Khotbah Minggu 31 Desember 2023 - Mundosaragi

Evangelium : Heber 13 : 20 – 21

Di Ibana Ma Hasangapon Ro Di Salelenglelengna

I.          Patujolo

Buku Heber dang goar ni na manggurithon buku on alai secara tradisional dihaporseai huria na parjolo na manggurithon ima apostel Paulus. Secara tradisional buku on digurithon laho mamodai, paposhon roha jala mangapuli halak Kristen Ibrani na adong dipangarantoan Italia na berbahasa Gorik, asa tongtong porsea tu Tuhan Jesus (13:24), siala hatihai masa pangalelean tu halak na Kristen. Dibuku on godang mancaritahon pangajarion ni Jesus dohot adat ni Jahudi.  Buku on marisi 13 bindu jala adong 303 ayat.  Digurithon hira-hira taon 67-69 Masehi di huta Miletus Italia (13:24). Jala ondolan ni buku on, ima patoranghon hasurungan ni Tuhan Jesus sipaluai.

 

II.        Hatorangan Ni Turpuk

Turpuk jamitanta on marisi poda dohot tangiang haluaon sian apostel Paulus tu angka na porsea tu Tuhan i diragam ni angka situasi namaol na niadopan nasida. Songon dia ruas ni Huria i ingkon tongtong holong rohana tu dongan (13:1), partamue (13:2), ingot di angka na tarhurung jala na manaon na porsuk (13:3), sangap dibaen pardongansaripeon unang diramuni (13:4), unang marholong ni rohatuhepeng, posrohatuTuhani (13:5-6). Ingot di  angka na manguluhon jala napaboahon hata ni Debata, unang muba roha songon Kristus na hot nantuari, sogot sahat rodi saleleng ni lelengna (13:7-8). Unang olo diela-ela poda haliluon, pos roha tu huaso ni Tuhan Jesus (13:9-15), unang lupa mambahen na denggan dohot ulaon asi ni roha (13:16), tangihon jala oloi angka na manguluhon hamu (13:17). Tangianghon angka na marhaladoi hamuna asa margogo ibana diulahon marhaladoi  (13:18-19).

Adong hata na mandok: Ndang mangkuling sada tangan laho martopap, maksud ni hatai mandok ndang mungkin adong pangkuling ni partopapon molo so sauduran manang dua tangan. Suang songoni ma, ndada mungkin jalaoonta asi ni roha ni Debata si pardamei molo hita sandiri dang olo sauduran manang sadalanan dohot sangkap ni Tuhani. Diayat 20 on tangkas dibaritahon apostel i tu hita ise do Jesus i? Adong piga-piga pandohan na dipangke apostel i laho patoranghon ise do Jesus i dibagasan turpuk on, ima : Θεοςτήςείρήνη (theosteseirenes, God of peace) namarlapatan Debata sipardame, Ποιμένα τώνμέγας (poimena ton megas, shepherd of the great) namarlapatan siparmahan bolon, jala ΚύριοςέγώΙέσούς (kuriosego Iesous, Jesus lord of us) namarlapatan Jesus Tuhanta. Lam tangkas ma taboto, ia Jesus ima Debata Sipardame, parmahan bolon jala Tuhan. Asai unang be ganggu hita dihaporseaontai, siala lam leleng sai lam martamba do poda haliluon napasoadahon haDebataon ni Jesus. Diayat 21, tangkas dipaboa apostel i Jesus i do upanta, Jesus i do gogonta, Jesus i do na patauhon hita asa tongtong hita patupahon ulaon na denggan jala halomoan ni roha. Hata patauhon dihata gorik dipangke hata καταρτίζω (katartizo, euip) namarlapatan: Mandongani, pahothon, patandaphon, mangalinggomi. Artina, sian hata kartatizoon boi ma antusan: Molo holang ngolunta sian Jesus, tontu ingkon angka na ramun jala na roa ma angka parbue ni ngolunta. Alai molo hot jala manontong do hita dibagasan Jesus i, angka nauli jala na denggan ma parbue ni ngolunta.

III.       Hahonaan Ni Jamita

Goar ni minggunta sadarion ima ujung ni taon, jala ondolan ni jamitanta ima: Di Ibana ma hasangapon ro di saleng ni lelengna. Molo sahat hita di ujung taon on, tontu nunga tabolus pardalanan sataon bolon na gok las ni roha, gok arsak jala habot ni roha. Alai nang pe songoni, boi do hita taripar sahat diujung ni taon on, molo tarimangi sada halolangan bolon do i na sian Debata tu ngolunta ganup marsada-sada. Laos marhite-hite angka na masa na nunga tabolus i boi ma antusanta, ai dipangke Debata do sude angka na masa; las ni roha nang habot ni roha laho patulushon sangkapNa tu hita ima sangkap haulion dohot hadengganon, nasipata jotjot maralo tu sangkap ni rohanta. Nunga diparmudumudu Tuhan i hita sahat tu ujung ni taon on, antong aha do balosnai talehon tu Tuhani? Ndada sere manang perak na dipangido Tuhan i sian hita, alai tapasahat ma nasa hasangapon saleleng ni lelengna. Pasahathon sangap tu Tuhan i, ima marhite-hite taulahon lomo ni rohaNa ima ulaon na dengan, jala tapadao sogo ni rohaNa ima ulaon dosa. Jala ulaon pasahathon sangap tu Tuhan i ndada ulaon parsatongkinan, manang ulaon sian roha-roha na mubauba. Alai ingkon saleleng ni lelengna, molo dihata gorik di pangke hata αίών ό αίών (aionhoaion, ages of the ages) na marlapatan hot, so mubauba. Nasa na ditano on boi sambing muba, taon, ari, bulan, tingki mubauba. Alai sada na so boi muba sian ngolu halak na porsea ima : Mangulahon na denggan, jala padaohon diri sian ulaon dosa. Amen