JUMAT AGUNG, 29 MARET 2024 - Mundosaragi

 

DIBUNGKA JESUS DALAN NA IMBARU TU HANGOLUAN (Heber 10: 16 – 25)

I.                   Patujolo.

Di ari Jumat on tapatupa do parsaoranta di ganup Huria laho patupahon parningotan ni ari hamamate ni Tuhanta Jesus Kristus di hau silang i. Diporsan Ibana do dosanta jala diae Ibana do angka parungkilon dohot insak-insak ala ni dosanta. Ai dilehon Ibana do hosaNa humophop hita jala pola mate di hau silang laho mangalehon haluaon tu saluhut bangaso na tinobus na i. Sangkal hatuaon ni Debata do i, asa ganup jolma na porsea malua sian parhatobanon ni sibolis, jala asa ganup na porsea ndang mate hinorhon ni dosa i. Didok Apostel Paulus do marhite partinaonan ni Tuhanta Jesus laho padamehon diriNa dohot angka jolma (pat.2 Korint 5:18). Jala marhite panurat ni Heber on dipabotohon do ianggo partinaonan ni Tuhanta Jesus Kristus laho mambuka dalan na imbaru tu hangoluan. Sangkap hatuaon ni Debata do i, ndada alani jolma. Ditobus Debata do angka dosa ni jolma i marhite hamamate ni Tuhanta Jesus Kristus di hau silang i laho papatarhon asi ni rohaNa tu saluhut manisia. Suang songoni do nang Apostel Paulus manongos suratna tu huria Efesus laho paboahon songon na tarsurat di surat Heber i. Alani asi ni roha ni Debata na nilehonNa marhite haluaon tu ganup jolma asa malua sian gomgomam dosa laho patubuhon haporseaon, ndada alani parulaon ni jolma i, saluhutna i silehon-lehon Debata do, siala ni i ndang pola marginjang ni roha hita disi. Marhite silehon-lehon ni Debata i naeng ma tongtong hita ro tu adopan ni Debata dibagasan serep ni roha dohot haporseaon na manongtong, jala togu laho manghatindanghon Ibana huhut mangolu dibagasan holong na sian Kristus.

 

II.                Hatorangan ni Turpuk

Ale angka dongan na ni haholonganni Tuhanta Jesus Kristus, "Diungap Tuhanta i do dalan na imbaru tu hangoluan". Boha do ulaning pandohan ni hata on?

1.        Diungkap Tuhanta Jesus do dalan na imbaru tu hangoluan marhite partinaonanNa (ayat 16- 19). Sian mulana i nunga Sega hubungan komunikasi ni Debata dohot jolma i hinorhon ni dosa. Ndang adong nanggo sada na boi pangaluan ni jolma i laho paturehon hubungan ni Debata dohot jolma i. Nang pe ganup tongkin jolma i patupahon pelean situtungon, ndang pintor boi muba hubungan i gabe mulak songon na pinikiran ni jolma i. Ndada alani Gogo manang pambahena ni jolma i laho patupahon hasesaan ni dosa. Naeng dohonanNa tu hita hasesaan ni dosa i holan Debata sambing do na boi patupahon i. Alani i di hamu angka dongan, ise do ulaning na boi paturehon hubungan ni Debata dohot jolma i? Holan Tuhanta Jesus Kristus i do Ima anak ni Debata na mangungkap dalan na imbaru i. Ibana do na mamelehon diriNa laho padamehon jolma i tu Debata asa mulak denggan songon na ni halomohon ni Debata sahali jala manongtong ro di saleleng ni lelengna. Marhite Ibana, hubungan ni Debata dohot jolma i dipadenggan, dosa ni jolma i pe disesa; jolma i pe ditobus jala dipalua gabe mulak imbaru ma hubungan ni jolma i maradophon Debata. Saluhutna i alani asi ni roha ni Debata maradophon jolma i. Antusanta ndang adong campur tangan ni jolma i disi. Apostel Paulus pe mandok "ai Sian asi ni roha do, umbahen na malua hamu, dalan haporseaon; jala ndada binahen muna silehon-lehon Debata do, nda tung sian parulaon i, asa unang adong na mamuji diri (Efesus 2:1- 9).

2.        Tuhan Jesus Kristus digoari gabe malim na bolon (ayat 21). Hasomalan ni halak Israel laho mangulahon angka ritual ugamo nasida diulahon do i dibagasan joro, jala disomalhon do diangka ajaran nasida ndang boi secara langsung berkomunikasi tu Debata jala saluhut angka

panombaon dohot pelean nasida ingkon marhite malim. Dihaporseai nasida do molo so marhite malim, angka pelean dohot panombaon nasida i dianggap ndang sah. Marhite angka pelean situtungon dohot angka pelean na asing na pinasahat tu malim dianggap do i boi laho manesa dosa. Konsep sisongonon berbeda dohot konsep na binahen ni Tuhanta Jesus Kristus. Hamamate ni Tuhanta Jesus Kristus di hau silang i, ido na manesa dosa ni saluhut jolma, dipatupa sahali jala manongtong ro disaleleng ni lelengna. Ido dibahen didok Jesus do mambuka dalan na imbaru tu hangoluan ni portibi on. Ido umbahen digoari Ibana gabe Malim nabolon, Sigomgom Bagas Joro. Tuhan Jesus do namanesa dosa; diparbadiai saluhut jolma, dipauba jolma i jala dipintori asa gabe jolma na talup mangadop tu Debata. Marhite mudarNa do ganup jolma na porsea boi secara langsung berkomunikasi dohot Debata di inganan habadiaonNa. Dibagasan goar ni Tuhanta Jesus Kristus ndang adong be parhitean tu angka malim diportibion. Ai nunga sada hita dohot Malim na bolon i Ima Tuhanta Jesus Kristus. Disurat ni si Johannes didok do Jesus Kristus do dalan dohot hangoluan jala ndang adong na sahat tu Ama i molo so ingkon marhite Malim nabolon i ima Tuhanta Jesus Kristus (pat. Joh. 15:7).

 

Ale angka dongan nunga patar be haluaon na binahen ni Kristus i tu hita. Siala ni i marhite turpuk on adong tolu na naeng siulahonnon ta na ni hirim ni panurat Heber on ima:

1.      Marroha na sintong dibagasan hagogok ni haporseaon jala ndang manadinghon parpunguan ni haKristenon (ayat 22,25). Diondolhon do tu hita saluhut na asa Unang manadinghon parsaoran dohot parpunguanta dohot Debata asa lam tang haporseaonta laho mangadopi angka parsorionta.

2.      Momos ma tatiop panghirimon (ayat 23). Pandohan on na marlapatan asa ganup na porsea dibagasan Kristus ndang madabu tu bagasan pandelean jala tongtong marsigorgor tondina laho manghatindanghon goar ni Debata disaluhut pargulmitan ni ngoluna Nang pe ro hagogotan tongtong pangolu dibagasan panghirimon na sian Kristus i.

3.      Masipajujuan tu haholongon dohot tu angka ulaon na denggan (ayat 24). Tona na patoluhon on tung mansai ringkot do on dingolu na manghaporseaon Kristus i. Natargoar situtu halak Kristen jala porsea dibagasan Tuhan ingkon do manghangoluhon holong ni Debata na balga i dibagasan ngolunta Nang dihumaliangta. Sebagai halak Kristen Hita ingkon boi do songon Aek na mangolu jala mabaor tu humaliang manghorhon tu angka ulaon na denggan. Naeng ma tongtong marsihaholongan songon holong ni Kristus i tu hita na mate humongkop hita pardosa baen hasesaan dohot haluaon na salelengnilelengna.

 

III.             Panimpuli

Marhite parningotan ni hamamate ni Tuhana Jesus Kristus on naeng dohonanNa tu hita, ia hata ni Tuhan na nunga tatangihon on ndada holan barita na uli sambing alai naeng auhononta dingolunta ia hamamate ni Jesus Kristus laho mangalehon dalan na imbaru tu hangoluan na manongtong. Ro ma Hita mangadop tu Debata dibagasan toruk ni roha laho pasahathon dirinta asa lam jonok hita dohot Debata, patupahon jala mangulahon saluhutna i marhite hagogoon ni Tondi Porbadia. Amen.