Johannes
1:9-14
I.
Patujolo
Dipillit Debata do bangso Israel gabe bangso-Na. Debata Jahowa na badia do,
jala ingkon mangolu di bagasan habadiaon ma bangso-Na i. Asa boi mangolu di
bagasan habadiaon, dilehon Debata Jahowa ma patik na sampulu i tu bangso Israel
marhite si Musa. Marhite na mangulahon patik i ma asa mangolu di bagasan
habadiaon bangso i. Alai di pardalanan ni ngoluna, ndang tolap ni bangso i laho
mangulahon patik ni Debata, sai jotjotan do bangso i madabu tu bagasan dosa.
Badia Debatana, alai ramun ianggo bangso-Na. Ala so boi be jolma i laho
patigorhon dirina asa badia di adopan ni Debata ala naung bagas pardosaon
nasida, marsangkap ma Debata laho paluahon bangso i. Sangkap ni Debata Jahowa
ima naeng tuat Ibana tu portibion laho mamboan haluaon dohot hangoluan tu
saluhutna jolma. Ro do Ibana tu portibion marhite Jesus Kristus.
Jadi, boha do haroro ni Jesus Kristus manopot sude angka pardosa na di
portibion? Jala aha do panghorhonna tu angka jolma na olo na mangihuthon Ibana?
Antong laos tapaihutihut ma hatorangan ni turpuk on.
II.
Hatorangan Ni Turpuk
Judul perikop ni
turpuk on ima “Hata i na gabe daging” jala on ma tema di pamuhai barita nauli
na sinurat ni si Johannes. Hata na gabe daging, dilapati ma i “inkarnasi” ni
Debata. Berinkarnasi do Debata sian “Hata” gabe “Daging” manang jolma ima
marhite Jesus Kristus. Molo tajaha turpuk on sian ayat 1 na marlapatan doi ia
Jesus Kristus nunga rap dohot Debata Jahowa sian mulana. Naeng diarahon si
Johannes do angka na manjaha suratna on tu tradisi panompaon ima marhite Hata
ni Debata na manjadihon saluhutna, ndang adong nanggo sada sian naung jadi i,
naso marhite sian Hata ni Debata.
Na gabe
sungkunsungkun ima, boasa gabe Daging Hata i? Alusna, ala naung madabu tu
bagasan dosa manang haholomon do portibi on umbahen ringkot panondang i
marsinondang. Hata i gabe Daging laho manondangi portibi na dibagasan
haholomon, marlapatan doi ia haroro ni Jesus Kristus ima na laho mangalo
haholomon, jala on ma na gabe tujuan haroro ni Kristus hombar tu na sinurat ni
si Johannes. Di bagasan Kristus adong do sinondang i, Kristus i do panondang na
sintong, na manondangi nasa jolma.
Haroro ni Sipalua
(Mesias) nunga dibaritahon sian Padan Na Robi marhite soara ni angka
panurirang. Sahat do bagabaga i tu bangso Israel asa mamboan nasida tu haluaon
dohot hangoluan. Sai tarpaima do bangso i di haroro ni Mesias naung binaritahon
panurirang i, ala holan Ibana nama na boi paluahon bangso i sian parungkilon
nang sitaononna. Dung ganjang ariari na dibolus nasida, saut ma bagabaga ni
Debata i tu bangso Israel, ro ma Mesias i, Raja Hadameon, Raja na gok holong,
marhitehite Jesus Kristus. Nunga tung leleng nasida paimahon Mesias i, alai
dung ro Mesias i gabe ndang ditanda portibion Ibana. Sasintongna na ingkon
jangkonon nasida do haroro ni Jesus Kristus i, hape gabe ditulak nasida do. Ro
Mesiasi i naeng mamboan haluaon dohot hangoluan laos ditulak portibion do
Ibana.
Di turpuk on
didok, molo adong na manjanghon Ibana, dilehon Debata do huaso asa gabe anak ni
Debata nasida, angka na porsea di goar-Na. Adong do hadiah manang upa sijaloon
ni angka na manjangkon Ibana ima huaso jala asa gabe anak ni Debata nasida.
Molo hasomalan di parngoluon on, didok anak ni amongna, marlapatan doi adong
hubungan darah sian nasida. Alai molo didok gabe anak ni Debata, ima angka naso
tubu sian mudar manang sian sangkap ni daging, manang sian sangkap ni baoa,
tung sian Debata do. Na gabe anak ni Debata ima na olo mangulahon lomo ni roha
ni Debata, lumobi ma pangajarion ni Jesus Kristus. Angka anak ni Debata mangolu
do dibagasan haserepon ni roha, gabe tiruan do Kristus di angka anak ni Debata.
Gabe daging ma
Hata i jala maringan di tongatonga ni hita on. Ala so boi jolma mangolu di
bagasan habadiaon, sai tong mangulahon dosa, ro ma Mesias i, gabe Daging ma
Hata i. Haroro ni Mesias manang Raja i, naeng padengganhon hubungan ni jolma tu
Debata do ala naung sega hubungan i panghorhon ni dosa-dosa na niulahon nasida.
Jesus Kristus ro mamboan haluaon sian dosa, haimbaruon parngoluan, jala
hangoluan na saleleng ni lelengna. Haroro-Na dibagasan asi ni roha dohot
hasintongan ni Debata. Jesus Kristus ima Hata ni Debata na badia jala hot ro di
saleleng ni lelengna. Jesus Kristus ma Hata ni Debata na gabe Daging. Yesus Kristus adalah Firman yang
berinkarnasi, yang menjelma menjadi manusia. Arthur W. Pink mengatakan bahwa
yang tidak terbatas menjadi terbatas, yang tidak kelihatan menjadi kelihatan,
yang transenden menjadi imanen, yang jauh menjadi dekat, yang melampaui
pencapaian pikiran manusia menjadi dapat dilihat.
Jadi huida hami ma
hasangapon-Na, ima hasangapon ni Anak Sasada na sian Ama i (ay.14). Marhite
turpuk on dipatorang si Johannes do tu hita angka na porsea na rap do ibana
ujui dohot Jesus Kristus jala diida ibana ma hasangapon-Na i. Dihatindanghon
ibana do i muse di surat parjolo ni si Johannes na mandok : “Na adong sian
mulana, na hubege hami, na niida ni matanami, na hupanotnoti hami, jala na
jinama ni tangan nami, taringot tu hata hangoluan i” (1 Johannes 1:1). Di
turpuk i didok si Johannes do Jesus i “Hata Hangoluan” naung dibege, diida,
jala dipanotnoti ibana, jala rap do ibana dohot Jesus Kristus i. Panindangion
ni si Johannes on laho patoranghon tu angka na manjaha suratna manang saluhutna
angka na porsea, ia “Hata” i na sintong do gabe “Daging”. Tujuan panindangion
ni si Johannes on asa lam torop jolma na porsea di Jesus Kristus (Hata na gabe
Daging i). Ibana do Raja na tuat sian hasangapon-Na i tu portibion. Ibana ma
Raja na olo manesa dosa ni angka bangso-Na, ndang diuhum bangso-Na i alai disesa
do dosana marhite Holong-Na i. Ibana do Raja sipujion ni sandok portibion jala
na marsangap.
III.
Sipahusorhusoron
Turpuk ni epistel
di pesta natal na paduahon on naeng mangarahon hita angka na porsea laho
mangarajumi pambahenan ni Debata tu hita. Ala ni dosa-dosanta, umbahen ro do
Ibana sian harajaon-Na i tuat tu portibion. Gabe Daging ma Hata i jala
maringanan di tongatonga ni angka jolma. Ingkon tuat do Raja Na Sangap i holan
laho paluahon jolma pardosa. Ise do haroa jolma i umbahen dipalua sian dosana?
Sasintongna haroro ni Jesus Kristus ndang ala ni haburjuon ni jolma i umbahen
disesa dosana, alai saluhutna i ala basabasa ni Jahowa sambing do. Tung mansai
balga situtu do pambahenan ni Debata Jahowa marhite Jesus Kristus tu angka
pardosa na di portibion. Tama do Ibana sipujion jala tapasangap di sandok
parngoluanta. Ndang adong sahalak raja pe di portibion na sarupa dohot Raja
Hadameon i.
Tajangkon ma haroroNa i di bagasan ngolunta, ai manang ise na manjanghon Ibana dilehon do huaso jala asa gabe anak ni Debata. Las do roha ni jolma molo didok ibana anak ni Debata, antong jangkon ma haroro-Na di bagasan haporseaon na togu. Pasahat ma mauliate tu Ibana ala saluhutna pasupasu dohot pambahenan-Na di tongatonga ni parngoluanta. Pasahat ma i marhite ende pujipujian jala hatindanghon ma di humaliangta, haroro ni Kristus i (Hata na gabe Daging) mamboan haluaon dohot hangoluan tu portibion. Amen.
Post a Comment