Jamita Evanggelium Minggu 3 Agustus2025, 7 Dung, Trinitatis - Mundosaragi

 

 Jamita Evanggelium Minggu 7 Dung, Trinitatis

3 Agustus 2025 Kolose 3:5-11

GABE JOLMA NA IMBARU DI BAGASAN KRISTUS

Patujolo dohot Sibonsiri

Nian ndang apostel Paulus pajongjong huria Kolose, si Epapras de namanghobasi disi. Gari dang hea dope si Paulus tu Kolose hatiha i (Kol.2:1). Alai na to do si Epapras, sahalak naposo ni Kristus jala jolma haposan, pabotohon tu Paulus taringot tu huria Kolose (Kol.1:6-8) ni roha mida angka nabadia, marparbue do barita nauli i jala lam ganda, Denggan do di mulana i huria i, marhaporseaon tu Kristus, parholong pola gabe mandok mauliate apostel Paulus tu Debata umbege barita I (1:4-8).

 Alai ndada holan angka nauli sisongoni dipabotohon si Epaprastu ap Paulus aleale saulaon i, dohot do tahe parsorion naniadopan ni huria Kolose nuaeng. Na to do angka pargapgap, parpoda haliluon mamodahon angka poda na lilu, angka na so sintong (guru-guru palsu mangajarhon ajaran-ajaran yang tidak benar), asing sian barita nauli (injil) naung niajarhon hian, didok nasida:

a) Asa tung dimpos panandaon tu Debata jala, asa parjambar di haluson i, ingkon dohot do huria i manomba angka tondi namarhuaso, na so tarida i, namaot-aot di hasiangan on.

b) Marhite namangulahon angka aturan i do dapot haluson, isara ni patik, parsunaton, upacara agama ari rea (hari raya), manghasubanghon sipanganon subang, lan naasing dope. Angka i do na paro haluaon sian hanua ginjang. Alani i ma targerak roha ni apostel Paulus manurathon surat Kolose on dohot tanganna sandiri (marsurat tangan- Kol. 4:18)), nang pe uju di hurungan dope ibana (Kol 4: 3,10,18), di Roma (Ul.Ap 28:16-31) hatiha paima naik banding tu Kesar (Ul.Ap 25:11-12). Jala si Tikhikus do mamboan dohot pasahathon surat i tu huria Kolose (Kol 4:7).

Hatorangan

Bunu Hamu ma hajahaton na di bagasan ruasmuna (:5)

Doshon hira namangolu do angka ulaon hajahaton i, umbahen didok apostel Paulus di ayat 5 on; "Bunu hamuma" (matikanlah). Ai ido tutu, tu namangolu do didok hata mamunu asa mate. Di hata Yunani dipake nekrosate lapatanna mematikan dan menyingkirkan, membuang menghapus. Jadi maksud ni Paulus; mamakke hata nekrosate mandok ndada holan mamunu alai dohot do mangambolonghon manang manesa nang sian parningotan, unang be marbokkas. Ai adong do jolma sai dipaingot-ingot dope angka dosana na jolo gabe sipata naeng diula muse. Alani i asa unang rap mangolu duansa, ima haporseaon i dohot hagiot ni hajahaton, poda nalilu i dohot hata ni barita nauli i dibagasan daging ni hita jolma manang di huria.

Molo tapatudos, adong miripna tu parumpamaan ni Jesus di Mateus 13:7. Rap mangolu eme dohot sihupi, Ala songoni, gabe marpengpeng ma eme i dipisat mate. Molo nuaeng i, boi dohonon gabe dang denggan parbuena, manang olo diallangi bagudung. Songoni nang sarindan (benalu) molo dipasombu mangolu di hau namangolu, boi do ujungna mate hau i, nangpe umbalga hian do hau i. Angka dia ma buroha hajahaton namisat ngolu ni jolma i? Di ayat 5 didok; parmainanon, hahodaron, riting ni roha, hisaphisap na roa, ro di pangahution, i ma pardebataon na leban.

Songoni do ujung ni ngolu ni sada jolma, molo sai dipasombu mangolu di bagasan dirina manang pikkiranna angka rumang ni dosa hajahaton. Gabe dipisat (dirongrong) angka hajahaton i haporseaon, holong dohot panghirimoni, molo rap dipeop poda nalilu dohot barita nauli. Antong asa denggan marparbue haporseaonta, tabunu ma hagiot najahat i, taambolonghon jala tapaholang ma sian angka hajahaton i dungi boi ma imbaru ngolunta, ihutna gabe boi ma taula angka nadenggan.

Angka Ulaon naparo rimas (murka) ni Debata (:6)

Ndang adong jolma nalomo rohana hona muruhan tarlumobi ma hona rimas ni Debata. Sai ditahi do gabe jolma natarpasu-pasu. Ai ndang adong jolma naboi manahan molo tarrimas Debata. Ai molo tarrimas Tuhan i, ripas (binasa) ma nanirimasan jala rahat ma jolma i mate, patudos 2 Musa 32:10 "... marsigorgor rimasHu mangonai tu nasida jala huripashon nasida...." Aek nasumar i pe tanda rimas ni Tuhan i do i (1 Musa 6), uju Israel di parhorsihan ala pangalo ni bangso i, rimas Tuhan i pola torop jolma mate (4 Musa 11: 33). Nian lambat tarrimas do Debata jala parasi roha godang, songon natarsurat di Psalmen 86: 15; 103:8, alai ndada naso olo Debata muruk jala tarrimas.

Paulus mandok; ia angka ulaon hajahaton na di ayat 5, ima angka naparo rimas ni Debata. Hona rimas do angka na so olo pauba jala paimbaru rohana. Alai tu hangoluan na gok las ni roha salelenglelengna do ianggo angka jolma naolo pinaimbaru jala naung marhaimbaruon.

Muba Najolo gabe tu Nuaeng: Mangambolonghon naroa gabe manolukhon haimbaruon (:7-10)

Hata (Istilah) pinakke ni apostel Paulus mandok jolma pardosa ima jolma 'najolo (dahulu), alai angka naung marhamubaon, marhaimbaruon, digoar ma jolma 'nuaeng" (sekarang). Didok tu huria Kolose, najolo diulahon hamu do angka hajahaton i uju mangolu di bagasan angka hagolapon (durhaka). Alai tanggo nuaeng nunga dibolongkon hamu saluhutna i. Jadi hamubaon ni jolma, nda ala namarganti sisik (kulit), alai marganti pangalaho, mangambolongkon hajahaton.

Tanda ni jolma naung marimbar sian najolo gabe jolma si nuaeng di bagasan Kristus, ima marhite, namangambolonghon: rimas, muruk, hajahaton, panginsahion hata barangsi sian pamangan, pargabuson. Alai ndang tung holan mangambolonghon angka pangalaho hajahaton i ingkon do diuduti dohot marpangalaho nimbaru. Di bukku Rom 12:9 Hagigihon hamu ma na jat; pareak hamu ma na denggan! Isarana, najolo siula gabus, alai nuaeng manghatahon hata na sintong.

4. Ndang Mardiaimbar be Jolma di bagasan Tuhan i (:11)

Angka ise do ruas ni huria Kolose i? Marragam do jolma di huria Kolose. Mangihuthon hatorangan ni apostel Paulus di ayat 11, didok adong halak Junani, Jahudi, na marsunat, na so marsunat, hatoban manang anak mata, bangso na leban (Barbar), manang bangso na so maju dope (Skit). Alai manang sian dia pe haroroan ni jolma i, molo naung di bagasan parrohaon na sian Kristus do ibana jala imbaru, ndang marimbar be saluhutna i. Sada nama hadirionna di huria i, asa unang be i bonsir ni parbolatan. Asal ma di bagasan Tuhan ngoluna jala marhaimbaruon, taruli do di hangoluan nasalelelengna sian Jesus i. Catatan: a) Halak Barbar (Yunani; Barbaros) ima kelompok masyarakat tardok hurang beradab, primitif. jala tu negatif do pangantusion molo didok halak Barbar. Lapatanna; ndang halak Yunani (Gorik). Molo halak Roma mandok berarti non Romawi, b) Halak Skit ima jolma na sian wilayah Skitia sekitar laut hitam dohot laut azov. Molo nuaeng wilayah on di Ukrania, Rusia dungkan Utara ni Turki. Najolo angka pengembara jala parhoda do halak Skit on najolo (zaman kuno), jala paradaton hasomalanna (budaya, sistim) pe unik do, asing sian angka bangso nadisi.

Hahonaanna

1.      Tabunu (tapamate) ma hagiot ni hajahaton i, unang rap magodang i dohot haporseaon di dirinta. Taambolongkon ma angka poda lilu i, asa unang rap mian poda nalilu dohot barita nauli di bagasan ngolunta manang di bagasan huria asa unang tarpisat nadenggan i.

2.      Dipangido hata ni Tuhanta do, ndada holan mansohot (maradi) hita sian hajahaton, alai ingkon ma diuduti marpangalaho dohot mangulahon nadenggan.

3.      Saluhut jolma naung manghangoluhon barita nauli na sian Tuhan i, partohap do ibana di adopan ni Debata dohot di huria. Manang sian dia pe haroroanna; halak Gorik manang Jahudi, Barbar manang Skit, Hatoban manang anak mata, namarsunat manang ndang, ai tu saluhut jolma do ro Jesus jala tarsilang, asa mangolu ganup jolma namanjanghon Ibana dohot mangulahon HataNa.

4.      Tapauba ma roha dohot ulaonta gabe marhaimbaruon. Ai molo sai mangolu di hajahaton, ido naparo rimas ni Tuhan i. Antong muba ma hita, asa dao rimas ni Debata, jala gabe jolma natarpasupasu hita tu joloan on, Amen.