dohot homitan angka na
tinabunihon angka raja-raja. Martamba ma arta si Kores sian hamonangan ni angka
bangso-bangso na ditaluhonona. Dipasupasu jala diramoti Tuhan do ibana marhite
saluhut pambahenan ni Debata. Natinujuni roha Debata marhite basa-basaNa i ima
asa ditanda si Kores do Jahowa Debata na manjou goarna i. Denggan situtu do
angka pasupasu na pinasahatNa tu hita angka jolma on ima patauhon ai sian Ibana
sambing do saluhutna i. Alai, na jumotjot taida di partingkian on ai marhite
hamoraon na jinalona i gabe lupa do jolma i ai Jahowa do na manumpahi sasudena
i.
Ayat 4
Pandohan “Ala ni
Jakob naposongKi dohot ala ni Israel na Hupillit i umbaen na Hujou goarmu” asa
ditanda si Kores do ia si Jakob ima sahalak naposoNa jala bangso Israel ima
bangso na pinillitNa. Ndang ditanda si Kores ia Debata na marsuru ibana ima
Debata bangso Israel. Ngolu ni si kores magodang di parugamaon na manomba
ganaganaan, tung so ditanda ibana do Debata na sasintongna. Tung pe songoni,
ditanda Tuhan do ibana jala dipangke do si Kores laho paluahon bangso Israel.
Malua do halak Israel sian habuangan i dung diharuarhon Raja Kores sada
maklumat/ dekrit mandok ingkon mulak sude bangso Israel na tartaban tu
Jerusalem. Sude ulaula ni bagas joro na sanga diboan tu Babel na binuat ni Raja
Nebukadnesar dipaulak tu ingananna. Di jou jala dipillit do Kores paluahon
bangsoNa i. Asa panjouon tu ganup diri ni jolma adong do sialana, ala ni i
ganup halak naeng ma manungkun dirina be aha do tujuan ni panjouon na tu ibana
sandiri asa sian ima taboto jala taulahon ma hombar tu panjouon na tu ibana.
Ayat
5-7
Hasintongan na
mandasor di pandohan “Ahu do Jahowa, jala ndang adong be Debata dungkon ni
Ahu”. Ndang adong debata di liat portibi on na boi mambahen songon na binahen
ni Debata Jahowa. Dipatandahon Ibana do diriNa asa diboto halak Ibana i ma:
Sijadi hatiuron dohot sitompa haholomon, sibahen hadameon dohot sitompa
hamagoan. Jotjot do Debata patudu hagogoonNa asa mananda halak di huasoNa songon
na masa tu si Firaun ( Bnd. 2 Musa 9: 14, 16, 8:6; 9: 26). Pandohan sitompa
hamagoan di ayat 7 ndang boi bahenon i sahira patokan na Debata do parohon hamagoan alai patudu huaso i ni
tanganNa nang pe so olo Ibana mambahen hamagoan tu jolma. Debata sibahen
hangoluan do alai gabe hamagoan do tu halak na so mangulahon lomo ni rohaNa.
Jolma i do mamboan ibana tu hamagoan ala so diihuthon lomo ni roha ni Debata.
Ala ni taihuthon ma Debata asa unang adong di rohanta Debata do na mambahen
hamagoan tu hita.
Raja Kores
paluahon bangso i sian habuangan Babel jala tong do diurupi ibana bangso i laho
pajongjong bagas joro na adong di Jerusalem. Ulaon ni panggomgomi ima asa angka
na nirajaanna i aman. Terbatas do haluaon na nibinahen ni Raja Kores i tu
bangso Israel. Alai nang pe terbatas,
naeng ma diparhaseang bangso i nian
kebebasan manang haluaon gabe langkah awal tu haluaon na sasintongna. Ringkot
situtu do di ganup ngolunta be asa boi manghangoluhon ulaon na metmet laho patupahon
hadengganon na umbidang. Pemanfaatan situasi yang genting untuk kebaikan
bersama. Tarlumobi ma di bangso Israel diloas Debata dope malua sian hamaolon
i. Naeng ma nian dipanghilalaon dalan ni
Debata i ima naung dijou jala tarpillit do tu haluaon na sasintongna. Hita pe
di ngolu partingkian si nuaeng on digoari songon “Israel na Imbaru” ima angka
halak siihuthon Jesus Kristus i. Sapala naung dijou Tuhan i hita gabe sitean
Harajaon ni Debata taulahon ma i.
III.
Hahonaan
Ni Turpuk
Marulakulak do di sejarah bangso Israel bangkit sahalak panggomgomi na dipangke Debata laho paluahon bangso na pinillitNa i sian angka pangaleleion (penindasan). Sada sikap na naeng tasikapi sian turpuk on i ma asa adong di roha ni jolma i mangolu roha hatigoran dohot roha na pangoluhon-paluahon. Olo paluahon sian keterdesakan-rela manuturi tohap ni jolma na sintong. Tapadao ma roha na mambuat kesempatan dalam kesempitan, alai naeng ma tapangke kesempatan i laho patuduhon angka na denggan tu halak na so mananda Debata. Dipangke Debata do halak na so mananda Ibana gabe ulaulaNa, ima na patuduhon otoritas penuh ni Debata tu angka na tinompaNa. Tarlumobi ma hita naung tarjou gabe siihuthon Kristus disuru do hita mamaritahon Barita na Uli marhite angka silehonlehon ni Debata tu hita tu angka jolma na dihumaliangta so pola mamereng latar belakang nang kedudukanna. Mamereng kondisi ni zaman nuaeng on, mansai torop do jolma na ‘terjajah’ manang na dipaporsukporsuk sibolis dohot portibi on. Godang do halak na dibagasan sitaonon, nang hasusaan hinorhon ni dosana, hasalaanna, nang angka faktor keadaan dohot lingkungan. Na tarjou do hita angka siihuthon Kristus mangurupi nasida, paluahon nasida sian hasusaanna, ingkon tahilalahon do sian Debata do mual ni pasupasu na tajalo i, asa mulak muse tu Ibana marhitehite pambahenanta tu angka na dihumaliangta. Molo Raja Kores halak na so porsea tu Ibana boi pangkeonNa gabe dalan haluaon tu angka bangso, lam ma hita angka naung hinonghopNa i? Ndada holan tarjou be hita alai nunga gabe panjouon haporseaonta i di Kristus secara otomatis mangulahon ulaon asi ni roha ni Tuhan i. Tema ni ojahan di Minggunta mangarahon hita ai“ Debata do sibahen haluaon” ai holan di Debata sambing do haluaon i, nunga ditobus Jesus hita sian hadosaonta gabe parjambar hita dihaluaon na pinatupa ni Tuhan Jahowa . Amen
Post a Comment