Na Manahan Ro Di Ujung, Ido Paluaonna
Orang Yang Bertahan Sampai Akhir Akan Selamat
Matius
24: 9 - 14
1.
Patujolo
Sada sipaingot
do hata ni Debata di Mateus 24 on, i ma na manogihon sisean ni Jesus laho mangantusi na naeng masa marhite
pangajarion na pinasahat ni Jesus tu nasida. Pangajarion i, i ma taringot tu na naeng masa siadopan
ni angka sisean songon i nang di angka na porsea tu joloan on. Laos ditogihon
do nasida asa olo marsiajar, songon dia do sikap laho mangadopi angka na naeng masa i. Di pabotohon do dijolo ni
turpuk on, ia pangajaran i dipasahat
Tuhan Jesus uju hundul nasida di dolok Jetun (ay.3). Dipatuduhon Tuhan Jesus ma tu nasida bagas joro na tung mansai uli situtu tatapon nasida sian atas ni
dolok i. Didok ma tu nasida “Diida
hamu sasudena i? Situtu do na hudok on tu hamu; ndang pasombuonna sogot disi dua batu martinditindi na so gargaronna”. Na naeng dohononna
disi na boi marongso do angka
bagas joro na uli i, na pinajongjong marhite hamaloon ni angka jolma dohot marhite angka na sinadongan na adong, uju dihasangaponna dope jolma i patupahon i.
Ndang manongtong haulion angka na binahen
ni jolma i diangka na patupahonsa marhite na mangasahon hadirionna, ai
gabe madabu do nasida tu ginjang
roha. Roha diri nama na pinauliuli nasida dingoluna dalan mangeahi hasangapon, gabe lam ganda
jolma i (pat. Joh. 3:30 “Ianggo Ibana patut lam ganda, lam moru ma anggo ahu”). Ingkon i ma nian na suan dihaporseaon ni jolma na rade patupahon na denggan di ngoluna. Haulion bagas joro ndang menjamin uli nang parsaoran di bagasanna, boi do na pinatuduhonna disi rumang ni ngolu dihaporseaon na holan marnida hinauli ni bagas joro sambing
(bangunan na pinauli ni tangan ni jolma). Ndang na mandok ndang boi bagak/uli bangunan ni bagas joro, alai unang ma alani bangunan i na
mangonjar hita ro
marsaor disi. Ndang Debata be na marsangap marhite parsaoranta disi.
Godang dope angka
na naeng masa, jala sasudena i didok Jesus parmulaan
ni pambebeonna i dope (ay. 8). Umbege i, dipatangkas nasida ma muse andigan partingkian dohot aha do tanda ni na naeng masa i, asa boi mangarade sisean i.
Alai dipaingot Jesus nasida asa
tongtong jaga, ala ro ma angka na manoluk goar ni Tuhan i na mandok “Kristus
i do nasida” hape na naeng mangaliluhon do. Dison ma tampil angka
sisean i mamboan barita haluaon i
dohot mamaritahon huaso ni haluaon i dibagasan Tuhan Jesus Kristus.
2.
Hatorangan ni Turpuk
Ringkot do ngolu na
rade jala jaga di angka sisean nang angka na
porsea di Tuhan i, laho mamaritahon barita nauli dipartingkian na sai mubauba. Songon i do nang di hamajuon jaman na torus
berkembang laos adopanta do nang tantangan
na boi masa panghorhon ni hamajuon i. Hasintongan, ido barita nauli na ingkon tongtong baritahonon ni angka
siihuthon Kristus. Alani i barita
nauli ndang dipengaruhi/ditontuhon
angka na binahen ni jolma. Nabinahen ni jolma di ngoluna, ido
parbueni barita nauli i. Sandok,
tugas ni angka na porsea ima namamaritahon barita nauli diangka partingkian. Ingkon baritahononhon do i, denggan
manang so denggan partingkian (pat. 2 Tim. 4:2, “Jamitahon hata i, hajongjonghon ditingki
na une nang na so une; pinsang,
paingot, apoi marhitehite nasa lambas ni roha dohot pamodaion“). Ala boi masa do tutu dipardalanan ni
huria i rumang ni pangalaho na
mamboan hasesega di ngolu partondion, alai tugas
ni angka na porsea do mamaritahon
barita nauli i dohot hagogoon ni huaso ni barita nauli i.
Ayat 9 – 10,
sian dia do ro haporsuhon i?
Haporsuhon do
taonon ni jolma na sai manenganengahon angka na binahenna, na so marlomo ni roha
diangka na denggan na binahen
ni donganna, na so mendukung
di haimbaruon na ingkon
sipatupaon, dohot
lan angka na asing. Ujungna, gabe adong ma na
so marlomo ni roha, ndang mardongan be jala masa ma parbolatbolaton, holan alani angka na pinatupana. Tubu ma disi ngolu na; masihosoman, masipusaan,
marporang, dohot lan na asing na
mambahen gabe torop angka na targasip jala masijehean. Lam torop situtu martumbur parjahat, hape jolma na burju lam moru bilanganna, ai lam jorbut na masa na
marragam di jolma i gabe ngali situtu holong i. Ndang holong i be na mangihot dingolu ni jolma, alai angka na nieahan i
nama, ima; hasangapon na dirajumi boi
pauliulihon ngoluna. Porsuk situtu do ngoluni
angka na so mian dibagasan holong, jala na mangarotaki holong i dalan mangeahi
haulion (tamatama berengon).
Ayat 11 – 12, angka ise do na ginoaran panurirang
pargapgap? Panurirang pargapgap do angka jolma na sai paroaroahon na denggan na binahen ni donganna, ndang
menghargai karya na denggan na pinasahat ni Tuhan i tu ganup jolma. Nuaeng lam torop
do angka na mandok dirina
siihuthon Kristus, alai ndang marparbue anggo haporseaonna. Holan mangkritik donganna
do diula sai hira so adong na binahen ni dongan, hape na binahenna
do na so adong. Dipengaruhi do angka na torop asa patangitangi hatana.
Songon i do nang na masa di hamajuon saonari,
nunga torop angka jolma holan
terdaftar do anggota gereja
alai marminggu ndang binoto tu dia, asa unang ditunggu
kewajiban selaku ruas ni huria. Apalagi molo disungguli taringot tu tanggungjawab, pintor tangihonon ma sian nasida hata on: “holan na hepeng do di HKBP on” hape haru peleanna
pe ndang hea dipasahat nunga barani mandok songon i. Alai molo marsahit manang
ise sian keluargana, hurang hatop ro huria i pasahathon ulaon
diakoni. Akkal nama dipangke jolma mangulahon halong
(holong na marpambuat), molo so so paruntungan tu dirina, ndang ringkot
ulaon i. Uhum “holong” na ni ajarhon
ni Tuhan Jesus
Kristus, “sihaholonganmu do donganmi doshon dirim” (Mat.
22:39) dohot “Nasa na binahenmu
tu sada sian anggingKu angka
na metmet on, na tu Ahu do i dibahen
hamu” (Mat. 25:40).
Ima
barita nauli i,
ndang marhuaso malomalo/angkal ni jolma laho
mangambati barita nauli i. Angka na mangambatisa, ido na luangan.
Angka na manahan
ro do ujung, i do paluaonNa
(ay. 13-14)
Na marsiadu
do hita dihaporseaonta i, jala ingkon dibagasan
pos ni roha do hita manghirim
nang pe mangadopi ngolu na porsuk situtu
alai benget ma hita manaon diparsiaduonta i. Marroha na sintong ma hita dibagasan haporseaon mangulahon na denggan na niajarhon ni Tuhan i, ai angka i do na
hinalomohon ni Debata. Momos ma tatiop panghirimon na taparhatopot i, ai haposan
do na marbagabagahonsa,
lehononNa ma upa tu angka na manjalahi Ibana
(Heb. 11:6 “alai anggo so marhaporseaon, ndang tarbahen halomoan; ai halak na mandapothon Debata ingkon dihaporseai: adong Debata; laos Ibana do silehon upa tu
angka na manjalahi Ibana”).
3.
Panimpuli
Dihajongjongan ni
huria na parjolo na pinaboa ni angka apostel,
godang do angka hamaolon na niadopan ni angka na porsea uju mamaritahon barita nauli di tongatonga ni pangalaho na marragam
di hajolmaon. Torop do halak kristen na manaon na porsuk, na ditangkup, na dijehehon, na mate martir ala barita
nauli i. Di situasi na songon i, ndang gabe mansohot barita nauli i baritahonon. Unang mansohot hita
mamaritahon barita nauli i, jala manang aha pe na masa alai sudena i
paingothon angka na porsea asa lam marsinondang ala sondang ni Kristus i do na manondangi
ngolunta. Jala sada na ingkon tongtong ingoton ni hita angka na porsea ima, ingkon manahan
ro di ujung i do ngolunta, asa tung sahat hita tu parsaoran na manongtong i. Ndang
pasombuonNa hita, “Ai ida ma, sai na dongananKu do hamu ganup ari, rasi rasa ro
ajal ni hasiangan on” (Mat. 28:20b).
Ndang haambatan
portibi on hararat ni barita nauli i, jala ndang sangkap ni hajolmaon molo tung pe boi jongjong gareja di sandok portibi
on. Debata do na mangalehon partingkian i di ngolu ni
jolma na pajongjonghon. Alai molo so mian do Debata di parsaoran i, loja sambaing
do angka na mamandei. Ai Jesus Kristus
do joro ni Debata na pinajongjongNa dibagasan
3 ari (Mat. 24:1-2, Joh. 2:19-20), alani i lam mangula ma holong i dingolunta ganup. Ai holong i do na mambahen
uli ngolu ni angka na porsea tu Debata dibagasan Jesus Kristus.
Post a Comment