HAMORAON NI ASI NI ROHA NI DEBATA

Evangelium : Epesus 1:3-14

HAMORAON NI ASI NI ROHA NI DEBATA

Patujolo

 Torop do sai tarihot tu materi manang arta na godang pingkiran ni jolma molo dibege hata mamora manang hamoraon. Lumobi ma halak hita Batak ala pangkorhon ni filosofitta, ima; hamoraon, hasangapon, hagabeon. Molo adong sasalahak mandok na mora manang mamora ibana alai  ndang adong dihadihana; isarana jabuna pe ndang adong, mangkontrak do, tanona pe ndang adong, dohot angka sinamot na asing, ra didok do i na so mananda dirina. Ima molo orientasi  portibi. Di bagasan turpuktaon dipahembang do pangabahanta, paboa hamoraon i ndang sai tarihot tu materi atik pe tung na ringkot situtu angka ondeng alai hamoraon i mangalompoi orientasi portibi, ima hamoraon na berorientasi tu hubunganta dohot Debata di bagasan Jesus Kristus. Hamoraon na berorientasi di hubunganta dohot Debata, ima pasupasu partondion naung tajalo di bagasan Jesus Kristus. Dipillit jala dijou hita angka na porsea di bagasan Jesus Kristus gabe anak dohot boruna dalan asi ni rohaNa jala gabe sitean na binagabagahonNa. Ngolu na mangongkhon naung manjangkon hamoraon marhite/ di bagasan asi ni roha ni Debata tung marpangontak do i di saluhut hadirion ni angka na porsea di sianup ari jala di dia pe ibana maringanan. Ai rajumanna do, marparange na tama, ima parbue ni ngolu naung taruli asi ni roha ni Debata.     

 Hatorngan ni turpuk

 1). Debata do haroroan/ mual ni pasupasu i (ay. 3). Debata,  Ama ni Tuhanta Jesus Kristus do haroroan ni pasupasu partondion i. Ibana do na patupahon, paradehon jala na umbasabasahon tu angka na porsea di Tuhanta Jesus. Pasupasu partondion i, ndang na masialoan i tu pasupasu pardagingon manang material. Na naeng ondolonona di si i ma paboa na marharoroan sian banua ginjang do pasupasu i jala marhite Tondi Parbadia do i sahat tu hita. Hasasahat ni pasupasu i tu hita ima marhite manang Tuhanta Jesus Kristus, ai parbue ni panobusionNa do pasupasu i. Tung mansai tangkas do diondolhon ulaon ni Kristus di turpuk jamitaon.

2). Ragam ni pasupasu partondion i (ay. 4-14), ima;

2.1. Pamilliton ni Debata di angka na porsea (ay. 4). Ndada ala naung badia jala so hasurahan hita umbahen dipillit Debata gabe bangsoNa. Pamilliton i do patauhon hita badia jala so harusahan. Ia lapatan ni mamillit manang manodo i ma papulikhon hita sian tongatonga ni portibion di bagasan asi ni rohaNa tu sada tujuan hombar tu lomo ni rohaNa. Isarana, si Abraham (1 Musa 11:31 – 12:7), Israel (2 Musa 3:6-10), angka na porsea i ( 1 Petrus 2:9). Torang diondolhon di ayat 4 on, ia  ojahan ni pamilliton i ma holong ni rohaNa. Ia tingkina manang sadiharina dipillit hita, ima andorang so ojak dope hasiangan on.

 2.2. itodo hita gabe anakNa (ay. 5). Haanakon ni angka na porsea i ma pangainon ni Debata di angka na porsea i marhite Kristus. Mangihuthon Roma 8:14-17, tolu hak istimewa ni sada anak; na parjolo, marparsaoran na solhot tu amana; na paduahon, ndang be di bagasan biar, ai nungnga dilehon tu rohanta Tondi Parbadia i (Rom 8:15, Gal. 4:5); na patoluhon, gabe panean di arta na pinarade ni Ama i.

 2.3. Dapot hita haluaon dohot hasesaan ni angka dosanta di bagasan asi ni rohaNa (ay. 7-10). Diondolhon do di son balga ni asi ni roha ni Debata ima haluaon  manang panobusion marhite mudarNa. Tung patar situtu do panobusonNa di ngolu ni angka na porsea. Molo taauhon do balga ni sitaonon ni Kristus na mate tarsilang laho mangkophop hita, pola durus mudarNa gabe lam ta antusi ma  balga dohot buas ni asinirohaNa tu ngolunta. Asi ni roha na mamunjung do i rajumanta. Di Epesus 2:7 dibagabagahon dope surung ni hamoraon ni asi ni rohana i di angka tingki na naeng ro. Sian asi ni rohaNa do umbahen na malua hita (2:8). Diuduti muse  paboahon na buas do diusehon tu hita asi ni rohaNa i, alani ndang hurangan hita, ai mardongan hapistaran dohot habisuhon godang do i diusehon (ay. 8) jala naung sian tahiNa hian do i (ay. 9). Tahi ni roha ni Debata i ma pasadahon di bagasan Kristus sasudena na di banua ginjang dohot na di atas tano on di hagogok ni tingkina (ay. 10). Asa ndada holan di ngolu ni na porsea i manang di tongatonga ni huria na hinangkam manang jangkauan ni panobusion ni Kristus, tung saluhutna do. I do tahi ni Debata maradophon sandok portibion. Kristus do pusat ni huria (ay. 22), sejarah dohot sude na di banua ginjang nang na di atas tano on, ima sude nasa huaso na adong. Saluhutna i unduk tu Kristus, jala dipasada muse di bagasan Kristus. Di tongatonga ni pluralis ugamo (ugamo na marragam), diondolhon di turpuk on hagogoon ni Kristus na mangatasi sasude dohot hahomion ni ulaonNa. Mandapot di Kristus do muse hasadaon ni sude na tinompa i, ruang dan waktu, pardalan ni sude sejarah. Kristus do hapatean ni sude huaso na di portibion nang na di banua ginjang. Marhite Kristus do ditompa saluhutna na di ginjang nang na di tano on; na tarida nang na so tarida, angka habangsa, angka harajaon, angka parhuasoon jala saluhutna i marhapatean tu Ibana. Sian Kristus do saluhutna jala marhapatean tu Kristus muse, dipasada muse di bagasan Kristus (Joh. 1:1-3, Kol. 1:16).

 2.4. Dapotan partalian hita di bagasan Kristus (ay. 11-12). Pasupasu partondion muse na pinaboa ni ayat on ima, parsidohot hita manean, manang dapotan partalian di siteaonon; rap partohap hita di arta siteaonon ni angka na porsea i (ay. 14, 18; Kol. 1:12). Alani tung asing do ngolunta sian angka na so porsea na holan mamingkirhon jala manghirim na di portibion. Ia marungkil pe hita di portibion ndada holan ala ni arta na jumpang di portibion. Adong do sihirimonta ima arta siteaonon manang pusaka na pinarade ni Debata di surgo i. Alani paisolat do hita di tano on, manang pardagangan ianggo tano on di hita (Pilp. 3:21, Heb 13:14).

 2.5. Dilehon tu hita Tondi Parbadia songon patujolo ni arta siteaononta sogot (ay. 13-14). Nungnga dibagabagahon hian na lehononna Tondi Parbadia. Dinatajangkon barita na uli i huhut  tahaporsea i laos disahaphon do tu hita Tondi i. Marhite ayat on taboto ma, sude na porsea di Tuhanta Jesus Kristus nungnga manjalo Tondi Parbadia. Jadi ndang adong dua horong ni halak Kristen  songon na nidok ni na deba; horong na parjolo, i ma holan porsea dope alai ndang manjalo Tondi Parbadia; na paduahon, nungnga porsea jala manjalo Tondi Parbadia. Sude do angka na porsea i manjalo Tondi Parbadia. Alani do ndang jumpang hita be parenta tu angka na porsea i laho manjalo Tondi Parbadia. Parenta manang sosososo na jumpang hita na mardomu tu Tondi Parbadia, i ma gok Tondi ma hamu (Eps. 5:18), lapatanna lehon hamu ma manang paloas hamu ma dirimuna tongtong dirajai Tondi Parbadia i (patudos Gal. 5:16, 25). Sadanari muse ima di Epesus 4:30 na mandok: unang arsahi hamu Tondi Parbadia i.

Dipatorang do muse di ayat on, ia Tondi Parbadia naung tajalo i, ima patujolo manang jaminan ni arta siteanonta manang haluaon na gok na naeng pasahatonna muse di ari parpudi di surgo i (2 Kor. 1:22, 5:5). Jadi pos situtu rohanta na patuluson ni Tuhan i do sude angka bagabagaNa. On ma ojahan ni pos ni rohanta, tagan di portibion dope hita, nungnga dilehon Tondi Parbadia songon patujolo ni hagogok ni bagabagaNa i. Tarsongon patujolo ni sinamot na jinalo ni parboru di tingki marhorihori dinding paima jaloonna muse sinamot na gok di mata ni pesta i. Songon i ma hita angka na porsea i manjalo Tondi parbadia songon patujolona dung porsea hita di Tuhan Jesus, paima tajalo muse arta silehononna sogot di surgo i.

 3). Tujuan ni Tuhanta mangalehon asi ni rohaNa, ima pasupasu partondion i. Adong do manang na piga tujuan ni Tuhanta umbahen dibasabasahon tu hita asi ni rohaNa manang pasupasu partondion naung tajalo di bagasan Kristus, ima;

3.1. Asa badia hita jala so hasurahan di adopanNa (ay. 4). Hita angka naung taruli asi ni roha ni Debata, ingkon asing do parangenta sian angka na so tumanda asi ni roha ni Tuhanta i. Ingkon badia jala so hasurahan hita marparange, barani tampil beda, ndang paihutihut arus ni zaman. Marparange na tama ma hita di ngolunta (2:10).

3.2. Asa tapuji jala tapasangap Tuhanta i (ay. 3, 12, 14). Ia tujuan na tumimbo ni sude pambahenan ni Debata di ngolunta on, ima asa pujionta jala pasangaponta do Ibana di ngolunta. Asa marsangap nian Tuhan i marhite angka pambahenanta di ngolunta. Alani nang di turpuk jamita on, marsaringar do soara na mandok; pinuji ma Debata (ay. 3), asa tarpuji hasangaponNa i (ay. 12, 14).  Sada pernyataan sikap do turpukta on na mangondolhon ulaon ni Kristus.

 3.3. Asa taboto tahi manang sangkap haluaon ni Debata. Di bagasan Kristus do hape rahasia ni lomo dohot sangapNa maradophon hita nang portibion. Gabe tangkas ma taboto tu dia do arah dohot tujuan ni pardalanan ni ngolunta nang pardalanan ni sejarah nang pardalanan ni nasa na adong, ai sian ibana do saluhutna jala marhapatean tu Ibana. Ibana do bonana laos Ibana do ujungna.

 Panimpuli

 Tung so tardodo hita do bagas dohot timbo ni asi ni roha ni Debata. Marhite asi ni rohaNa i gabe mamora hita di pasupasu partondion. Tangkas do i dihatindangkon apostel Paulus; “Bagasna i antong hamoraon, hapisataran dohot parbinotoan ni Debata (Rom 11:13). Balga, uli, godang, mulia jala argana i pasupasu partondion na pinatupa jala pinaradeNa i di hita di bagasan Kristus. Jalo, hangoluhon jala hamauliatehon ma saluhut asi ni rohaNa i. Rimangi ma di bagasan roham aha ma na binahen ni Kristus i tu ho. Patuduhon ma marhite ngolum, parangem, pambahenan, marhite parhuriaonmu naung taruli ho di hamoraon partondion  na di bagasan Kristus i. Amen