MINGGU MISERICORDIAS DOMINI, 14 APRIL 2024
PASONDANGKON MA TU HAMI SONDANG NI BOHIM
(Psalmen 4 : 1 – 9)
I.
Patujolo
Buku Psalmen i ma sada buku na mansai
arga di tradisi dohot pamujion ni
halak Israel (patudos 1 Kronika 15: 16-22; Psalmen 119:1-150:6). Jotjot di buku
Psalmen on, dipangke gabe tuntunan, ojahan jala pasingkophon angka ulaon parugamoon na dipangke halak Israel. marragam do angka na manaruthon buku
Psalmen on. Disurathon ma i marhite: Si Musa, Raja David, Raja Salomo, Asap,
Heman dohot anak ni si Kora. Angka nasida ma na tarsurat na manurathon buku
Psalmen on. Alai adong dope pigapiga bindu na so adong dibahen goar ni
panuratna. Gonopma sude buku Psalmen on sahat tu 150 bindu.
Buku Psalmen on molo di Bibel na marhata
Heber didok ma “Tehillim” jala molo
di Bibel na marhata Junani didok ma “Psalterion”, lapatanna
pujipujian manang buku Pujian na mamangke alat musik gesek jala diiringi alat musik petik. Marragam do
angka bentuk jala gaya penulisan ni Buku Psalmen on. Adong ma i
marhitehite bentuk pujipujian, tangiang pangidoan dohot hata hamuliateon.
Saluhutna i dibagi jala di suraton marhite pembagian tu beberapa parbagianan
songon naung didok, jala na umpenting asa diboto do tu bagian dia do horongna,
marhite fungsi dohot pembagianna di makna ni syair dohot sajakna.
Buku Psalmen bindu 4 on songon sada tangiang haporseaon ni parpsalmen do on jala songon
sada tangiang mandok mauliate di sude denggan basa ni Debata naung jinalo ni
parpsalmen. Boi dohonon psalmen on dipangke songon sada tangiang
di tingki borngin,
jala pasahathon pelean,
uju mangadopi parporangan. Jala dipaingot parpsalmen angka halak na
manghaholongi angka na so hasea, jala dipasahat tu nasida dia do sasintongna
dalan ni ngolu na tutu. Boi do tong psalmen on songon sada andung na dipasahat
tu Debata songon panindangion ni haporseaon uju masa hagogotan.
II.
Hatorangan
Piga ayat sian turpuk Psalmen
on pataridahon pangarajumion na ro sian parpsalmen (ayat 2-
4), na deba nari marharoroan sian pangajarion ni angka malim maradophon bangso
ni Debata taringot tu na ringkot siholsohonon ni bangso i jala sipahusorhusoron
di bagas roha (ayat 5-6). Piga nari sian turpuk ni Psalmen on songon panindangion ni halak na porsea maradophon Debata, na deba nari i ma songon panindangion na dipasahat tu
haroroan ni holso angka i (ayat 3-4). Di bagian na parpudi, dipasahat songon
haporseaon na togu di naung salpu sian angka holsoholso i (ayat 7-9).
Ayat 2, dipasahat parpsalmen togu ni haporseaonna, paboa nasa tangiang
sai na maralus do. On ma songon pos ni roha ni parpsalmen paboa sai
dipalua jala sai diurupi Tuhan i do ibana sian angka hamaolon nang hasusaan na
masa di ngoluna. Ro tu adopan ni Debata laho mangido pangurupion, i do dalan na
patut sipatupaon ni angka halak na porsea.
Ayat
3, dipinsang parpsalmen do angka halak na mangalo
Debata, asa unang nian marjogal nasida mangalo Debata. Ndang marlapatan
pambahenannasida i na mangalo jala mangago halak partigor, ulaon na so marguna
do i. Ai Debata do na gabe alonasida.
Ayat
4, dipasahat parpsalmen do muse ia halak na marpos ni roha tu Debata, na pasahathon nasa holso ni rohana tu Debata, sai taruli do di
hasonangan, ibana ma halak na pinillit ni Debata jala na hinaholongan ni
Debata, jala sai na pasautonNa do tangiang ni angka partigor.
Ayat
5, dipodai parpsalmen do angka halak na mardosa asa
unang sai mangolu di bagasan hajahaton, ingkon dirajumi do, ndang tau adong ro
na denggan di angka halak na sai mangolu di bagasan dosa. Didok parpsalmen, marhusari
ma rohamuna dung ro di podoman hamu.
Ayat 6-9, songon sada refleksi
taringot tu pelean songon na dipasahat Debata
di buku Jesaya, didok “tu dihangKu do hinadeak ni peleanmu? Nunga mahap rohangKu
di angka pelean situtungon
sian birubiru tunggal dohot di tabotabo ni lombu angka na
pinamokmok, jala ndang dihalomohon
rohangKu mudar ini angka lombu dohot birubiru dohot hambing tunggal, ninna
Debata (Jesaya 1:11), dihalomohon Debata do asa pasahat pelean di bagasan
hasintongan, ndang marnida sian godangna manang argana. Dipaingot parpsalmen do
asa nasa jolma pasahathon pelean na tutu, ndang holan sian sipasahaton secara materi, alai ingkon mangolu di
bagasan hatigoran ma jala mangulahon na hinalomohon ni Debata. Tung aha ma
gunana pelean na binoannasida tu adopan ni Debata molo parange nang pambahenan
di ngolu siap ari ndang pataridahon lomo ni roha ni Debata.
Psalmen
bindu 4 on pataridahon tu hita songon
dia do holso nang parsorion
na ro di ngolu ni parpsalmen, boi dohonon tung bora do,
alai nang pe songon i tong do parpsalmen mangolu di bagasan hasatiaon, jala
manahan di ngolu nang pe borat na niadopanna. Tongtong do porsea parpsalmen di holong ni roha ni Debata na sai tongtong
mangaramoti halak na mangolu di bagasan
hasintongan ni Tuhan i. Boi do marsiajar hita sian parpsalmen on, songon dia do
dalan sipatupaonta laho mangadopi angka parsoalan na masa di tongatonga ni
ngolunta, i ma marhite tangiang, mangido di asi dohot holong ni roha ni Tuhan i
jala tongtong ma mandok mauliate tu Tuhan i. Taingot
ma tongtong, di angka ari naung salpu i, dialusi
Tuhan i do tangiangta, umbahen
i tongtong ma hita porsea, manang sadihari pe sai na tangihonon ni Tuhan
i do tangiangta jala maralus do tangiangta i dibahen Tuhanta.
III.
Hahonaan Ni Turpuk
Ojahan ni Jamita Minggu on “Pasondangkon
ma tu Hami Sondang ni BohiM”, on ma sada pandohan na mansai tangkas
panghorhonna di ngolunta marhaporseaon. Turpuk ni jamita on magarahon ngolunta
asa pasahat nasa ngolunta, haporsuhonta, hagogotan na taadopi
tu adopan ni Debata. Ala Debata do na mangaturhon
nasa ngolunta hombar tu lomo ni rohaNa di ari saonari nang di angka ari na
naeng ro. Nang pe ndang tarida sian parnidaan ni jolma dalan ni Tuhan i
mangaramoti ngolunta, alai ingkon marpos
ni roha jala marhaporseaon tu Tuhan i ma
hita, i do na gabe sipeopon
laho mandalani ngolu siap ari asa mangolu hita di bagasan hadameon jala
marhasonangan. Manang aha pe na taadopi jala manang aha pe
alus ni tangiang pangidoan naung tapasahat tu Tuhan i, ingkon taboto
do paboa sai na paluaon ni Tuhan i do hita. Ingot ma hita jala tapeop ma songon na hinatahon ni Tuhanta Jesus,
dipangolu haporseaonmi do ho
(Markus 10:52).
