Psalmen
89:15-18
Mangolu Dibagasan Hatigoran Dohot Asi Ni Roha Ni Debata
Hagogoon dohot
hasatiaon ni Debata ndang boi dipartudos/dibandingkan tu hagogoon dohot
hasatiaon ni angka jolma manang panggomgomi manang angka debata na ditano on.
Ndang adong surusuruan manang namarhuaso diliat portibion na boi dipartudos tu
Debata. Nampuna tangan songon Debata, manang nampuna soara na boi manghutur
songon Ibana. Hasatiaon dohot hatigoranni Debata tarida diharajaonNa i, marhite
angka surusuruan na manghobasi di Ibana dohot na mamujimuji goarNa jala na rade
mangulahon angka na sinuruni Debata dibagasan haunduhon. Jotjot do jolma olo
mangose angka hatana sandiri, jala godangan ndang boi sitiopan hatani jolma,
huhut ndang boi jolma manjaga angka hata na ro tu ibana. Alai asing do anggo
Debata, tung mansai gogo do hatani Debata jala satia do Ibana diangka naung
dihatahonNa i. Tung talup do Debata mangulahon agia aha, ai ndang adong na so
tarpatupa Debata, alai ndang hea Debata mangose diangka uhum dohot hatigoranNa.
Parpsalmen dison naeng
manghatindanghon holong satia dohot janji ni Debata tu si Daud dohot tu
pinomparna, na ingkon dipajongjong Debata togu harajaonna salelengni lelengna
(bnd.2 Sam.7:8-16). Janji ni Debata i nunga mamolus godang angka tontangan
dohot partingkian, alai ndang hea Debata lupa di janjiNa i. Nang pe boi diida
dibagasan sejarah bangso israel janji on songon na so dilehon Debata. Isarana
songon Jerusalem na hansur dohot pinompar ni si Daud na so gabe panggomgomi be.
Saluhutna i ndang gabe mambatalhon janji ni Debata tu angka tingki na naeng ro.
Satia do Debata di janjiNa i jala diujungna patuduhononNa ma i marhite hatutubu
ni Sipalua sian pinomparni si Daud. Dasar haporseaonta di janji satia ni Debata
ima Ibana marhuaso disandok portibion. Ibana nampuna langit dohot tano on, jala
Ibana na mangarajai dohot mangaturhon saluhut sejarah parngoluan ni jolma.
Habonaron, hasintongan, holong dohot hasatiaonNa ima cara ni Debata mangaramoti
asa portibi naung golap dohot mardosa on ndang gabe lam sega. Marhite ima
parpsalmen dison maniop togu haporseaonna dihasatiaon janji ni Debata. Sejarah
pardalanan ni hakristenon ima bukti janji ni Debata, haluaon marhite Jesus
Kristus ima peristiwa na so boi dihalupahon, na patuduhon holong ni Debata tu
jolma dihasiangan on. Jadi ndang adong be alasanta laho ragu tu hasatiaon ni
Debata. Ala nunga dipatuduhon Debata bukti holongNa na balga i jala ndang olo
Debata mangose janjiNa. Sungkun-sungkun dihita, dia ma siulahononta nuaeng? Ima
porsea jala pasahathon sude panghirimonta tu holong dohot hasatiaon ni Debata.
Adong piga-piga na boi
taparsiajari sian jamitaon, ima :
1. Karakter ni Debata na bonar diangka dalanNa
jala basa diangka pambahenanNa, ido gabe alasanni Debata laho paluahon jolma
sian dosa hombar tu sangkap ni rohaNa. Tangkas do tarida i sian hatigoranni
Debata na manguhumi jolma na mardosa, jala na so olo muba manadinghon dosana.
Alai tutu parasi roha godang do ianggo Debata, ndang dihalomohon rohaNa jolma
na mardosa i mago dibagasan hadosaonna jala hot diparuhuman. Dipataridahon
Debata ma i marhite Jesus Kristus na pasingkophon hatigoran dohot holongni
rohani Debata tu saluhut jolma.
2. Hatigoran dohot holong ni rohani Debata
mambahen jolma martua, marlasni roha jala marolopolop ala mangolu nasida
dibagasan hatiuran ni Debata. Hatigoran mangajari jolma asa jaga diangka
sidalananna jala togu diangka naung dihaporseai dingoluna. Lapatanna hatigoran
i gabe dasar diangka jolma laho mananda dia do ulaon na hombar tu lomoni rohani
Debata dohot na so dihalomohon Debata asa ulahononna. Holong ni roha mangajari
jolma asa manat diangka pambahenanna. Lapatanna holong ni roha gabe dasar
dijolma laho manghatindanghon/ patuduhon holong ni rohani Debata naung dijalona
marhite angka ulaon nauli na denggan siganup ari. Ala nunga parjolo Debata
patuduhon holong ni rohaNa, ido sitiruon ni jolma asa patuduhononna muse tu
angka na dihumaliangna.
3. Hatigoran dohot holong ni rohani Debata
mangalehon hagogoon dohot hamonangan tu angka jolma na porsea di Ibana.
Hamonangan i dipatangkas marhite hata “manuarang tanduknami/ tanduk kami
meninggi”, lapatanna songon adong ro marlloppit ganda semangat dohot hagogoon
tu nasida. Na mambahen nasida gabe boi mulak semangat muse jala dibagasan pos
ni roha mangadopi angka na masa dingoluna marhite pangaramotion dohot
pangurupion ni Debata na so tartaluhon agia aha. Alani jolma na maniop
hatigoran dohot holong ni rohani Debata ingkon ndang mabiar laho mangadopi
angka na masa, lasni roha arsak pe bolusonna do i mardonganhon Debata. Songon
hatani Debata na mandok, “donganonHu do ho rasirasa ro ajalni hasiangan on” ido
janji ni Debata tu angka jolma na manghaporseai Ibana.
Parpsalmen mangakuhon hatigoran dohot hasatiaon ni Debata ndang adong tandinganna, manang hagogoon di ape di portibion ndang boi menandingi hsmuliaon ni Debata. Hata ni raja Daud dison gabe ungkapan sian rohanta ma i laho manghatindanghon hatimbulon dohot hasangapon ni Debata na sun badia i. Marhite ungkapan on dipaingot hita asa biar mida Debata jala unduk tu Ibana. Holan sasada Ibana do nampuna hatigoran dohot hasatiaon na sun timbul i di sandok liat portibion dohot di harajaon banua ginjang i. Amen.
Post a Comment